رۆلێ گەنجان د پرۆسەیێن سیاسی و هەبوونا قەیرانان دا
هێلین سـالـم
ل هەرێما كوردستانێ وەك هەر دەڤەرەكا دی،گەنج وەكی پێكهاتەكا سەرەكی یێن جڤاكینە. ئەڤ قۆناغا ژیێ (١٨ـ٣٥ ساڵ) دشێن گەلەك كارتێكرنێ ل سیاسەت و جڤاكێ بكەن، چونكی گەلەك زویكا گوهۆرین ب سەر جیهانێ دا دهێن و گەنج زوی ل گەل ڤان گوهۆرینان خوە دگونجینن، هەرچەندە رێكێن پشكداریكرنا گەنجان د پرۆسەیا سیاسی دا یا ڤەكریە، بەلێ هێشتا هندەك ئاستەنگ و كێماسی یێن هەین.
د دەمێ بۆریدا و ژ ئەگەرێ نە هنارتنا مووچەی ژ لایێ حوكمەتا بەغدایێ ڤە و پێك نەهاتنا حوكمەتا هەرێمێ و حوكمەتا ئیراقێ، هەرێما كوردستانێ تووشی قەیرانەكا مەزن یا ئابووری بوویە و كارتێكرنەكا مەزن ل ژیانا رۆژانە یا خەلكی كریە، ب تایبەتی ژی گەنجان، گەلەك ژ وان مالەكێ برێڤەدبەن یان كرێكارن ل جهەكی و ب داهاتەكێ كێم ژیانا خوە برێڤە دبەن، دبیت گەلەك گەنج ژ كارێن وان هاتبنە دویرئێخستن و هیڤیێن وان بۆ ژیانێ شكەست بن و نەشێن بۆ خوە داهاتەكی پەیدا بكەن و مال و ژیانا خوە برێڤە ببەن، بەلێ ئەڤە دەلیڤەكە ژی كو گەنجێن هەرێمێ هێز و شیانێن خوە نیشا دەن و كار پێبكەن و هاریكاریا مال و مللەتێ خوە بكەن.
رۆلێ گەنجان ل دەمێ هەبوونا قەیرانێن دارایی ل سەر هەرێمێ گەلەك گرنگە د ڤان دەمان دا، گەنج دشێن ببنە هێزەكا كاریگەر بۆ گوهۆرین و چارەسەركرنا پشكێن جۆراوجۆر یێن قەیرانێ، وەك داهێنان و پرۆژەیێن نوی، گەنج خودان هزرێن نوی و ئاڤاكەرن، دشێن پرۆژەیێن بچویك و كێم مەزاختی دەست پێ بكەن كو ببنە ژێدەرێن نوی یێن داهاتی.
خواندن و پەروەردە، وەرگرتنا زانستی و شارەزاییێن نوی د وارێن ئابووری و بازرگانی دا دێ بیتە ئەگەرێ چارەسەركرنا قەیرانان ب رێكێن زانستی.
كاركرن د وارێن جۆراوجۆر دا، گەنج دشێن كار د هەر وارەكی دا بكەن، نە تنێ د وارێن حكۆمی دا، بەلكو ل كەرتێ تایبەت ژی.
تەكنەلۆجیا و دیجیتال، بكارئینانا تەكنەلۆجیایێ دشێت هاریكاریا كێمكرنا خەرجیان بكەت و بەرهەمهێنانێ بلند بكەت.
رێكخستنا خوە و دروستكرنا تۆڕێن جڤاكی: گەنج دشێن رێكخراوێن مەدەنی و تۆڕێن هاریكاریا ئابووری دروست بكەن؛ بۆ كێمكرنا باندۆرا قەیرانان.گەنج كلیلا گەشەپێدانێنە و ل دەمێ قەیرانێن دارایی، ئەڤ رۆلە پتر گرنگتر دبیت.
ل دەمێ قەیرانان دا بتنێ گەنج دشێت گوهۆرینان بكەت گەنج دشێت ب هێز و شیانێن خوە و ب كرنا كارەكێ سەربەخۆ نیشا خەلكی بدەت، كو رۆلێ گەنجان، بتنێ چالاكی نینن ئەگەر قەیران چەند دگران بن، بلا گەنج دەستان دانەهێلن و ب هەمی هێز و شیانێن خوە بۆ برێڤەبرنا خۆ د ڤێ رەوشێ دهاریكار بن.
