بۆ ڤاڤارتنێن مۆندیالا جیهانی حەفت یاریزانێن كوردستانێ بۆ هەلبژارتیێ ئیراقێ دخوازكرن
قەیس وەیس:
فدراسیۆنا بەروەخت یا باسكێت بۆلا ئیراقێ 22 یاریزانێن سەرەكی یێن هەلبژارتیێ خوە بۆ كۆمبوونەكا تایبەت داخواز كرن پشتی یێ ئەمریكی ڕاهێنەرێ نوو یێ هەلبژارتیێ ئیراقێ مازا تراگ ناڤێن وان بۆ پێكهاتیێ تیمێ ڕاگەهاندی ژ وانا حەفت یاریزانێن كوردستانی نە.
ل دووڤ لیستەیا هاتییە بەلاڤكرن ئەو هەر حەفت یاریزانان ئەو ژی، فەرید ڕەعدی، محەمەد عەبدولخالق، موراد عەلی، دیار ئەحمەد محەمەد عەلی، ڕێكان عوسمان و زنار هشیار د ناڤ لیستێ دا نە ئەوا ب بەرهەڤبوونا كادرێ ڕاهێنانێ بوویە، داخوازكرنا وان ژبۆ مەرەما گەنگەشە ل سەر بەرهەڤیێن هەلبژارتیێ ئیراقێ بۆ ڤاڤارتنێن مۆندیالا جیهانی و پشكداری د كۆپا ئاسیا دا ئەوا دهێتە چاڤەڕێ كرن هەڤڕكیێن وێ ب شێوەیێ كۆم ل ناڤەڕاستا كانوونا ئێكێ یا بهێت دەستپێبكەن.
ژلایەكێ دووڤە جوتیار عەلی ڕاهێنەرێ هاریكار یێ یانەیا زاخۆ ژلایێ فدراسیۆنا بەروەخت یا باسكێت بۆلا ئیراقێ ڤە هاتییە داخوازكرن دگەل كادرێ ڕاهێنانێ یێ هەلبژارتیێ ئیراقێ كار بكەت، ئەڤچەندە ژی هات دەرئەنجامێ شیایی دگەل تیما خوە یا ل سەر ئاستێ لاوان ڕێزا سێیێ ل سەر ئاستێ ئیراقێ بینن و ببیتە ئێك ژ باژترین ڕاهێنەرێن گەنج یێن دخولێ دا بگەهیتە ڤێ ڕێزبەندیێ.
ل دووڤ گوهۆڕینا نوو یا كادرێ ڕاهێنانێ هەر ئێك ژ سامر موستەفا- راهێنەرێ بەرێ یێ یانەیا دهۆك- بوویە هاریكارێ ڕاهێنەرێ هەلبژارتیێ ئیراقێ، سەعید ئەحمەد ڕاهێنەرێ لەشسڤكیێ و حەمزە عوبێد- ڕاهێنەرێ پێشتری سامر موستەفا یێ یانەیا دهۆك- بوویە ڕیڤەبەرێ هەلبژارتیێ ئیراقێ.
بۆ زانین وەرزێ ئەڤ سالە یێ خولا نایابا ئیراقێ دهێتە چاڤەڕێ كرن پشتی هەلبژارتنێن گشتی یێن فدراسیۆنا باسكێت بۆلا ئیراقێ بهێتە دانان و دهێتە چاڤەڕێ كرن ل ئێكی چریا دویێ یا بهێت دەستپێبكەت.
