دیـاردەیـا فرەژنیێ
رەمەزان ئیسماعیل گەرەگوهی
تشتەكێ بەرچاڤ و ئاشكرایە كو ژن و مێر د ژیانێ دا تەمامكەرێن ئێك و دونە و د ئێك گەهەشتن و پێككرن و ئێك دەست و ئێك دلیا وان بنەما و شەنگستەیێن ئاڤاكرنا خێزانەكا بەختەوەر و تەنا و ئارامن و هەبوونا زارۆكان ژی د خێزانێدا هیڤی و خۆشیەكا پتر و سەقایەكێ گەشتر وخوشتر دمالێدا پەیدا دبیت و گڕنژین و بشكوڕین و كەیفخۆشی پتر ب سەر لێڤێن هەموو تاكێن خێزانێدا دهێت و ئارامی پتر ڕۆلێ خوە دبینیت و ژیان ژی ب ڕێكوپێكی تر و باشتر بڕێڤە دچیت، بەرۆڤاژیا ڤێ ژی ئانكو نەبوونا زارۆكان كو فێقیێ مالێنە گەلەك جاران دبیتە ئەگەرێ بێ ئۆمێدی و بێزاری و هەتا بگەهیتە وی ڕاددەی ژی كو ببیتە سەدەمێ سست و خاڤبوون و لاوازبوونا ئەوان بنواشە و بناغەیێن خێزانا سەركەفتی ل سەر ئاڤا دبیت و گەلەك جاران ژی ژ وێرێ ژی دەرباز دبیت و دبیتە ئەگەرێ پەیدابوونا ئاریشە و كێشە و گرفتان دناڤبەرا هەردوو هەڤسەراندا و هەتا دناڤبەرا هەردوو
خێزانێن وان ژی دا، نەخاسمە دەمێ دیار دبیت كو ژن ئەگەرێ نەبوونا زارۆكایە، هندەك جاران فرەژنی ب ئەگەرێن دی ژی مینا: هەبوونا نەساخییێن دۆمدرێژ ل نك ژنێ یان ژی ب ئەگەرێ مایتێكرن و گڤاشتن و تەحریكێن خێزانێن هەردوو هەڤژینا ب ئاوایەكێ نەرێنی، لێ ب هەر ئەگەرەكی بیت ئەڤە وێ ناگەهینیت كو هەمی زەلام خودانێن ڤێ چەندێ بن و وەسا ب ساناهی ب فرەژنیێ ڕازی ببن، ئەڤە ژی سەخمەراتی خوە دووركرن ژپەیدابوونا ئەنجامێن خراب و ئالۆزی و ئاریشەیان د ناڤ مالێدا و زیان پێ كەفتنا داهاتیێ زارۆكان، هەر چەندە گەلەك جاران ژی پشتی ئینانا هەڤژینا دویێ ژی شوینا ئەڤ چەندە ببیتە ئەگەرێ پەیدابوونا نەخۆشی و ئالۆزی و پێك نەكرنێ و بێ تفاقیێ، بەرۆڤاژی یا بوویە سەدەمێ پەیداكرنا سەقایەكێ باشتر و خۆشیەكا پتر ژ بەری هینگێ و ژیانا وێ خێزانێ ب هەموو ئەندام و پێكهاتەیێن خوەڤە ژ قووناغەك و كاودانەكی ژیانێ بۆ ئاقارەكێ باشتر و خۆشتر برییە.
