نها دەمێ ئێكبوونـا چـار پـارچـەیێن كـوردستانـێ یە
لـەیـلا ئەسكەنـدەر
ل ناڤا ئەڤان بارودۆخان دا و پشتی هێرشا ئیسرائیلێ بۆ سەر ئێرانێ، ڕۆژهەلاتا ناڤەڕاست ل سەر گڤاندەكا مەترسیدار راوەستیایە. ئێدی ئەڤ گرژییە نەتنێ یێن دكەلن، بەلكو نێزیكە بپەقن. د دەمەكی دا كو وەلاتێن مەزن شەڕی ل سەر زالبوونێ دكەن، لێ كوردستان هێشتا د ناڤبەرا شەڕی و خیانەتێ و بێدەنگیێ دا هەلاویستی مایە. ئەڤە چەندە ژی بۆ گەلێ كورد زێدەترە ژ هەر هەلچوونەكا هەرێماتیك یا دیتر، لێ ئەو هۆشداریەكە. گازیكرنەكە، دەلیڤەكا دیترە بۆ سەرخۆبوونێ.
هێشتا هەر چار پارچەیێن كوردستانێ – ڕۆژاڤا، باشور، ڕۆژهەلات و باكور ماینە پارچەكری، هەر ئێك ژ وان ل ژێر دەسهەلاتەكێ دانە و خوین یا ژێ درژیێت، هەر پارچەك ب تەنێ خەباتێ دكەت. ل گەل هندێ ژی دا ئەم ئێك نەتەوەینە. ئێك گەل. وە دڤێت ب ئێك دەنگ باخڤین. ئێدی وەختێ ئێكگرتنێ نەمایە بۆ ڕۆژەكێ ژ رۆژان، بەلێ ئەڤرۆ یە.
ئەم یێن د دۆرپێچكرینە ب هندەك زلهێزان كو چەندی كوردستانەكا ئازاد هەبیت ئەو ژێ دترسن. ئێران مۆشەكا ل هەولێر وەردكەت. توركیا بۆردۆمانا مە دكەت. سووریا ئینكارا هەبووان مە دكەت. ئیراق ستەمێ ل مە دكەت. ل دەمەكی ئەڤ ڕژێمێن هەنێ بێهنا مە تەنگ دكەن و دەوروبەرێن مە توندتر دكەن، ئەمریكا ئاسمانێ مە كۆنترۆل دكەت. ئەوا كو دبێژنێ دەڤەرێن دژە فڕین، چاڤدێری یا بەردەوامە و بێدەنگیا مە ژێگرتی ل دەمێ تووشی هێرشكرنێ دبینـ ئەڤە پاراستن نینن، بەلكو ئالاڤێن كۆنترۆلكرنێنە. دەلیڤێ ب مە نادەت ب ئازادی بژین، تەنانەت ل ئاسمانێ مە ژی دا. هەر هەڤپەیمانیەك ل گەل ئێك دەسهەلاتەكێ دا دێ بیتە بهانە بۆ ئەوێن دیتر كو ب بێی دودلی هێرش بكەنە سەر مە.
ئەڤەیە واقعێ سەخت بۆ نەبوونا ناسنامەیێ. ئەم نەتەنێ ب سنووران ڤە دگرێداینە؛ بەلكو ب هەڤڕكیین دەسهەلاتا جیهانی ڤە دگرێداینە. لایەنگریكرنا مە بۆ ئێكی؛ واتایا وێ چەندێ ددەت كو ئەم دێ بۆ وان لایەنێن دیتر بینە ئارمانج. مانا مە د پارچەبوونێ دا واتە پەرچەقاندنا مە ژ لایێ هەمیان ڤەیە.
ئەڤجا ئەڤ جارە دبیت ب دوماهی بهێت و دڤێت ل گەل مە دا بدوماهی بهێت. بلا ئەڤ بەرەبابێ كوردان ـ ل ناڤخۆ و ل ناڤا ڕەڤەندێ دا ـ ئەو رەڤەند بیت كو ئایندەیەكێ پڕی سەروەری ئاڤا بكەت. بلا ئەڤ سەردەمە ئەو بیت كو ئێدی ئەم واز ل هندێ بینن كو پەنایێ بۆ زلهێزێن بیانی ببەین و دەست ب خزمەتكرنا گەلێ كورد بكەین. بلا گەنجێن مە، زانایێن مە، هونەرمەندێن مە و پێشمەرگێن مە ب ئێك رێز بەر ب سەربەخۆیێ ڤە بچن، بەر ب كوردستانەكا ئێكگرتی و سەربخۆ.
ل گەل هەلاتنا ئەورەكێ تاری ب سەر كوردستانێ دا، ئەڤە نە وەختێ دودلیێ یە. ئەو وەختە هاتیە كو ببنە مللەت. بۆ هندێ ڕزگار ببین. بۆ هندێ راببین نەكو وەك پارچە پارچە، بەلكو وەك ئێك وەلات ب ئێك ئالا، ئەم نە د یاخینە.. ئەم شۆڕشگێڕین.. ئەم مێڤان نین. ئەم ڕەه و رویشالین.
وەكو وەلاتیەكا كوردی ـ كەنەدی دبێژم: بۆ هەڤپەیمانێن مە یێن كەنەدی و هەڤەلێن مە یێن ئەمریكی و بۆ رەڤەندێن مە ل دەرەڤەی وەلاتی: بێدەنگیا هەوە ئەڤرۆ نەیا لۆژیكی یە. ئەڤە نەتەنێ پرسگرێكەكا كوردی یە، بەلكو ئەڤە پرسەكا مرۆڤی یە. ئەم پێدڤی ب وان هەڤپشكیانە كو ل سەر ڕێزگرتنێ بهێنە ئاڤاكرن، نەكو ل سەر كۆنترۆلكرن و زالبوونێ. ئەم پێدڤی ب قرچەكا هەناسێنە، نەكو هیشتا سنوورێن فرێنێ بۆ مە زێدەتر ل ئاسمانی بەرفرەه بكەن. كوردستان یا بەرهەڤە، كوردستان دڤێت سەرهەل بدەت. كوردستان دڤێت ئێك پارچە بیت.
