ئەڤرۆ زاخۆ چاڤ ل سەركەڤتنا دویێ یە
قەیس وەیس:
بڕیار ئەڤرۆ ل دەمژمێر شەشێ ئێڤاری تیما فوتبۆلا یانەیا زاخۆ نوونەرا كوردستانێ و ئیراقێ یارییا خوە دویێ ژ هەڤڕكیێن قووناغا كۆما یا قارەمانا كۆپا كەنداڤی ژ دەرڤەیی یاریگەها خوە بكەت دەمێ دبیتە مێڤانا یانەیا سترە یا بەحرینێ ژ چارچووڤەیێ كۆما ئێكێ بكەت.
زاخۆ گەشبینە بۆ سەركەڤتنا دویێ
تیما كوڕێن خابووری گەشبینە سەركەڤتنا دویێ د كۆما خوە دا بینت پشتی د یارییا ئێكێ دا ئەوا بەری سەركەڤتی ل سەر ئەلقادسیە یا كۆیتێ ب 3-1 گۆلان، د كۆنفرانسێ رۆژنامەڤانی دا یێ قەتەری ویسام ڕزق ڕاهێنەرێ یانەیا زاخۆ خۆیاكر یارییا ئەڤرۆ ب زەحمەتە بەرانبەر یانەیەكێ دناڤ ئەرد و جەماوەرێ خوە دا بكەت و گۆت: راستە د یارییا ئێكێ دا ب سەركەڤت بووین لێ ئەركێ مە ب سانەهی نابیت ئەڤرۆ، پێشبینی دكەم یارییەكا بهێز بهێتە كرن و گەشبینی دناڤ پێكهاتیێ تیمێ دا هەیە ئەڤرۆ ب ئەنجامەكێ باش و دلخوەشكەر ڤەگەڕینە باژێرێ زاخۆ.
ژ یاریێن دی یێن ئەڤرۆ، كۆما ئێكێ، ئەلقادسیە یا كوێتی – ئەلعەین یا ئیماراتی، كۆما دویێ، ئەلنەهزە یا عومانی- ڕەیان یا قەتەری ئەوا هەشت یانە پشكدارن و هاتینە بەلاڤكرن ل سەر دو كۆمان، دو یانە ژ هەر كۆمەكێ دێ دەربازبتە چارگۆشەیا زێرین، قارەمانا وەرزێ بۆری یانەیا دهۆكێ بوو.
هەژی گۆتنێ یە قارەمانا كۆپا كەنداڤی دێ سێ ملیۆن دۆلاران وەرگریت، خودانا رێزا دویێ دێ ئێك ملیۆن دۆلاران وەرگریت، باشترین یاریزانێ كۆپا دێ 50 هزار دۆلاران وەرگریت، باشترین گۆلپارێز دێ خەلاتێ 50 هزار دۆلاران وەرگریت، گۆلكەرێ قارەمانیێ ژی دێ 50 هزار دۆلاران وەرگریت.
هەر یانەكا پشكدار دێ سێ هزار دۆلار بۆ هێنە مەزاختن، ئەو یانەیا دەربازبیتە قۆناغا پێش دووماهیێ- چارگۆشەیا زێرین- دێ 100 هزار دۆلار بۆ هێنە دان.
