کاریگەریێن درامایێن تورکی ل سەر خێزانا کوردی
عاصمە فەخری
د جیهانا سەردەم دا و پێشکەفتنا تەکنەلۆژیایێ دا وەڵات جەنگی ب چەکی ناکەن، بەلکو شەڕی ب ڕێیا دراما و فلمێن سینەمایی دکەن، ددەمێن دێرین دا ئەگەر ب ڕێیا جەنگی و داگیرکرنێ وەڵات شیابان وەڵاتەکێ دی داگیربکەن دشیان بچنە دناڤ باژێر و گۆندان دا بەلێ د ئەڤرۆکە دا ژبەر پێشکەفتنا تەکنەلۆجیایێ و بکارئینانا پلاتفۆرمێن دیجیتال شەری ب ڕێیا فلم و درامایان دکەن و دشێن بهێنە دناڤ هەر مالەکێ دا و هەتا دناڤ تەلەفۆنێن هەر تاکەکی دا ، بەرهەمێن خوە ژ دراما و فلمان ژ ئەوا وان دڤێت وێنەدکەن و نیشانی جیهانێ و گەلێ مە ددەن.
کاریگەریێن نەرێنی یێن درامایێن بیانی یێن دوبلاژکری و ب تایبەتی درامایێن تورکی لسەر ڕەوشت و بهایێن خێزان و جڤاکێ کوردی چنە؟
چەندین سالن هندەك کەنالێن مە یێن خۆمالی درامایێن تورکی وەردگێڕن بۆ زمانێ کوردی و لسەر تیڤییێ پەخشدکەن، بێی هەلگرتنا هیچ بەرپرسیارەتییەکێ و ل بەرچاڤ وەرگرتنا ڕەوشت و داب نەریتێن کوردەواری و ئاینی، کیژ درامایا تورکی ژ هەموویان درێژتر و بێ ڕامانتر و هەلگرا چەندین پەیامێن نەجوان و دویری ڕەوشتێ کوردەواری دێ ئەوان بەردەست و بەرچاڤ و پەخشکەن، یا نەخوەشتر نە بتنێ تاك بەرێخوەددەتێ بەلکو خێزان هەموو پێکڤە دبینن، ب شێوەیەکێ ئێکسەر و هندەك جاران ژی ب شێوەیەکێ نەئێکسەر کارتێکرنا نەرێنێ لسەر بهایێن خێزانا کوردی یا ڕەسەن دکەن، دگەل دیارکرن و دیتنا چەندین دیمەنێن نەجوان، یا هێشتا کەمباختر تەماشەڤانێن ڤان درامایان دایکن! دایکە ژنە نیڤا جڤاکی یە، خوە و نیڤا دی ژی یا جڤاکی پەروەردەدکەت، ئەرێ ئەگەر پڕانییا دایکێن کورد درامایێن وان یێن دلخواز ئەڤ جۆرە درامایێن تورکی بن پاشەڕوژا ئەڤی مللەتی بەرەڤ کیڤەیە؟
ئەرێ کی بەرپرسە ژ ئەڤێ چەندا چێدبیت؟
بوچی هەتا نوکە ئەڤ کەنالە نەهاتینە گرتن یان هەر چنەبیت هندەك دیمەن ژ وان درامایان نەهاتینە سانسۆرکرن؟
ژ ئەگەرێ ڤان درامایان ناڤێن چەند کەسایەتی و هۆنەرمەند و ئەکتەرێن تورکی کوردان زاڕۆکێن خوە پێ ناڤکرینە؟ ناڤێ چەند مارکێت و خوارنگەھ و جهێن دناڤ بازاری دا ناڤێن تورکی نە؟
ئەڤ جورە درامایێن تورکی کارتێکرنەکا نەرێنی لسەر خێزان و جڤاکێ کوردی دکەت دەمێ خێزان پێکڤە بەرێخوەددەنە درامایێن تورکی دەما زاڕۆک یان سنێلە هندەك ئاخفتن و دیمەنێن ڕومانسی دبینت دناڤ مال دا ئاسایی دهێنە دیتن د ئەنجامدا دێ هزرکەت ئەڤ چەندا ڕوویددەت یا دروستە لدویڤ ڕەوشت بهایێن خێزان و جڤاکێ کوردی و ئەوژی دێ ئەوان ئاخفتن و ڕەفتاران دناڤ جڤاکی دا دوبارەکەت .
پتریا وان درامایێن تورکی یێن دهێنە کوردیکرن و ژلایێ کەنالێن خومالی ڤە دهێنە پەخشکرن دگەل ژیان و ڕەوشت و داب و نەریتێن کوردەواری هەڤدەم دگەل ئاینی ناگۆنجن، ئەڤ جورە درامایە وەکو ئێشەکا ڤەگر و کۆژەکن خێزانان ژناڤدبەن و جڤاکی تووشی بەڕەلایێ دکەن لژێر ناڤێ ئازادییێ.
ئەڤە ددەمەکی دایە بەردەوام گوندێن مە یێن سەرسنوری دهێنە توپبارانکرن ژلایێ وەڵاتێ تورکیا ڤە و کۆچکرنا خەلکێ ئەوان گۆندان ژ بۆ پاراستنا گیانێ خوە و مالباتێن خوە….و سەرباری ئەڤێ چەندێ هەموویێ ژی بۆچی هێشتا بەربەڵاڤترین و دلخوازترین جورێ درامایێ دناڤ جڤاکێ کوردی دا درامایا تورکی یە!؟
پشتڕاستی ڤە بەرسڤ نەڕەوشەنبیری و نەهوشیارییا تاك و جڤاکێ مە یە، و ب مخابنی ڤە ئەم کورد مللەتەکێ بیانی پەرێسین هەردەم ئەو کەس و ئەو تشتێ کەسەکێ بیانی دروستکری لدەف مە پتر بها هەیە و زێدەتر ئەم تەماشەیی کارێ وان دکەین ژ یێن نافخوەیی بێی گۆهدان ب ناڤەڕۆکان ئەرێ ناڤەڕۆکا کیژ درامایێ باشترە؟ ئەرێ کیژ دراما پتر نێزیکی ژیان و جڤاکێ مەیە؟ ئەرێ هندەك ژ وان دیمەنێن ددرامایێن تورکی دا دبینینن هەکە ددرامایەکا کوردی دا مە دیتبان دا هەمان هزر مە هەبیت؟ دا هەمان کارڤەدان مە هەبیت؟ ئەرێ دووبارە و سێ بارە ئەم خێزان پێکڤە دا بەرێخوەدەینە ئەوێ درامایا کوردی؟ ئەرێ ئەگەر دیمەنێن ڕۆمانسی د ددرامایەکا کوردی دا هەبن جڤاکێ مە خێزان پێکڤە دێ تەماشەکەت و لدەف وان ئەڤ ڕەوشە دێ ئاسایی بیت هەر وەکی وان درامایێن تورکی یێن تەماشەکری و تەماشەدکەن؟ یان ژی ئەو دێ هندەك ناڤ و ناسناڤان لدویڤ هزر و تێگەهشتنا خوە لسەر ئەکتەرێن بەشدار د ددرامایێ دا و دەرهێنەرێ درامایێ دانن؟
لدەف من یا دروست نینە خویشکامن یان کچامن خوەشتڤیێ خوە هەبیت، هەڤدەم رۆژانە دا د مال دا درامایەکا دهێتە دیتن ژنا ب هەڤژین خوەشتڤیێ خوە یێ هەیی؟
بۆ کوردیکرنا هەر درامایەکا تورکی ل سەر کەنالان پێدڤییە پارەیەکێ مەزن بمەزێخن بۆ کڕین و وەرگێڕانا وان، ئەگەر ل شوینا کڕین و وەرگێڕانا هەر درامایەکا تورکی ئەو بوودجەیە هاتبا تەرخانکرن و مەزاختن بۆ بەرهەمئیانا درامایەکا کوردی ئەرێ د ئەڤان سالێن بوری دا و هەتا نوکە دا چەند پێنگاڤان درامایا کوردی پێشکەڤیت؟ ب خوەیاکرنا ئاریشەیێن جڤاکێ مە دگەل دیرۆك و زمان و ژیان و سرۆشت و کەلتوورێ کوردییێ ڕەسەن ئەڤە هەموو ل لایەکێ ژ لایەکێ دیتر ڤە دشییاین ڕیکلامێ بۆ بەرهەمێن خۆمالی بکەین مینا تەحینا ئامێدییێ، سێڤێن بەروارییا، هنارێن ئەرمشتێ، وباجان سۆرکێن شارەزوور….. هەردیسان سرۆشتێ جوان و بالکێشێ کوردستانێ ژ چیا و دۆڵ و نهاڵان نیشانبدەین.
