براتـیا گـەلان د نـاڤبەرا درووشمان و راستیان دا
ئازاد بەرواری/ ئەلمانیا
ل ژیانا رۆژانەدا، مرۆڤ خوزیكا ب وان كەسان دبەت یێن كو هەڤاڵەك هەی ل دەمێ تەنگاڤیان دا، ل پێشیێ ب ئەركێ خوو ڕادبیت ب سەر و ماڵ و حالێ خوڤە هەولددەت بەڕەڤانیێ بكەت هەتا كو تەنگاڤی دەرباز دبیت، لێ پشتی هینگی مافێ هندێ ژی ددەت خوە كو شیرەتان بكەت و ڕەخنە و كێمانسیان بینیتە زمان، داكو چ جارێن دن ئەڤ پێشهاتە روی نەدەن و ئەگەر ڕویدان ژی مرۆڤ باشتر بەرهەڤیا خوە بۆ بكەت.
ئەڤ ڕویدانێن ل رۆژئاڤا هاتینە پێش یاكو ئەم دشێین وەك كارەسات دەستنیشان بكەین، گەلێ كوردستانێ ل ناڤخۆ و ل سەرانسەری جیهانێ بوونە ئێك دەنگ و ئێك دل و سینگێ خۆ كرنە چەپەر بۆ پاراستنا رۆژئاڤا. لێ نوكە ژی دەمێ هندێ هاتیە كو سەدەمێن وان پێشهاتان ل ڕوانگەها ستراتیجیا بزاڤا ئازادیخوازیا كورد ل سەرانسەری كوردستانێ بهێتە هەلسەنگاندن و بۆ گەلێ كوردستانێ بەرچاڤ ڕۆنیەك زەلال بهێتە دەستنیشانكرن. ئەرێ گەلێ كوردستانێ چ دڤێت و ئەڤ هندە قوربانی و مالوێرانیە سەخمەراتی چ دهێتە دایین؟.
ل گەلەك وەرچەرخانێن گرنگ یێن كو ڕاستەوخۆ گرێدای چارەنڤیسا گەل بیت، پێدڤیە پارت و رێكخستنێن سیاسی ل شوینا خۆ ب بریكارێ گەل بزانن! بەروڤاژی گەل ب مامۆستایێ خوە بزانن. ئەڤ سلۆگانا نوكە ل باكوور و ل ڕۆژئاڤا دهێتە بلندكرن ل ئالیێ لایەنكێ سیاسی چ ب زانا بوون یان ژی ب نەزانی، پتر ل بەرژەوەندیا هێزێن دەسەلاتدارێن تورك و فارس و عەرەبانە. و ئەگەر ل خۆ نەزڤڕن؛ ڕەنگە ببیتە پەتایەك ل سەرانسەری كوردستانێ بەلاڤ ببیت، لەوما ب دیتنا من گەلەك گرنگە ب زویترین دەم كۆنفڕانسەك ل چارچووڤەیێ ئەكادیمیا سیاسی بهێتە گێڕان ل دەرڤەی ئاڕاستەیا پارتێن سیاسی، كەسێن ئەكادیمی و رەوشەنیریێن هەر چارپارچێن كوردستانێ ڤێ بابەتێ گەنگەشە بكەن بڕیارەكا سیاسیا ئێك دەنگ بدەن و ەك مانیفاستۆیەك گشتگیر ببیتە بەرهەڤیەك بۆ گێڕانا كۆنگرەیەكا نەتەوەیی تێدا هەمی پارتێن سیاسیێن كوردستانێ تێدا پشكدار بن و ئەنجامێن وێ وەك شیرەتێن بنگەهین بۆ ئەولەكاریا نەتەوەیی بهێتە پەیڕەو بكەن و مافێ خۆ ژێ لادنێ نەبیت. دەربارەی برایەتیا گەلان ل چارچووڤەیێ روانگەها كوردستانی؛ نەك ل روانگەها بەرژەوەندیا تورك و فارس و عەربێن یێن نەتەوەپەرستێن هەلخەڵەتێنەر.
پشتی جەنگێ جیهانیێ ئێكێ و دانا پیلانێن سیاسی و جوگرافی ل دەڤەرا رۆژهەلاتا ناڤین یاكو كوردستان تێدا هاتیە پارچەكرن، رژێمێن نەژادپەرستێن تورك و عەرەب و فارسی ل سەد سالێن بووری؛ دەلیڤەیەكا زێڕین هەبوو كو بشێن ب ئنیەتەكا پاقژ براینیا گەلان جێبجێ بكەن كو تێدا ل گەل گەلێ كورد و نەتەوێن دن ب وەكهەڤی بژین، لێ مخابن ئەڤ سەد سالێن بووری بارا گەلێ كورد تەنێ ڕۆندك و كوشتن و ئەنفال و ..هتد بوو، ئەڤ تێ واتا هندێ كو برایەتیا گەلان ل چارچووڤەیێ ڤان دەسهەلاتێن شۆڤینی بڕیارەك شاشە و نە د بەرژەوەندیا گەلێ كوردستانێ دایە.
لێ گەلێ كوردستانێ ل باشوور ل چارچووڤەیێ دەولەتەك فیدڕال وەك ڕێڤەبەر ئیسپات كر ل كوردستانێ و هەروەسا بۆ جیهانێ ژی كو كوردان ئیمان ب برایەتیا گەلان هەیە ل چارچووڤەیێ دیتنا گەلێ كورد وەك ڕێڤەبەر و خوەدی دەسهەلاتیا كوری دا. ل كوردستانا مە یا ئیرۆ دا ل باشوور مافێ هیچ كەمە نەتەوەك یان ئاینەك نەهاتیە بنپێكرن و هەمی گەلێ كوردستانێ ب وەكهەڤی دژین، ئەڤ ئەزموونا كوردستانێ ل باشوور دبە كو ببیتە نموونەیەك بۆ پارچێن دن یێن كوردستانێ. و گەلێ كوردستانێ ئێدی هشیارە و جارەكا دی وێ سیستەما هەلخەلەتێنەر قەبوول ناكەت كو ل ژێر دەسەلاتەكا مەركەزی ل ژێر سلۆگانا برایەتیا گەلان یا هەلخەلەتێنەر بهێتە بڕێڤە برن. هەر كەسەكێ وەسا هزر بكەت كو ل چارچووڤەیێ ڕژێمێن توندڕەو یێن ئاماژە پێكری دێ برایەتیا گەلان هێتە چەسپاندن و پراكتیزەكرن، یان گەلەك سوود ژ مێژوویا سەد سالێن بووری وەرنەگرتیە، یانژی ب زانابوون بۆ بەرژەوەندیا وان ڕژێمان خزمەتێ دكەت. ئەڤ چەندە ژی ژ لایێ گەلێ كوردستانێ ڤە ناهێتە قەبوولكرن.
بەلێ بۆ برایەتیا گەلان ل چارچووڤێ دەسەتهەلاتەك فیدڕالی و نەخێر بۆ دوبارەكرنا ئەزموونا شكەستخواریا برایەتیا گەلا ل گۆرەی دیتنا شۆڤینیا مەركەزی.
