دەست ب پڕكرنا فۆرما ئەلكترۆنی یا ئاهێن خوارنێ دێ هێتە كرن ڤە
دهۆك، دلۆڤان ئاكرەیی:
ڕێڤەبەرێ گشتیێ بازرگانی ل وەزارەتا بازرگانی و پیشەسازی یا هەرێمێ دیاركر، بڕیارە د ڤێ مەهێ دا پرۆسەیا پڕكرنا فۆرما ئاهێن خوارنێ یا ئەلكترۆنی دەست پێ بكەتەڤە، نوكە پشكا ئار و كەرەستێن خوارنێ یێن 700 هزار كەسان هاتیە بڕین و دبێژیت: ئەم چاڤەڕێینە فۆڕم بهێنە كاراكرن، دا كو پشكا خۆ ژ ئاهێن خوارنێ وەربگرن.
نەوزاد شێخ كامیل، ڕێڤەبەرێ گشتیێ بازرگانیێ ل وەزارەتا بازرگانی و پیشەسازییا حوكمەتا هەرێما كوردستانێ بۆ رۆژنامەیا ئەڤرۆ ئاشكرا كر، تیمەكا تەكنیكی ژ بەغدا هاتیە و چەندین ڕۆژە ڕاهێنانێ ب تیمێن وەزارەتا بازرگانی یا هەرێما كوردستانێ دكەن و گۆت: «بەری ب دووماهی هاتنا ڤێ مەهێ دێ پرۆسە دەست پێ كەتەڤە، ئەو وەلاتیێن نەشیاین خۆ تومار بكەن، دشێن خۆ تۆمار بكەن و د قووناغا دویێ دا، خزمەتگوزاریا تۆماركرنا ناڤێ زارۆیان و ڤەگوهاستنا فۆرمێ ژ بریكارەكی بۆ بریكارەكێ دی یان ژ باژێڕەكی بۆ باژێڕەكێ دی، هەروەسا تۆماركرنا وان كەسێن هەڤژینی پێك ئینای و فۆرما ئاهێن خوارنێ نەی، یان ئەوێن ل دەرڤەی وەلاتی و دەلیڤە نەبوویە بزڤڕن و فۆرمێن خۆ نوو بكەنەڤە دێ هێنە تۆماركرن».
