بڕیارەك د بەڕژەوەندیا كەسوكارێن شەهیدان دا دێ هێتەدان
هەولێر، قائید میرۆ:
بەرپرسەكێ وەزارەتا شەهیدان و ئەنفالكریان راگەهاند، حوكمەتا هەرێمێ دێ بڕیارەكێ د بەڕژەوەندیا خێزانێن شەهیدان دا دەت و دبێژیت: د دەمێ نوكە دا دەست ب كۆمكرنا زانیاریان ل دۆر وان شەهیدێن ل پێشینەیا خانیان مفاداربووین هاتیە كرن.
كەریم كاوە، رێڤەبەرێ گشتیێ شەهید و ئەنفالكریان ل ئیدارەیا سەربخۆ یا سۆران بۆ رۆژناما ئەڤرۆ دیاركر، د دەمێ نوكە دا دەست ب كۆمكرنا زانیاریان هاتیە كرن، ل دۆر مفاداربوونا خێزانێن شەهیدان ژ وەرگرتنا پێشینەیا خانیان و سندۆقا ئاكنجیبوونێ، لەوڕا ژی ب رێیا فۆرمەكێ زانیاری ژ هەر خێزانەكا شەهیدان دهێنە وەرگرتن، یێن سالێن بۆری ژ وەرگرتنا پێشینەیا خانیان مفاداربووین و گۆت: «پێدڤیە خێزانێن وان شەهیدان یێن سالێن بۆری ژ پێشینەیا خانیان مفاداربووین، سەرەدانا رێڤەبەریێن خوە بكەن و فۆرما زانیاریان تژی بكەن».
كەریم كاوە گۆتژی: «پشتی كۆمكرنا زانیاریان، سەرۆكایەتیا جڤاتا وەزیران دێ پێداچوونێ كەت و ئەم پشتڕاستین دێ بڕیار د بەڕژەوەندیا كەسوكارێن شەهیدان دا دەركەڤیت و حكومەتا هەرێما كوردستانێ ل دۆر ڤەگەڕاندنا پێشینەیێن خانیان بۆ كەسوكارێن شەهیدان دێ بڕیارێ دەت، بەلێ هەتا نوكە دیارنینە دێ هووركاریێن بڕیارێ دچاوابن».
