ئـالایـێ كـوردسـتانـێ هێمایێ ئێكرێزیـێ و خـۆ نـەچەمـاندنـێ یە
سەفین حەمید خواستی
ئالایێ كوردستانێ داكو هەر بەرز و بلند بمینیت؛ پێشمەرگەی خۆ كرە قوربان و خوینا خۆ ژبۆ نەچەماندن و بەرزكرنا ئالایێ كوردستانێ و پاراستن و ئاڤەدانكرن و ئازادیا كوردستانێ و گەلێ كوردستانێ رێشتیە، ژ هەبونا ئالای تاكو نوكە گەلەك سەرۆك و رێبەرێن نەتەوا كورد؛ ئالایێ پیرۆزێ كوردستانێ وەرگرتیە و بلندكریە و دەست بۆ دەستی هەتا نها، ئالایێ كوردستانێ رەنگ و هێما و واتایێن جودا جودا هەنە، رۆژەكا تایبەت ل پەرلەمانی كوردستانێ بۆ هاتیە دەستنیشانكرن.
هەر ل دەستپێكا شارستانیەتا كوردستانێ كو مللەتێ كورد وەك نەتەوە لسەر ژیایە و هەست كریە كو كوردستان وەلاتێ وانە، خۆیایە هەر نەتەوەكێ هێماین پیرۆزێن خۆ هەنە تایبەت ئالا، مللەتێ كورد وەكو هەمی مللەتان ب درێژاهیا دیرۆكێ ئالایێن جودا هەبووینە، لێ ژبەر گەلەك ئەگەران نەماینە بەلێ ئالایێ كوردستانێ هەر ل دەستپێكا (١٩٢٠) هەتا نها هێمایێ كوردستانا مەزن دهێتە نیاسین، ژبەر كو سەركردەیێن هەر چار پارچێن كوردستانێ و خەلكێ ل دەرڤەی وەلاتی قوربانی و خوین ژبۆ بەرزكرنا ئالای داینە و چونكو ئالا سەروەریا مللەتی یە، بێ ئالا مللەت دهێتە بەرزەكرن، واتە یا رەنگ و هێمایێن ئالایێ كوردستانێ كو ژ چار رەنگان هاتیە دروستكرن و هەر رەنگەكێ واتایێن جودا جودا و تایبەت هەنە.
سۆر: هێمایێ شۆرشگێریێ و خوینا شەهیدێن مللەتێ كوردە ژبۆ خاترا ب دەستڤەئینانا مافان.
سپی: هێمایێ ئاشتی و ئارامیێ یە، ژبەر كو مللەتێ كورد بەردەوام ئاشتیخوازە.
كەسك: ژ سروشتێ كوردستانێ هاتیە و هێمایێ ژیانێیە.
زەر : بیست و ئێك تیشكێن رۆژێ د ناڤ ئالای دا ب مەبەستا ٢١ ئادارێ كو رۆژا جەژنا نەتەوا كوردە.
ئالایێ كوردستانێ ژ لایێ سەید زادە فاتمە حوسێنی ژنا تێكۆشەرا خەلكا مهابادێ یە ئێكەمین كەس بوویە دەستێ خوە ئالایێ كوردستانێ دروویە، ئالایێ كوردستانێ شۆڕەشا رزگاریخوازە، ئێك ژ بۆ ئێكی ئالا هەلگرتیە، هەتا كو ل رۆژا ١٩٤٦/١/٢٢ ل رێورەسمێن راگەهاندنا كۆمارا كوردستانێ ل گۆرەپانا چارچرا ل باژێری مهاباد (سابلاغ) بۆ جارا ئێكێ ب فەرمی بلندكریە و بوویە هێمایێ كۆمارا كوردستانێ، ل سالا1957 ل (كۆنگرێ نەهێلانا داگیركەریێ) ل ئەسینا پایتەختێ یۆنانێ رەوشەن بەدرخان ب نوونەراتیا كوردان پشكدار بوو، هەر هەمان ئالا بلندكربوو، مووسا عنتر دبێژیت: مە رێكخستنەك نهێنی ئاڤاكر ل سالا 1957 و مە ئەندامێ رێكخستنا سیاسی نهێنی نەتەوەی دەستێ خۆ دانا سەر وی ئالای كو ل سالا 1920 هاتیە دروستكرن.
ئالایێ كوردستانێ د هەرێما كوردستانێ، پشتی راپەڕینا سالا 1991 ل باشۆرێ كوردستانێ و ئاڤاكرنا حوكمەت و پەرلەمانێ كوردستانێ ل سالا 1992، هەر هەمان ئالا بوویە و هەتا ل (11- 11-1999) قانوونا ئالایێ هەرێما كوردستانێ دەركەفت و ب فەرمی و ل دویڤ یاسایێ ئالایێ نها هەی كەسك و سۆر و سپی و 21 تیرۆژك ژی نیشانا نەورۆزێ تێدا هەنە هاتە باوەرپێكرن، دویڤدا پەرلەمانێ كوردستانێ ل سالا 2009 رۆژا 17 ـ 12 وەكو رۆژا ئالایێ كوردستانێ دیاركر و هەر سال ل سەر ئاستێن بلند رێز ل ئالای دئێتە گرتن، تایبەت ل قوتابخانە و زانكۆ و پەیمانگەه و هەمی جهێن پەروەردەی، ب مەراسیم و رێزگرتن و بەرزراگرتن و ستران و هۆزان پێ گۆتن دئێتە ساخكرن، هەم د ڤێ رۆژێ دا ل مهاباد ئەڤ ئالایە هاتیە بلندكرن و هەر د هەمان رۆژ دا ب دەستێن داگیركەران هاتیە ئینانە خوار ل مهابادێ، بەلێ سوپاس بۆ خودێ ئینانە خوار ل مهاباد نەبوو داوی بۆ ئالایێ كوردستانێ بەلكو بویه دەستپێكەك و تیرۆژكێن رۆژێ ل هەر چار پارچێن كوردستانێ بەلاڤبووینە و هەر كوردەكێ دەرڤە ژی رێزێ ل ڤی ئالایی دگریت و ئەڤ ئالایە ل سەرانسەرێ جیهانێ وەك نیشانەك بۆ كوردان هاتیە نیاسین.
ژبۆ خاترا ڤێ چەندێ مللەتێ كورد ب گشتی هەمی تاكێن خۆڤە ڤی ئالای ب پیرۆز دزانن و ئامادەنە گیانێ خۆ بكەنە قوربان ژ پێخەمەت بەرز و بلندكرنا ڤی ئالای، چونكی ئالا هیمایێ شەرەف و كەرامەتێ یە و هێمایێ خۆ نەچەماندنێ یە و هێمایێ ئێكرێزی و ئێگرتنێ یە.
