ل وەرزێ نوو ئاكرێ دێ بۆ ناسناڤان هەڤڕكیێ كەت
یانەیا ئاكرێ یا وەرزشی ل وەرزێ 2023-2024 ناسناڤێ خولا نایابا كوردستانێ ب دەستڤەئینا، لێ وەرزێ 2024-2025 ب تنێ مانا خۆ پارێزیت، بۆ وەرزێ نوو گرێبەستا ڕاهێنەرەكێ نوو دگەل هژمارەكا یاریزانا ئیمزاكریە و ڕژدن هەڤڕكیێ بۆ ناسناڤی بكەن، لدۆر ڤێ یەكێ رۆژنامەیا ئەڤرۆ بۆچوونێن جودا وەرگرتینە بڤی شێوەیی.
رەیان عەبدولقادر یاریزان تیمێ گۆت: پار سال تووشی هنگافتنێ بووم و نەشیام هەتا دووماهیا وەرزی بەردەوام بم ل ناڤ یاریگەهێ، لێ هنگاڤتنا من دووماهی هاتییە و بەرهەڤم ئەڤسالە هەموو شیانێن خۆ ب كاربینم بۆ تیما یانەیا ئاكرێ، تیما مە ژبلی هژمارەكا یاریزانێن بهێز و باش ئیناینە د ناڤ رێزێن خوەدا دگەل راهێنەرەكێ باش و خودان ئەزموون و شیان، ئەڤسالە ڕژدین هەڤڕكیا مە بۆ ب دەستڤەئینانا ناسناڤان بیت.
ژلایەكێ دووڤە ناڤهاتی گۆت: وەرزێ ئەڤ سالە ئەم دێ هەموو بزاڤان كەین هەر یارییەكا بهێتە كرن بتنێ بۆ سەركەڤتنێ‌َ بیت، مە جەماوەرەكێ مەزن و دلسۆز هەیە ئەم گەشبینن دێ ب پشتەڤانییا وان ژی بەردەوامیێ دەینە ئاست و ئەنجامێن باش.
ژلایێ خوەڤە سوهەیب عەلی پەیڤدارێ یانەیا ئاكرێ گۆت: تیما مە یا فوتبۆلێ 90٪ بەرهەڤی بۆ پشكداریێ د خولا نایابا كوردستانێ دا تەمام بووینە 10هەتا 15ڤێ هەیڤێ دێ دەست ب ڕاهێنانان كەین، هەتا نوكە ژبلی یاریزانێن پارسال دگەل مە 11یاریزان نوو گرێبەست دگەل هاتینە تۆماركرن كو سێ ژوان پیشەكارن
ناڤبری گۆتژی: پلانا كارگێریا یانەیێ بۆ وەرزێ نوو دێ هەڤڕكیێ ل سەر هەردو ناسناڤێن خولا نایابا كوردستانێ كۆپا كوردستانێ كەین، ڕاهێنەر هێور مستەفا سوزدایە پشتەڤانان كو ب رەنگەكێ بیت ڤان هەردو ناسناڤان بۆ ئاكرێ بكەتە دیاری.
