دایباب بۆ قوتابیان چ بكەن؟
هەلات ئەحمەد
د ڤی سەردەمی دا سیستەمێ برێڤەبرنا ژیانێ و پەروەردەكرنا زارۆیان گەلەكێ هاتیە گوهۆرین ژ سەردەمێ باب و باپیرێن مە، ژبەركو نوكە ئەم یێن د دەمەكێ هەستیار و جیاواز دا، دڤێت ب هەستیاری و هشیاری سەردەریێ ل گەل زارۆیێن خۆ بكەین، ب تایبەت ل دەمێ سالا خواندنێ دەسپێدكەت، ژبەركو پتریا زارۆیان یێن ئالۆدەبووین ل سەر بكارئینانا ئامیرێن تەكنولۆژیایێ و ئاپادان…هتد و گەلەك بكارئینانا ئەنترنێتێ دڤێت بهێتە سنوورداركرن، ل دویڤ یاسایێن دارای، د دەمێ ماوەیێ خواندنگەهێ دا، یا دیارە هەر خێزانەكێ شێوازێ برێڤەبرنا ژیانا خۆ یا تایبەت یا هەی، هەر مالباتەكێ سیستەمەكێ هەی بۆ پەروەردەكرن و چاڤدانا زارۆكین خۆ، فەرە و یا پێدڤیە دایباب هەردو د هاریكار بن بۆ پێشوازیكرنا سالا نوی یا خواندنێ ب كیمی دو هەفتیان بەری خواندنگەه بهێنە ڤەكرن یا فەر و هەرە پێدڤی دڤێت ئەڤ كارە ل گەل زارۆیی بهێنە ئەنجامدان:
– ئێكەم تشت دایباب كار ل سەر بكەن، دروستكرنا سیستەمێ خەوا زارۆیە، ژبەركو د جڤاكێ مە دا ل دەمێ بێهینڤەدانان دا، ب تایبەت یا هاڤینێ بەرەلایەك یا هەی د دەمێ خەوا زارۆیی دا و ب گرنگی ناهێتە دیتن، دڤێت خەوا وی ل دەمێ پێدڤی بیت ل دیڤ ستانداردێن جیهانی كو هەبوونا خەوەكا بەروەخت یا ساخلەمە و كارتێكرناكا هەرە باش یا هەی، ل سەر هەمی لەشێ زارۆیی، چونكو ئێكەم تشت كو هاریكاریا زارۆیی دكەت كو ژێریا وی یا باش بیت (خەوە) ئانكو نڤستنە. لەورا هەتا كو زارۆك یێ هشیار و بەرهەڤ بیت بۆ سالا نوی، دڤێت رێكخستنا دەمێ وی یێ نڤستنێ بهێتەكرن، ئەڤە خالا هەرە گرنك بوو، دیسا دەروونێ زارۆكی بهێتە بەرهەڤكرن و ئارامیێ بۆ پەیدا بكەن، داكو هەر ترسەك و هزرەكا نەرێنی یا هەی ل نك وی نەمینیت.
هەروەسا گرنگی ب دانێن خوارنێن وی بهێتە دان و هەر سێ دان ب خوارنێن باش كو بۆ گەشەیا لەشی و مێشكی دباشبن بۆ بهێنە دابینكرن، دا بەردەوام یێ ب هێز و هشیار و ئارام بیت.
ل بەرچاڤ وەرگرتنا جهێ خواندنێ و دابینكرنا ژینگەهەكا ئارام و ساخلەم، دا كو ئەو ب خۆ ئەركێن خۆ یێن رۆژانە رابیت و دایباب پتر ل سەر هایدار بن.
بەردەوام دایباب رێنیشاندەر و رێخۆشكەر بن، ب هەڤرا خشتێ دابەشكرنا دەمی بۆ بهێتە دروستكرن، داكو بزانیت دەیباب هاریكار و پشتەڤانن نەكو بتێ فەرمانا لێ دكەن. ژبیرنەكەن ئارمانجا خواندنێ بۆ دیار بكە كا بۆ چ دخوینیت؟ یان ژبەر چ دخوینیت؟ و گرنگیا خواندنێ بو دیاربكە و ئەگەر بشیێ نموونا بۆ بینە، دا پتر تێبگەهیت و حەز ل سەر خواندن و وقوتابخانێ هەبیت.
بەردەوام بۆ دیاربكە خواندنگەه مالا دویێ یە و مامۆستا مینا دایبابانە و رێزگرتنا وان ئەركە.
