دكتاتـۆرییا (مـەزهـەبـی)
سەیفوللا موحەمەد
پێدڤی ناكەت ئەم بەحسێ ڕژێمێن دەستهەلاتدار یێن دەسپێكا دامەزراندنا دەولەتا ئیراقی تاكو گەهشتییە ڕژێما سەدامێ دكتاتور بكەین، چونكە هەمی ب كودەتاییێن لەشكەری دەستهەلات گرتینە بەر و بتنێ زمانێ چەكی و خوەسەپاندنێ بكار دئینان د گەل هەمی خەلكێ ئیراقێ و ب تایبەت گەلێ كورد، كو مەزنترین باج دای ژ دەستهەلاتێن ئێك لدویڤ ئێك یێن ئیراقێ و ب تایبەت ڕژێما بەعس و سەدامێ گۆڕبەگۆڕ، كو ب هەمی هێزا خوەڤە بزاڤا قڕكرن و ژناڤبرنا گەلێ مە كری، هەتا بكارئینانا چەكێ كێمیاوی و هەوێن ئەنفال و كۆمكوژی و هەر كارەكی دڕندە. پشتی ڕوخانا ڤێ ڕژێما دكتاتور، ئیراق كەفتە د قووناغەك دی دا و هەمی خەلكێ ئیراقێ پێشوازی ل ڤێ قوناغێ كر، كو ئیراق ب هەمی جوداهییێن خوە یێن نەتەوی و ئولی و مەزهەبیڤە گەهشتنە قەراغێن ئارامییێ و ئێدی ستەم و ستەمكاری نەما و هەر ئێك دێ ب مافێ خوە شابت، ل شوینا كۆدەتایێن لەشكەری و دەستهەلاتا تەك حزبی و تاكەكەسی و دكتاتوری، بنەمایێن دیموكراسی و بەشدارییا فرەلایەنی جهـ گرت و یاسا و دەستوور هاتنەدانان و ئیراق ب ئیراقا فیدرالی هاتە ناڤكرن، دەستهەلاتێن یاسادانان و بجهئینانێ ب ڕێكا هەلبژارتنا هاتنە دانان و لدویف پێكهاتێن سەرەكی و ئەنجامێ هەلبژارتنان ئەڤ دەستهەلات هاتنە دابەشكرن. هەلبەت لدویڤ ڕێژەیا زێدەتر یا عەرەبێن شیعە مەزهەب، بەهرا شێری د دەستهەلاتێدا بوویە بەهرا وان. لێ ژبیر نەكین كو د پێكئینانا هەر كابینەكا حوكمەتێدا پشكدارییا كوردان ل سەر بنیاتێ هەڤپەیمانی و ڕێكەفتنا و تایبەتمەندییا هەرێمێ و پێگیرییا بەندێن دەستووری بوویە، ب تایبەت ئەوێن گرێدای هەرێما كوردستانێ.لێ مخابن تا كو نوكە ئەڤ دەستهەلاتا شیعی پێگیر نە بوویە ب چ ڕێكەفتنا و دەستوور پاشگوهـ هاڤێتییە، هەردەم ب تانا سەرێ خوە بریار دایە ژ بۆ بەرژەوەندییێن خوە و ژبەر خوەپەرستییا خوە یا مەزهەبی دەستهەلات بكار ئینایە بۆ بجهئینانا ئەجندایێن ئیرانا شیعەتگەر، هەر ژ بەر ڤێ خوەپەرستییا مەزهەبی نەڤیایە خوە ژبن ڕكێفا ئیرانێ دەربێخیت و ڕێكێ ل مایتێكرنێن وێ بگریت. ئەڤە ژی بوویە ئەگەرا هندێ دەهان گروپێن توندڕەو و میلیشیات بێنە دروستكرن و ببنە گەف لسەر هەمی خەلكێ ئیراقێ و ب تایبەت هەرێما كوردستانێ. چونكە ب هیچ ڕەنگەكێ ڕازی نینن كوردان نیمچە ئازادی و سەربەخوییا خوە هەبیت، ئەڤجا ژ ڤێ سیاسەتا دەستهەلاتا شیعە مەزهەب دیار و گەلەك ڕۆنە كو چجار نە بەرهەڤن چارەیا بۆ كێشەیێن مە یێن نەتەوی ب بینن و د ئیراقەكا فیدرالیدا پێكڤە بژین، بەلكو بزاڤێ دكن ئەوا هەیی ژی ژ ناڤ ببەن، هەر وكو دیار ژی ب دەهان كێشە تاكو نوكە ماین هلاویستی و پاشگوهـ خستینە و ئەڤرۆ ژی گەفێ ل سەر بچویكترین مافێن گەلێ مە دكن، كو بودجە و مووچە و شایستێن دارایینە، بێ گومان سەردری سەردەرییەكا خوەسەپینەرە و خوەپەرستییەكا نەتەوی و دیسان مەزهەبی یە. ئانكو دەستهەلاتەكا دكتاتۆرە ب هەمی ڕەنگێن خوەڤە. ژبەركو هیچ باوەری ب دیموكراسییێ و وەكهەڤی و پێكڤەژیانێ نینە، دشێین بێژین دەستهەلاتەكا دكتاتۆرا مەزهەبییە و چ جوداهی د ناڤبەرا ڤێ و دكتاتۆرێن بەرێ نینە، بەلكو مەترسییا ڤێ گەلەك زێدەتر و مەزنترە، ب دیتنا من ئەگەر دەلیڤێ ببینن دێ وێ كەن یا چ دكتاتۆران نەكری.
