پتر ژ 90 بانكێن بازرگانی و 29 بانكێن بسپۆری ل هەرێما كوردستانێ هەنە
دلۆڤان ئاكرەیی
رێڤەبەرێ گشتیێ بانكێن پسپۆری یێن هەرێما كوردستانێ دیار كر: چاكسازیێن حوكمەتا هەرێمێ د كەرتێ بانكیدا د بەردەوامن و بڕیارا لێخۆشبوونێ ژ پشكەكا قەرزێن ئاكنجیبوونێ ژلایێ حوكمەتێ ڤە دەستكەفتەكێ مەزنێ كابینەیا نەهێ یە و دامەزراندنا بانكەكا نیشتمانی د قۆناغا دووماهیێ دایە.
جەمیل ئەبوبەكر، رێڤەبەرێ گشتیێ بانكێن پسپۆری یێن هەرێما كوردستانێ بۆ رۆژنامەیا ئەڤرۆ گۆت: بڕیارا تایبەت ب لێخۆشبوونا ژ قەرزێ خانووبەران و ئاكنجیبوونێ، دەستكەفتەكێ مەزنێ حوكمەتا هەرێمێ یە و كارئاسانیەكا گەلەك باش بوو بۆ وەلاتیان و مفای ژێ وەرگرتیە، چونكو بەریا دەرچوونا بڕیارێ كۆژمێ گشتیێ وان قەرزان لسەر وەلاتیان پتر ژ چار ترلیۆن دیناران بوون، لێ ژ ئەگەرێ بڕیارێ نوكە ب تنێ نێزیكی دو ترلیۆن دینار ماینە، وەلاتی دشێن هەتا 31ـێ كانوونا ئێكێ یا ئەڤ سالە مفای ژ ڤێ بڕیارێ وەربگرن.
دەربارەی پرۆژێ ستراتیژی هەژمارا من، رێڤەبەرێ گشتیێ بانكێن پسپۆری یێن هەرێما كوردستانێ ئاشكراكر: پرۆژە د بەرژەوەندیا وەلاتیان دایە، ب بجهئینانا تەماما وی پرۆژەی ئیدی نۆبە بۆ وەرگرتنا مووچەی ل بانكان نامینیت، هەروەها قەرەبالغ و رۆتین ژی نامینیت، هەڤدەم پێشبینی كر هەتا دووماهیا ئەڤ سالە هەموو فەرمانبەرەك د چارچۆڤێ پرۆژەی دا بهێتە تۆماركرن.
جەمیل ئەبوبەكر پلانەكا گرنگا دی یا حوكمەتا دیار كر و گۆت: پتر ژ سالەكێ یە كار لسەر پرۆژەیەكی دكەین بۆ دامەزراندنا بانكا نیشتمانی یا كوردستانێ، كو وەكو بانكا ناڤەندی یا هەرێمێ كار بكەت و نۆێنەراتیا هەموو بانكان بكەت، كارێن دامەزراندنا بانكێ ژی نوكە د قۆناغا دووماهیێ دانە كو دێ تایێن وێ ل هەمی پارێزگەهێن هەرێمێ هەبن.
زێدەتر گۆت: ئەڤ بانكە دێ بیتە ئەگەرێ وێ چەندێ هەرێما كوردستانێ ب شێوەیەكێ فەرمی ل دەرڤە بهێتە نیاسین و پەیوەندییا راستەوخۆ دگەل بانكێن نیڤدەولەتی هەبیت.
ل دۆر ژمارەیا بانكان ل هەرێمێ جەمیل خویاكر: پتر ژ 90 بانكێن بازرگانی و 29 بانكێن پسپۆری ل هەرێما كوردستانێ هەنە، هەروەها پلان بۆ كێمكرنا ژمارا وان هەیە.
