وركشۆپ
شلێر ئمراه نژاد *
ئه‌م ل ئۆده‌یا چاڤه‌رێكرنێ یا سازیه‌كه هونه‌ری یا ل كۆلانا گیشایا ته‌هرانێ روونشتبوون.
ل قاتا ژێرین، كه‌تێرینگه‌ك هه‌بوو كو بێهنا خوارنێن وێ تژی ده‌ڤ و دفنێ كه‌سێن ل سازیێ دبوو.
ئۆده‌یا چاڤه‌رێكرنێ مه‌زن و ب په‌رده‌یێن ستوور ئێن زه‌ر و دیوارێن شینێ تاری بوو، كو دشبیا دیمه‌نه‌ك ژ شانۆیه‌كه جڤاكی. په‌رده‌یێن ئۆدێ ئەوقاس زه‌ر بوون كو ته وێ بگۆتا ته ل ناڤ ته‌شته‌كه ئاڤا پورته‌قالێ وه‌ردایه و داردا كریه و زوها بوویه. كاناپه‌یێن هونه‌ری یێن سه‌یر ب ره‌نگێ ره‌ش، بالا هه‌ر كه‌سی دكشاندن.
سۆفیا یا هەشت سالی كراسه‌كی چه‌رم ئێ پۆرپۆرێ ره‌ش ل خوه كربوو، كو ناڤكا وێ خستبوو ده‌رڤه، و ب كه‌له‌جان ل به‌ندا هاتنا مامۆسته بوو.
سۆفیایێ گۆت: «دایێ، وركشۆپا مه یێ كه‌نگێ ده‌ستپێ دكه؟»
دیا سۆفیایێ، برایێ وێ، سۆرۆیێ یه‌ك سال ونیڤ ژ ناڤ كالسكه‌یێ ده‌رخست و دانی كو ب پێیان هه‌ره و گۆت: «له‌زێ چی، ده‌لالا من؟ ئەم ژ خوه ره روونشتنه و بێخه‌م ب قرچه‌قرچ به‌نووشتێ خوه جووت.»
دیا سۆرۆ پێلاڤێن كو چیڤه‌چیڤ دكرن ل پێیێ كوڕێ خوه كربوو.
دایكێ گوه نه‌ددا ڤان ده‌نگان. ئەو خویا بوو كو د جیهانا خوه ده یه؛ ئەو ب ده‌نگه‌كی بلند ب هه‌ر دو زارۆكێن خوه ره دئاخڤی، دكه‌نیا، و جارنان كوڕێ خوه ژی هان ددا: «ئافه‌رین، كوڕێ من! ببه‌زه!» دایك هه‌یران !
و پاشێ دگۆت: «سۆفیا، كا هه‌لبه‌سته‌كێ ژ سۆرۆ ره بێژه. لێ بنێره چقاس خوه‌ش ب چیڤه‌چیڤ دمه‌شه!»
سۆرۆ تاباتی نه‌دهاتێ و مینا فڕفڕێ ژ ئالیه‌كی ئۆده‌یێ به‌ر ب ئالیێ دن ڤه دبه‌زی و چیڤه‌چیڤ دكر.
سۆرۆ چوو و ژ ره‌خ مێره‌كی ده‌رباس بوو. مێرك ناڤچاڤێن خوه كر گرێ و ب واته ل دیا وێ نهێری و بن لێڤا خوه ده گۆت: «ئه‌ز قوربانا خوه‌دێ ببم، زارۆك دایه كی!»
لێ ژنكێ نه‌بهیست.
ڤێ جارێ، سۆرۆ به‌ر ب ژنكا كو ب كوڕێ خوه ره ل نێزیكی ده‌ری روونشتبوو، ب چیڤه‌چیڤا پێلاڤێن خوه ڤه مه‌شیا. ژن كو ئێدی ڤێزار ببوو، ب چاڤێن وه‌ستیایی ئاخینه‌ك كشاند و ل بانی نهێری. كوڕێ وێ گۆت: «دایێ، ئەز بچم پێلاڤێن وی ده‌رخم.»
دایكێ گۆت: «ژ بۆ خاترا خوه‌دێ، ده‌ڤ ژێ به‌رده! كه‌چا كه‌رێ خوه كه‌ڕاتیێ دانایه.»
لێ ژنكێ نه‌بهیست.
دیا سۆفیایێ مۆزه‌ك ژ چه‌نته‌یێ خوه ده‌رخست و دا ده‌ستێ كه‌چا خوه و ژ وێ ره گۆت: «كه‌ره‌كێ تو بخوه، و كه‌ره‌كێ ژی بده برایێ خوه.»
سۆفیایێ مۆز سپی كر، كه‌ره‌ك دا سۆرۆ، و كه‌رێ دن ب خوه خوار. سۆرۆ هه‌ما وسا كو ب چیڤه‌چیڤ دمه‌شیا، كه‌رێ مۆزێ ژی دخوار. كه‌ره‌كی پچووك ئێ مۆزێ كه‌ت ئەردێ، لێ دیا سۆرۆ دیسا ژی بالا خوه نه‌دا سه‌ر و ئەو هلنه‌دا.
باڤه‌كی جوان، ب ده‌ڤ و لێڤێن شۆڕبووی، ب هه‌ر دو ده‌ستێن خوه گوهێن خوه گرتبوو. هه‌ر كه‌س ل به‌ندێ بوو كو كه‌سێ دن موداخله بكه و چاره‌سه‌ریه‌كێ په‌یدا بكه.
ته‌ڤی كو سا‌ت ژ چار و نیڤێ پشتی نیڤرۆ ده‌رباس بووبوو، ژ مامۆسته‌یێ وركشۆپێ تو خه‌به‌ر تونه‌بوو و به‌رپرسێن سازیێ ژی ب كارێ خوه ڤه مژوول بوون.
ژ نشكێ ڤه، ده‌ریێ ئۆده‌یێ ڤه‌بوو. هه‌موویان سه‌رێ خوه زڤراندن و وه‌رزانین كو مامۆسته هاتیه. لێ نا، ئەو خۆرته‌ك بوو كو هاتبوو رۆناهیێ ئۆده‌یێ سه‌راست بكه.
ده‌ما كو ئەو ب كارێ خوه مژوول بوو، سۆرۆ ب پێلاڤێن زه‌نگلی به‌ر ب وی ڤه بازدا: چیڤ-چیڤ..
خۆرت ده‌مه‌كێ راوه‌ستیا، پاشێ خوه خوار كر و ب روویه‌كی جدی ده‌ستێ خوه به‌ر ب سۆرۆیێ شێرینۆك ره درێژ كر و گۆت: «یەللا، قاره‌مان! تو دخوازی ببی ستێركا فلیما مه؟»
گرێزا ده‌ڤێ سۆرۆ هات خوارێ.
دایكا وی گۆتنێن خۆرتێ كو هاتبوو رۆناهیێ سه‌راست بكه بهیست و بۆ جارا یه‌كه‌م بێده‌نگ ما.
خۆرتی گۆت: «ده‌لالۆك، ئەڤ پێلاڤێن ته پر خوه‌شكن! لێ ل ڤر دڤێ ئەم پر بێده‌نگ بن… ما نه؟»
وی ژ ده‌ری ره گۆت، لێ پشتده‌ری ژی گوه نه‌دایێ.
سۆرۆ، تو وێ بێژی، گۆتنێن وی فێم كربوو. چه‌ند گاڤێن هێدی-هێدی پشت-پشت چوو، و ڤێ جارێ هێدیتر كر چیڤه‌چیڤ.
دیا وی كه‌نیا و گۆت: «نه‌ترسه، به‌رخكێ من! ببه‌زه، هه‌ره ژ خوه ره بلیزه.»
پشتی چه‌ند كێلیان، یه‌كی ل ده‌ری خست، و سۆرۆ به‌ر ب ده‌ری ڤه به‌زی. لنگێ وی ل سه‌ر پرتكا مۆزێ شه‌متی، كه‌ت ئەردێ و ده‌ست ب گریێ كر.
د وێ كێلیێ ده، مامۆسته كه‌ت هوندر و ب كه‌ن گۆت: «ببۆرن، ئەز مام ده‌ره‌نگیێ، كۆلان پر ترافیك بوو! باشە، كی ئاماده یه كو بلیزه؟»
ئۆده ب چه‌پكان تژی بوو. لێ ڤێ جارێ، نه ته‌نێ ژ بۆ مامۆسته و گۆتنا وی… لێ ژ به‌ر پرتیا مۆزێ كو ده‌نگێ چیڤه‌چیڤا پێلاڤێن سۆرۆ فه‌تستاندبوو.
—————
* نڤیسەرەكا كوردا رۆژهەلاتا كوردستانێ یە.
* 8 سالان ل ئە‌نستیتویا ئە‌حمه‌دێ خانی ل ئورمیێ مامۆسته‌تیا زمانێ كوردی كریە (2009-2010).
* سه‌رنڤیسه‌رێ كۆڤارا خاتوون كو ل ئە‌نستیتویا ئە‌حمه‌دێ خانی تێ وه‌شاندن.
* سه‌رۆكا كۆمیته‌یا وێژه‌یی یا ئە‌نستیتویا ئە‌حمه‌دێ خانی یە.
* به‌شداری چالاكیێن دن ئێن وێژه‌یی و چاندی یێن ڤێ ئەنستیتویێ یێن ب زمانێ كوردی ڤه گرێدایی یه، د ناڤ ده چالاكیێن د كۆمه‌له‌یا ژنان ده.
* ئه‌نداما كۆنسه‌یا ناڤه‌ندی یا كۆمه‌له‌یا زانایێن جوان ئێن ئورمیێ.
* ژ سالا 2010 ئان هه‌تا نها ل رادیۆ و ته‌له‌ڤیزیۆنا كوردی یا ته‌هرانێ وه‌كی وه‌رگێر وراگەهاندنكار و دوبلاژكارە.
* چەند پەرتووك ب زمانێ كرمانجی وەشاندینە و چەند خەلات ل فەستیڤالێن شعری وەرگرتینە.
