مایتێكرن
ئیبراهیم دێرگژنیكی
ئێك ژ وان دیاردەیێن دهێنە بەرچاڤ د دەما بویەرەك یان پرسگرێكەك چێدبیت، یان هەتا دپرسێن گشتی وتایبەت دا، مایتێكرنا هندەك كەسێن چو پەیوەندیا وان ب وێ پرسێ ڤە نینە، چ ل جهێ وێ بویەرێ ئامادە ببن وخوە ل جهێ كەسێن تایبەتدمەند ددانن وجاران رۆلێ وان رادبن، ئەڤ كەسە چ خوە ب چالاكڤانێن سۆشیال میدیایێ یان جڤاكێ سڤیل بدەنە نیاسین، یان ژی ل ژێر هەر ناڤەكێ دی، خوە كەنە بابەت و ریكلاما خوە ل سەر حسێنا وێ بویەرێ دكەن و وەكی مەزن دبێژن (خوێیا هەموو گرارا نە) بێی مفایەكی ئان چارەیەكێ بۆ وێ پرسێ ببینن، لێ یا سەیر دەما دەزگاییێن میدیایێ دچن ئەڤان كەسان دئیننە پێش ودیدارا دگەل، ل وی دەمی پرسیار ل دەف وەرگری پەیدا دبیت، ئەرێ ڤان دەزگەهان چ پرس نینن ب ئازرینن، ب دووڤ ڤان كارەكتەران ڤەنە، رێز بۆ وان، هەر ئێك دشێت دبیاڤێ خوە دا و ل چارچوڤێ تایبەتمەندیا خوە دا رۆلێ خوە بگێریت، چونكە دەما كەسەك دهێتە دناڤ بابەتەكی دا پەیوەندی ب وی و كارێ وی نەبیت، چ مفای د وی بیاڤی دا ناگەهینیت، بەلكو ئەسلێ كێشێ ل بەر خەلكی بەرزە دكەت و خوە وشوناسا خوە ژی ژ دەست ددەت.
پرسەك سەرێ خوە هەلددەت، ئەرێ هوكار چنە، كەسەكی پەیوەندی ب پرسەكێ نەبیت و مایێ خوە تێدا بكەت و رۆلێ تایبەتمەندێن وی بیاڤی بگێریت، ئەرێ چ هوكارێن دەروونی وجڤاكی ل پشت ڤێ دیاردێ هەنە؟ ئەرێ نە ژ ڤالاهیەكا دەرونی وسوزداری یە؟! یان وی كەسی دروست خوە نە نیاسیە وخواندنەكا باش بۆ خوە نەكریە؟ ئەڤێ دیاردێ كاریگەرییەكا خراب ل سەر وێ پرسێ و بەرزەكرنا رێیە چارەیان و ب هەروەچوونا دەمی هەیە، لەوا بۆ بەرسینگگرتنا ڤێ دیاردێ دڤێت دەزگەهێن راگەهاندنێ رۆلێ خوە ببینن و جڤاك بهێتە هشیاركرن، رێز ل تایبەتمەندیا بهێتە گرتن وهەر كەسەك دبیاڤێ خوە دا، خوە پێشبێخیت ومایێ خوە دوی تشتی بكەت یێ دچارچووڤێ بسپۆریا وی دا، لەوا گرنگە ئەم كاری ل سەر تایبەتمەندیا بكەین و كەچكێ خوە نە هەلگرین و ب مالا دەواتێ نە كەڤین، ئێدی كاران بۆ خوەدیێن وێ بهێلین.
