شێوەكارەكێ كورد بۆ جارا پێنجێ ل رووسیا هاتە خەلاتكرن
زنار تۆڤی:
وەزارەتا دەرڤەیا رووسیا بۆ سالا پێنجێ ل دووف ئێك خەلاتێ باشترین شێوەكارێ ئەندازیارێ دبلۆماسی دایە شێوەكارەكێ كورد.
نوریك موسایان ل وەلاتێ رووسیا ژ دایك بوویە، بۆ دبێژیت: د وێ بەریكانێ دا كو پتری 300 شێوەكاران ژ چەندین وەلاتێن جیهانی پشكداری تێدا كربوو، ئەز شییام پلا ئێكێ ب دەست خۆڤە بینم و كەڤالێ من وێنێ (گۆرەپانا سمۆلێنسكایا) بوو، ئەو بوو ئەگەرێ سەركەفتنا من د وێ بەریكانێ دا و (ماریا زاخارۆڤا) پەیڤدارا وەزارەتا دەرڤە یا رووسیا ئەو خەلات پێشكێشی من كر.
ناڤهاتی گۆت: ئەڤ سالە شێوەكارێن وەلاتێن رووسیا، ئەمریكا، نەمسا، هۆلەندا، كازاخستان، بیلارووس، مۆلدۆڤا، جۆرجیا، نیكاراگوا، ئۆزبەكستان، توركیا و سووریا پشكداری د وێ بەریكانێ كربوو.
نوریك موسایان، گەنجەكێ كوردێ بەهرەمەندە و خۆجهێ مۆسكۆ یە، ژیێ وی 22 سالن، ل گەل هندێ كو سەركەفتنێن باش د بیاڤێ شێوەكاری دا هەنە، قوتابیەكێ زیرەكە و ئەڤ سالە كۆلیژا تەلارسازی ب پلەیا نایاب تەمامكرییە، هەروەسا ژبەر لێهاتییا وی، باوەرناما رێزلێنانیێ (باوەرناما سۆر) یا زانكۆیێ پێ هاتیە بەخشین و هەروەسا كورسیكەكا خواندنا ماستەرێ بێ بەرامبەر بۆ پێشكێشكرن.
