كاودانێن نەرم و خۆشی و كاودانێن دژوار و نەخۆشی
ن. پ.د.ئیبراهیم ئەحمەد سمۆ
و. عـزەت یـوسف
د دەمێن نەرم و خۆشی دا، گۆتن د مشەنە و دەنگ د بلندن، گەلەك كەس بەر ب رێز و هێلێن پێشیێ دچن و درووشمێن قەبە دهەژینن و ستران و حەیرانۆكان ب قارەمانیێ دبێژن. لێ گاڤا هڕ و با رادبیت و خەیال بەر ب بای دا دچن، پڕانیا وان د بێدەنگیێ دا بەرزە و وندا دبن، ب تەماشەكرن و گوهداریكرنێ رازی دبن.
د كاودانێن تەنگاڤ و دژوار دا، كێمەك كو هەژی هەلگرتنا ناسناڤێ (قارەمانن) دەردكەڤن؛ ئەون یێن كو قەیران وان نا لەرزینن و نا هەژینن و ئیرادەیا وان ژ سەدەما پەیدابوونا تەنگاڤیان لاواز نابیت. ئەون د قادا شەڕ و هەڤڕكیێ دا ب هێز و باوەری رادوەستن، نە دودلن و نە ژی پاشەكشێ دكەن، بڕیارێ مینا شیرەكی د شەڕەكێ بێ دلۆڤان دا بلند دكەن و بكاردئینن.
قارەمانێتی نە ب گۆتن و پەیڤا و پڕبێژیێ یە، لێ ب دۆمدارییا هەلوەستەكی كو ل دەما هەبوونا تەنگاڤیێ و نەتڕسیێ دا دهێتە پیڤان. شەڕێن راستەقینە رەسەناتی و كانزایێ مرۆڤان دیار دكەت، كەسێن كو ب وێرەكی هەمبەری چارەنڤیسی روی ب روی دمینن ژ یێن كو هەتا سیبەر هێلاینە پارڤە و جودا دكەت. چەندین (قارەمان) ب گۆتن پەیدا بووینە و دەما كریار ژی هاتی نەماینە، بەروڤاژی ژی چەندین كەس د دەمێن خۆشیان دا بێدەنگ و د دەمێن مەترسیان دا بووینە دەنگدەرێن بلند!
