وەغەركرنا نڤیسەر و رۆژنامەڤان و میدیاكارێ دێرین جەمال بەرواری ـ دێریشكی
ئیبراهیم دێرگژنیكی
ب خەم و كۆڤان ڤە پێر ئێڤارا رۆژا شەمبیێ (١٣/٩/٢٠٢٥) میدیاكارێ دێرین و رۆژنامەڤان و نڤێسەر جەمال مەلا سلیمان مەلا قاسم بەرواری ـ دێریشكی ل دهۆكێ وەغەرا دویماهیێ كر، د ژیێ (٧٩) سالیێ دا،- پشتی تووشی جەلتەیەكێ بووی ب خافلەتیڤە وگەهاندنە (سەنتەرێ دلی) ل (نەخۆشخانا ئازادی)، بەلێ مخابن سەرەرای بزاڤێن نۆشداران دلێ وی ژ لێدانێ ڕاوەستا و روحا وی بەرەف دلۆڤانییا خۆدێ ڤە بلندبوو وچوو -، و تەرمێ وی یێ پیرۆز ل (مزگەفتا جۆدی) هێتە شویشتن و كفنكرن و نڤێژ ل سەركرن، پاشی ب ئامادەبوونا مالباتێ و گوندی وكەسوكار و دۆست و هەڤال و هەڤپیشەیان و خەلكێ دەڤەرێ ب گشتی ل (گۆرستانا دولبێ/ سەرتەنگێ) ل سێمێلێ هاتە بخاكسپاردن.
(بابێ (ئاڤا)ی/ جەمال مەلا سلێمان مەلا قاسم بەرواری)، ژ دایكبوویێ سالا (١٩٤٦) بوو ل (گوندێ دێریشكێ) ل دەڤەرا (بەرواری بالا)، ژ مالباتەكا جامێر وئۆلدار و مەلا؛ خۆدێ ژێ رازی: جەمال مەلا سلێمان مەلا قاسم دێریشكی (١٩٤٦)، رۆژنامەڤان و ڕاگەهاندكار ل رادیۆیا كوردی ل بەغدا – بەرێ، بابێ (١) كچەكێ و (٣) كوڕان بوو: ئاڤا، ئاریا، ئەلند، ئاری.
(جەمال/ بابی ئاڤای) د خێزان وم الباتەكا دیندار دا یێ مەزن و فامابووی و ل بەر دەستێ بابێ خوە یێ هاتیە پەروەردەكرن و فێربوویە قورئانا پیرۆز و شەنگستێن ئایینێ ئیسلامێ و روكن و مەرجێن ئیمانداریێ و خودێ ژێ رازی: (جەمال بەرواری) ل سالا (١٩٦١) پشتی خواندنا خوە یا سەرەتایی ل (گوندێ دێریشكی) بدویماهی ئینایی یێ چوویە (باژێرێ مووسل) و پاشی (باژێری ئامێدیێ)، ژ بۆ خواندنا قووناغا ناڤنجی، پاشی ناڤنجی و ئامادەیی ل (بەغدا) یێن تمامكرین و یێ چوویە (پشكا كوردی/ كۆلیژا ئادابێ ل زانكۆیا بەغدا)، و یا خواندی هەتا خلاس كری (القسم الكوردي/ كلية الآداب / جامعة بغداد) سالا ١٩٧٣ و بوویە بسپۆر و شارەزا د (زمانێ كوردی) دا.
پاشی ل رادیۆیا كوردی ل بەغدا (ئەوا ل ٢٩/١/١٩٣٩ هاتیە ڤەكرن) ب فەرمی هاتیە دامەزراندن پشتی سالەكێ كار لێ كری بەری دەرچوونێ، و ب دەهان بەرنامە پێشكێشكرینە و كارێ وەرگێرانێ كریە و رۆلەكێ باش د بەلاڤەكرنا فولكلۆر، ستران، چیرۆك و زمانی كوردی دا هەبوو، هەر ژ دەستپێكا سالێن حەفتێیان هەتا سالا (٢٠٠٣) رادیۆیا هاتیەگرتن و ئێدی نەمایی، كە بۆ ماوەیێ (٣٠) سالان خەباتا رادیۆیی و میدیای و زمان و ئەدەب و فولكلۆرێ كوردی كریە.
مامۆستا (جەمال بەرواری) سەرەرای كارێ وی یێ میدیایی، كە چەندین سالان بەرنامەیێ د گەل (گوهداران/ مع المستمعین) ل رادیۆیا كوردی پێشكێش دكر و دەنگوباس دخواندن و كارێ وەرگێرانێ ژی دكر، رەوشەنبیرەكێ گەلەك چالاك و ب بزاڤ بوو، بەردەوام راپۆرتێن رۆژنامەڤانی بۆ (رۆژناما التێ‌خی) دنڤێسین و چەند رۆژنامە و گۆڤارێن دی ..، هەروەسا (٣) پەرتووك ژی نڤێسیبوون و چاپكربوون: ١- (الحلم الذي لا أراه) (كۆمەكا هۆزانان ب زمانێ كوردی) نشر: دار الثقافة والنشر الكردية – بەغدا..
٢- صفحات من الأدب والفن الكوردي (باللغة العربية – بەغدا.
٣- أنا والمایكروفون (ب زمانێ كوردی) وەك: بیرهاتن). هەروەسا هۆزان ژی دڤەهاندن و پشكداری یا د چەند كۆنگرە و چالاكیێن هۆزانێ و ئەدەبی دا كری و گەلەك نڤێسینێن خوە – ب كوردی و ب عەرەبی- د چەندین رۆژنامە و گۆڤارێن كوردستانی، عیراقی و عەرەبی دا بەلاڤكرینە، و كار دكر وەك: پەیامنێرێ لاپەرێ (رەوشەبیرییا كوردی/الثقافة الكردية) د (رۆژناما / جريدة التآخي) دا، رێڤەبەرێ نڤێسینگەها (الطاردينيا) بوو ل دهوكێ، ئەندامێ (گرۆپێ فەلەك یێ رەوشەنبیری و جڤاكی) بوو ل دهۆكێ، پشكدارەكێ بەردەوام بوو ل بزاڤ و چالاكی و سمینارێن رەوشەنبیری ، ئەدەبی، جڤاكی دا ل دهۆكێ و ل كوردستانێ ب گشتی، خودێ عەفۆ و ئازا بكەت ب دلۆڤانییا خوە.
