رێكخراوەك بۆ پاراستنا مافێن قەرەچان ل دهۆكێ دێ هێتە دامەزراندن
شاكر ئەتروشی:
رێكخراوا (سەرەد) بۆ پاراستنا مافێن قەرەچان، موولەتا خوە یا كاركرنێ ژ فەرمانگەها رێكخراوێن نا حكومی وەرگرت و د پێنگاڤا ئێكێ دا دێ بارەگایێ خوە یێ سەرەكی ل پارێزگەها دهۆكێ ڤە كەن و د پێنگاڤا دویێ ژی دا دێ نڤیسنگەهێن خوە ل پارێزگەهێن هەولێر و سلێمانیێ و چەند وەلاتێن ئورۆپی ڤەكەن و سەرۆكێ وێ رێكخراوێ یێ گەشبینە كو ئەو دێ شێن كارێن باش ئەنجام دەن.
عابد دهۆكێ، سەرۆكێ رێكخراوا (سەرەد) بۆ پاراستنا مافێن قەرەچان، ل دۆر كار و چالاكیێن وێ رێكخراوێ، بۆ رۆژنامەیا ئەڤرۆ گۆت: سەرەد ئانكو وەكو هندەك دبێژن (بێژینگ و سەڕاد) كو ناڤەكێ كلتۆری یە، ئەڤە دەمەكە ئەم سێ كەس وەكو دەستەیا دامەزراندنا ڤێ رێكخراوێ، كو ئێك ژوان ژنە، مژوولی دانانا ڤێ رێكخراوێ بووین، سوپاس بۆ خودێ مە موولەتا فەرمی ژ ژ فەرمانگەها رێكخراوێن نا حكومی وەرگرت و هەر نوكە ئەم یێ كاردكەین دا بارەگایێ خوە یێ فەرمی ل دهۆكێ ڤەكەین، د دووڤدا دێ مە نڤیسینگەهـ ل چەند پارێزگەه و هندەك وەلاتێن ئۆرۆپی هەبن و ئەز گەشبینم ئەو ئارمانج و پلانێن مە داناین دێ سەرگرن، چنكو حكومەتا هەرێما كوردستانێ پشتەڤانیێ ل ڤان جۆرە رێكخراوان دكەت و هەموو ژی ژپێخەمەت پێشڤەبرنا ئاستێ پێكڤەژیانێ یە ل هەرێما كزردستانێ.
ل دووماهیێ گۆت: ب دیتنا من ئەڤە جارا ئێكێ یە رێكخراوەكا بڤی رەنگی ل سەر ئاستێ هەرێما كوردستانێ و عیراقێ دهێتە ڤەكرن و پشتی بارەگا دهێتە ڤەكرن دێ بزاڤێ كەین كو ئامارەكا دروستا قەرەچان ل هەرێما كوردستانێ و هەموو پارێزگەهێن عیراقێ بزانین كا چەند قەرەچ هەنە، چنكو ل دووف ئامارێن نە فەرمی دناڤبەرا (70) هەتا (80) هزار قەرەچان ل هەرێما كوردستانێ و عیراقێ هەنە و ب دیتنا من ئەڤ ژمارە پترە، د بەرنامێ مەدایە خۆلێن جۆرا و جۆر(رەوشەنبیری، وەرزشی، كومپیۆتەری، بەریكانەیان ….) بۆ قەرەچان ڤەكەین، هەروەسا ب رێكا دامودەزگەهێن حكومەتێ دێ بزاڤێ كەین هژمارەكا قەرەچان ئەوێن زانكۆ و پەیمانگەه ب دووماهی ئیناین ب دامەزرینین.
