مـاددەیێن هـۆشـبه‌ر تیرۆرا لـەشینە
هه‌ولێر، قائید میرۆ:
سه‌رۆكێ ئێكه‌تیا زانایێن ئایینێ ئیسلامێ ئاشكرا كر، هه‌موو بزاڤ بۆ به‌رهنگاربوونا ماددێن هۆشبه‌ر دهێته كرن و گۆت؛ ماددێن هۆشبه‌ر تیرۆرا لەشییە، چونكه مه‌ترسیه‌كا مه‌زن لسه‌ر جڤاكی په‌یدا كریه.
دكتۆر عه‌بدوللا سه‌عید، سه‌رۆكێ ئێكه‌تیا زانایێن ئایینێ ئیسلامێ بۆ رۆژناما ئه‌ڤرۆ دیار كر، دژایه‌تی كرن و به‌رهنگاربوونا ماددێ هۆشبه‌ر ئێك ژ كارێن سه‌ره‌كی یێن ئێكه‌تیا زانایان بوویه، ژبەرکو ماددێن هۆشبه‌ر مه‌ترسی و کارتێکرنەکا زۆر مه‌زن لسه‌ر هه‌رێما كوردستانێ و هه‌موو جڤاكی هه‌یه و گۆت؛ له‌ورا مامۆستایێن ئایینی ژلایێ هشیاركرنا وه‌لاتیان رۆله‌كێ به‌رچاف و مه‌زن هه‌بوویه.
د. عەبدوللا دیار کر ژی، ئێك ژوان كارێن ده‌ستپێكی و گرنگ یێن ئێكه‌تیا زانایان به‌رهنگاربوونا ماددێن هۆشبه‌ره و به‌رده‌وام مامۆستایێن ئایینی كار بۆ هشیاركرنا جڤاكی كریه و ل ده‌زگه‌هێن راگه‌هاندنێ و گوتارێن رۆژا ئه‌ینی مامۆستایێن ئایینی ب هویری به‌حسێ مه‌ترسیێن ماددێن هۆشبه‌ر كریه بۆ خه‌ڵكی، داکو تاك بهێنه هشیاركرن.
سه‌رۆكێ ئێكه‌تیا زانایێن ئایینێ ئیسلامێ گۆتژی؛ به‌رده‌وام مه هاریكاریا لایه‌نێن په‌یوه‌ندیدار كریه بۆ كێمكرنا مه‌ترسیێن ماددێن هۆشبه‌ر، ماددێن هۆشبه‌ر تیرۆره‌كا جه‌سته‌ییه و پێدڤیه هه‌موو پێنگاڤ بهێنه
هاڤێتن بو ژناڤبرنا ڤی ماددەی داکو گه‌نج و لاوێن كوردستانێ ژ ئه‌ڤان دیارده‌یێن مه‌ترسیدار بپارێزین.
دكتۆر عه‌بدولا سه‌عید د بەردەوامیا ئاخفتنێن خۆدا دیار کر، مامۆستایێن ئایینی ب رێیا پێشكێشكرنا سیمیناران خه‌لك هشیار كریه کو نێزیكی ماددێن هۆشبه‌ر نه‌بن، چونكه مه‌ترسیه بۆسه‌ر ژیانا وان و گۆت؛ ئه‌م دبینین ب رێیا ماددێن هۆشبه‌ر گه‌نج یێ دهێنه سه‌ردابرن و هه‌ر كه‌سه‌كێ تووشی ماددێن هۆشبه‌ر ژی ببیت دێ تووشی زیانێن مەزن یێن ڵەشی و دەروونی بیت و زیان گه‌هاندن ب تاكی زیان گه‌هاندنه ب جڤاكی، لەورا ئه‌و کەسێن ماددێن هۆشبه‌ر به‌لاڤ دكه‌ن دناڤا جڤاكی دا پێدڤیه سزایێن دژوار بۆ هه‌بن.
دکتوری دیار کر ژی کو حوكمه‌تا هه‌رێما كوردستانێ ژی ب رێیا ده‌زگه‌هێن په‌یوه‌ندیدار به‌رده‌وام كار بۆ ده‌سته‌سه‌ركرنا وان كه‌سان كریه یێن بازرگانیێ ب ماددێن هۆشبه‌ر دكه‌ن، هەکە رۆژانه ژی نه‌بیت هه‌رچه‌ند رۆژا جاره‌كێ ده‌زگه‌هێن ئێمناهیێ تۆمه‌تبارێن ماددێن هۆشبه‌ر ده‌سته‌سه‌ر دكه‌ن و پیلانێن وان یێن بكارئینان و بازرگانیێ ب مادێن هۆشبه‌ر ژناڤ دبەن و گۆت؛ به‌لێ پێدڤیه هه‌موو جڤاك یێ هاریكار بیت بۆ ئه‌ڤێ مه‌ترسیێ و به‌رهنگاربوونا ماددێن هۆشبه‌ر.
