قۆناغا دویێ یا پڕۆژەیێ گەشتیاری ل بەنداڤا خنس دێ هێتە چێكرن
دهۆك، لەزگین جۆقی:
ڕێڤەبەرێ ناوچەداریا ئەترووشێ دیار كر، د دەمەكێ نێزیك دا دەست ب قووناغا دویێ یا پڕۆژەیێ گەشتیاری ل بەنداڤا خنس دێ هێتە كرن.
نەشوان حسنی، رێڤەبەرێ ناوچەداریا ئەترووشێ بۆ رۆژناما ئەڤرۆ خویا كر، پڕۆژەیێ بەنداڤا خنس ئێك ژ پڕۆژەیێن كابینەیا نەهی یا حكومەتا هەرێما كوردستانێ یە ب سەرۆكاتیا مەسرور بارزانی و گۆت: «ئەڤ پڕۆژە د وارێ گەشتیاری و چاندنێ دا ل دەڤەرێ گەلەك یێ گرنگە، پتر ژ حەفت ملیۆن مەترێن سێجا یێن ئاڤێ عمبار دكەت، ئەڤ سالە جۆتیارێن دەڤەرا ئەترووشێ مفایەكێ مەزن ژ ئاڤا بەنداڤا خنس بۆ چاندنێ دیت».
گۆتژی: «نوكە پلان هەنە، د دەمەكێ نێزیك دا قووناغا دویێ یا پڕۆژەیێ گەشتیاری ل بەنداڤا خنس بهێتە چێكرن، مە ب هەڤكاری ل گەل رێڤەبەریێن پەیوەندیدار شیایە دیزاینەكێ گونجای بەرهەڤ بكەین و ب رێكا وەبەرهێنانێ دێ بەنداڤا خنس بیتە پڕۆژەكێ گرنگ یێ گەشتیاری».
