ب هزاران فەرمانبەرێن دی دێ پارچەیێن ئەردی وەرگرن
هەولێر، قائید میرۆ:
بەرپرسێ فۆرمێن ئەردی ل وەزارەتا باژێڕڤانیێ ئاماژەكر، هەتا نوكە رازیبوون ل سەر ناڤێن زێدەتری 480 هزار كەسان هاتیەدان بۆ وەرگرتنا پارچەیێن ئەردی و ب هزاران ناڤێن دی ژی ماینە و دێ رازیبوون ل سەر هێتەكرن و ژ وەرگرتنا پارچەیێن ئەردی مفاداربن.
سەربەست مەولود، سەرپەرشتێ فۆرمێن بەلاڤكرنا پارچەیێن ئەردی بۆ رۆژناما ئەڤرۆ دیاركر، هێشتا پرۆسەیا هنارتنا ناڤێن فەرمانبەران و هێزێن پێشمەرگەی بۆ وەرگرتنا پارچەیێن ئەردی یا بەردەوامە و گۆت: «د دەمێ نوكە دا لیستەكا دی یا ناڤان بۆ سەرۆكایەتیا جڤاتا وەزیران دهێتە بەرهەڤكرن، داكو رازیبوون ل سەر بهێتەكرن و ژ وەرگرتنا پارچەیێن ئەردی مفاداربن، ل گورەی دووماهی ئامار، هەتا نوكە سەرۆكایەتیا جڤاتا وەزیران رازیبوون ل سەر ناڤێن 480 هزار فەرمانبەران كریە و مافێ وەرگرتنا پارچەیێن ئەردی هەیە».
سەربەست مەولود گۆتژی: «لیستەكا دی ژی ل سەرۆكایەتیا جڤاتا وەزیرانە و چاڤەڕێی وەرگرتنا رازیبوونێ دكەین، هەموو ئەو ناڤێن رازیبوون هەی بۆ باژێڕڤانیێن سنۆرێن وان دهێنە هنارتن و ل گورەی پلانا بەردەست دێ پارچەیێن ئەردی ل سەر هێنە بەلاڤكرن، بەلێ كارتێن ئەردی وەرناگرن، هەتا هووربینی نەهێتە كرن، چونكی ئەو كەسێن بەری نوكە مفاداربووین دوبارە مفادار نابن».
