قەهوەیەكا تەحل ل گـەل چكلێتەكا ژ ئـەوێ تەحلتر
سوسمان عومەر ئەحمەد
ئەز هزر دكەم برینا من گەلەك حەزژ من دكەت، چونكی بەردەوام سەردانا من دكەت و باش من هەمبێز دكەت، هەتا من د هەمبێزا خۆدا بێهۆش و بریندار دكەت، من دڤێت ئەڤ مێهڤانداریە ب دوماهیك بهێت بۆ هەتا هەتایێ، بەلێ بڕینا من ژی وەكی منە ئەگەر حەزژ كەسەكێ كر یان دێ گەلەك حەز ژێ كەت یان ب ئێكجاری حەزژێ ناكەت، بەلێ د بەرانبەر دا ڕێزێ لێ دگریت، ئەی خودانا دلێ پاك ئەزا بۆ تە دبێژم، هەتا كەنگی دێ ئەوی دلی ئێشینی ئەو دلێ ڕەش و تالان بووی د سینگی تەدا، د قەفەسا سینگێ تەدا گۆڕستانە گۆرێن خەمێن تە تێدا دڕێزكرینە، ئێك ب ئێك هەمی نێزیكترین كەسن بۆ تە، بەلێ دیارە ژیانێ و مرۆڤێن تێدا حەزژ مە نەكر و ئەم نەڤیاین، نەژیانێ ئەم ژ دلەكێ پاقژ هەمبێزكرین نە ژی مرنێ، هەردو وەكی ئەوێ قەهوێنە یا دهێتە ڤەخوارن دەمێ سەرێ تە ژ بەر خەم و ژانان دنالیت، ل گەل چكلێتەكا ژ ئەوێ تەحلتر شرینتر دبیت! ئەز دلێ خۆ بكەلێشینم نیشا هەوە بدەم ژ بلی خوینا ڕەش تۆ چ تشتی تێدا نابینی، ژبەر هندێ هەمی پەیڤ نەشێن خزمەتا دلێ من بكەن، نەشێن دەربڕینێ ژ ئەوان خەم و ژانا بكەن یێت د دلێ من دا موكۆم بووین، هەمی پەیڤ ناهێنە گۆتین، لەوڕا ب بێدەنگی دمینن هەتا دل ژ لێدانێن خۆ ڕادوەستیت.
