تیپا رۆژ یا ستران و مۆزیكێ دیمەنەكێ جوان
دلۆڤان هالۆ:
حسێن پیرۆز، بەرپرسێ تیپا رۆژ یا ستران و مۆزیكێ ل زاخۆ، د دیدارەكێ دا بۆ رۆژنامەیا ئەڤرۆ گۆت: تیپا مە ل 2012 هاتیە دامەزراندن و ئەڤە دو سالن دەست ب مۆزیكا گەڕۆك كریە ل كۆرنیشێ پرا دەلال و سیكا تاری، ل رۆژێن پێنجشەمب و ئەینیان مۆزیكێ دژەنن و سترانان دبێژن و ڤێ چەندێ دیمەنەكێ جوان دایە كۆرنیشێ زاخۆ.
هەروەسا گۆت: تیپا رۆژ ئێكەم تیپە كو بشێت بەردەوامیێ ب مۆزیكا گەڕۆك بدەت و پتری (40) كەسان دڤێ تیپێ دا ئەندامن، كو ژ كوڕ و كچێن موسلمان و مەسیحی و ئێزدی پێك دهێن، ل گەل دەستەیا كارگێڕی كو ئەو ژی ژ پێنج كەسان پێك دهێن، بەری نوكە رێژەیا مۆزیكژەنان ل سەر ستێجێ ل زاخۆ دكێم بوون، لێ پشتی ئەڤ تیپا رۆژ هاتیە دامەزراندن ئەو رێژەیە زێدەتر لێ هات، هەروەسا مە شیایە دو مۆزیكژەنێن ئامیرێن نوو (كلارنێتێ و قانوونێ) ل زاخۆ زێدە بكەین، كو بەری نوكە نەبوون، زێدەباری هاتنا كچێن سترانبێژ بۆ ناڤ تیپا مەدا.
