دەمێ ئەرد نهێنیێن خوە ئاشكرا دكەت
بەیارێ زاویتەیی
ل ئەلندا رۆژەكا بهاری، دەمێ تیرۆژكێن رۆژێ یاری ب گۆپیتكێن چیا دكرن، گەهشتە گوندەكێ بچویك د دلێ كوردستانێ دا، ژ باژارەكێ مەزن هاتبوو، دلێ وی هزار پرسیار هلگرتبوون و گیانێ وی تێهنیێ لێگەڕیانا تشتەكی بوو و وی ژی ب دروستی نەدزانی چیە.
ل سەر كەڤرەكێ مەزن ل تەنشت ئاڤەكا زەلال روونشت، ژ نشكەكێ ڤە دەنگەكێ نزم هاتە گوهێن وی، ل پشت خوە زڤری لێ چ نەدیت، بەلێ ئەو دەنگ یێ بەردەوام بوو، زانی كو كەڤر بخوەیە ل گەل دئاخڤیت.
كەڤری ب دەنگەكێ كوور وەكو كووراتیا دەم و چەرخ و سالان گۆت: ب هزاران سالانە ئەز ل ڤێرێ، مرۆڤێ ئێكێ یێ گەنم ل سەر ڤی ئەردی چاندی من یێ دیتی، ئەڤینا ئێكێ یا دناڤبەرا كچەكێ و خۆرتەكێ دا یا ل بن سیبەرا ڤێ داری ژ دایكبووی من یا دیتی.
حێبەتی بوو، لێ دلێ خوە قانع كر، پرسیار ژ كەڤری كر: و تە چ دی دیتیە؟
كەڤری بەرسڤ دا: من دایك دیتن زارۆیێن خوە هەمبێز دكرن و چیرۆكێن قەهرەمانان بۆ ڤەدگێڕان، من باب دیتن زارۆیێن خوە فێر دكرن دێ چاوا رێزێ ل ئەردی گرن و خوەزایێ پارێزن، هەر رۆندكەكا كەیفێ و هەر رۆندكەكا خەمێ هەبیت ل سەر ئاخا من بارینە و بووینە پارچەیەك ژ گیانێ من.
رابوو ژ پێیان ڤە و ل دویڤ دەنگێ ئاڤێ چوو، رووبارەكێ بچووك دیت ژ ناڤا كەڤران دزا، دەنگێ ئاڤێ هەروەكو ئاوازەكا كەڤنار بوو، نێزیكی بەر لێڤا ئاڤێ بوو و گەلەك ب هووری گوهداری كر.
رووباری چیڕۆكا خوە ڤەدگێڕا: ئەز د ناڤ ئاڤا خوەدا بیرهاتنێن چەرخ و سالان هەلدگرم، ئەز یێ ل بەر كۆچكێن شاهان و كۆلكێن هەژاران را دەرباز بوویم، هەردویان ژی ئەز فێركرم كو ژیانا راستەقینە د سادەیێ و راستگۆیێ دایە. من ل سەر پشتا خوە گەمیێن عاشقان هەلگرتینە، من بیستانێن جۆتیاران ئاڤداینە، ئەز دیدەڤانێ ژ دایكبوونا شارستانیەتان مە.
گۆت ژی: هەر چپكەكا ئاڤا من چیڕۆكەك هەیە، د هەر چەپ و چیڕەكا من ژی دا سەربۆرەك هەیە، ئەز مرۆڤان فێر دكەم كو ژیان وەكو ئاڤێ یە هەر دەم رێیا خوە دبینیت و ژیانێ دەتە وی یێ دەستێ خوە ل بەر ژیانێ ڤەدگڕیت.
ل ناڤا گوندی همبەری دارەكا مەزن و كەڤنار راوەستیا، چەقێن وێ د ڤەداینە هەروەكو ئاسمانی هەمێز دكەن، رەهێن وێ د ئەردی دا چووینە و سیبەرەكا بەرفرەهـ هەیە، هەر كەسێ ل ژێر روونیت دێ پارێزیت.
دەنگەكێ وەكو بایەكێ نەرم ژ دارێ هات: ئەز داپیرا مەزن یا ڤی جهی مە، ل ژێر سیبەرا من ب هزاران كچ و خۆرتان هەڤژینی پێكئینایە، ل سەر چەقێن من ب هزاران زارۆیان یاری كرینە، بەلگێن من هیڤیێن خەلكی هەلدگرن و بەرهەمێ من زكێن برسی تێر كرینە.
گۆت ژی: من خەلك فێر كریە كو هێزا راستەقینە ژ رەهێن كوور دهێت، شارەزایی ژی ژ هەدارێ دهێت، هەر گرێیەكا د چەقێن من دا چیرۆكا سالەكێ ژ سالێن ڤی ئەردی ڤەدگێڕیت.
ل داوییا رۆژێ پیرەژنەكا ب ناڤسال ڤە چووی دیت یا ل بەر دەرگەهێ خانیەكێ كەڤنار روونشتیە، تەشی درێست و سترانەكا كەڤن ب دەنگەكێ ناز دگۆت سەرەرای سالێن عەمرێ وێ یێن درێژ.
گۆتێ: كوڕێ من، ئەز د چاڤێن تە دا دبینم تو یێ ل تشتەكی دگەڕی. هەر كەسێ دهێتە كوردستانێ ل تشتەكی دگەریت، هەموو ژی وی تشتی دبینن.
گۆتێ: پا ئەز دێ چ بینم؟
پیرەژن گڕنژی و گۆت: دێ خوە بینی، ئەڤ ئەردە بەرسڤێن حازر نادەتە تە، بەلكو دێ تە فێر كەت كا دێ چاوا پرسیارێن دروست كەی. هەر بەرەك ل ڤێرێ فێركارەكە، هەر دارەك فەیلەسۆفەكە و هەر رووبارەك ژی هەلبەستڤانەكە.
ئاماژە ب چیایێن دەردۆر كر و گۆت ژی: بەرێخوە بدە ڤان چیایان، هەر ژ دەستپێكا ئافراندنێ ئەو خۆراگرن، ئەم فێر كرینە كو ب هێز بین لێ دنەرم بین، بنەجهـ بین لێ ژ ئاسمانی را ڤەكری بین، بەرێخوە بدە ڤان گەلیێن بەرهەمدار، ئەم فێر كرین كو بەخشین ژ دلنزمیێ یە.
وێ شەڤێ ل ژێر ستێران نڤست، دەنگێن خوەزایێ وەكو لۆركەكا بێ داوی ل دۆرا وی كۆمڤە دبوون، د خەونێ دا دیت، هەموو دیرۆكا كوردستانێ وەكو رووبارەكێ رۆناهییێ ل بەرچاڤێن وی دبلقی، شارستانیەتێن كەڤن دیتن كو ژ نوو ژ دایك دبن و پێشڤە دچن، هەلبەستڤان هەلبەستێن خوە ژ جوانییا خوەزایێ دنڤیسن، پێشمەرگە ب مێرخاسی بەرگرییێ ژ ئاخا خوە دكەن، زارۆك مەزن دبن و دبنە باب و دایك و ڤیانا ژیانێ بۆ بەرەبابكێن بهێن ڤەدگوهێزن.
دەمێ سپێدێ ژ خەو رابووی، هەست پێكر كو وی ئەو دیت یا ئەو لێدگەڕیا، ئەو نە ب تنێ ئەرد و ئەردنیگارەك بوو ل سەر نەخشەی، بەلكو بۆ گیانی مالەك بوو، زانی كو كوردستان نە ب تنێ ئەردەكە كورد ل سەر دژین، بەلكو هزرەكە، رێك و فێرگەهەكا ژیانێ یە.
هەر بەرەكی و هەر كەڤرەكی ئەو فێری هەدارێ كر، هەر دارەكێ ئەو فێری مەردینیێ كر، هەر رووبارەكی بێی بەرخودان ئەو فێری بلقینێ ل گەل ژیانێ كر، چیایان ئەو فێری خۆراگریێ كر، گەلییان ئەو فێری دلنزمیێ كر، ئاسمانێ زەلال ژی ئەو فێر كر كو خەونان چ سنوور نینن.
دەمێ دەم هاتی بچیت، ل سەر گرەكی ل هنداڤی گوندی راوەستیا، ل داویێ تێگەهشت بۆچی خەلك دبێژن كوردستان لاندكا ژیانێ یە. نە ب تنێ ژبەركو وێ ئەلندا دیرۆكێ دیتیە، بەلكو هەر كەسێ پێ خوە دانیتە سەر ئاخا وێ ژ نوو ژ دایك دبیتەڤە.
هەر كەسێ سەرەدانا وێ بكەت ژنوو ژ دایك دبیت، ڤەدگەڕیتە گەوهەرێ مرۆڤایەتییێ، رامانا ژێیاتییا ئاخێ و حەزژێكرنا ژیانێ ل بیرێ دئینیت.
ل سەر ڤێ ئاخێ، پێدڤی ناكەت پرسیارا چ تشتان بكەی، ژبەركو هەموو تشت ل گەل تە دئاخڤن، ئەرد چیڕۆكێن خوە ڤەدگێڕیت، ئاسمان سترانێن خوە دبێژیت، با ژی نامەیێن بابكالان بۆ نەڤییان هەلدگریت.
ئەو تێگەهشت كو ئەڤ ئاخە نە بتنێ وەلاتەكێ ئەردنیگاری یە، بەلكو وەلاتەكە بۆ گیانی، پەنایەكە بۆ دلی، فێرگەهەكە ژی بۆ ژیانێ، جهەكە كو هەر بەرەك و هەر كەڤرەك فێركارەكە، هەر دارەك شارەزایەكە، هەر رووبارەك ژی هەلبەستڤانەكە داستانێن ژیانا بێ داوی ڤەدگێڕیت. ل كوردستانێ، ئەرد نە ب تنێ پێیێن تە باوەش دكەت، بەلكو گیانێ تەژی هەمبێز دكەت و تە فێر دكەت كو ژیان گەلەك ژ وێ جوانترە یا تو هزر دكەی.
