بەردەوامیا شەڕی دێ رۆژهەلاتا ناڤین تووشی کارەساتێن مەزن کەت
بسپۆرەکێ کاروبارێن سیاسی دیار دکەت بەردەوامیا شەڕێ نها دێ رۆژهەلاتا ناڤین تووشی کارەساتێن مەزن کەت، چونکی ئیران مەرجێن ئەمریکا بۆ ئاگربەستێ قەبوول ناکەت و خوە بۆ شەڕەکێ دەمدرێژ بەرهەڤ کریە و ئەو یەک دێ بیتە ئەگەرێ روودانا کارەساتێن مەزن.
فەهیم تاشتەکین بسپۆرێ کاروبارێن سیاسی دیار دکەت، شەڕ گەهشتیە قووناغەک گەلەک مەترسیدار، چونکی بەری نها ئەمریکا و ئسرائیلێ وەسا هزر دکرن هەکە رێبەرێ ئیرانێ و هندەک ژ فەرماندارێن مەزن یێن ئیرانێ بکوژن دبیت رژێم ژناڤ بچیت یان ژی خەلک ل دژی دەستهەلاتێ دەست ب خوەنیشادانان بکەن، لێ مە دیت تشتەک وەسا روو نەدا و نها ژی ترامپ گەفا وێرانکرنا ژێرخانا ئابووری یا ئیرانێ دکەت و ل هەمبەر دا ئیران ژی دبێژیت ئەو دێ ژێرخانا وەلاتێن رۆژهەلاتا ناڤین ب تایبەتی ژی وەلاتێن هەڤپەیمانێن ئەمریکا وێران کەن و گۆت: (ئەو یەک دێ رۆژهەلاتا ناڤین بەر ب کارەساتێن گەلەک مەزن بەت، چونکی هەر ژ نها ڤە قەیرانا وزێ ل گەلەک وەلاتێن جیهانێ دروست بوویە، بهایێ کەلوپەلێن خوارنێ گران بووینە و بەردەوامیا شەڕی دێ کاریگەریا خوە ل سەر هەموو کەرتێن ژیانێ کەت).
ناڤهاتی ئەو یەک ژی دیار کر، نها ئیران شەڕی بۆ مانا خوە دکەت، بەرپرسێن ئیرانێ یا ژ دەستێ وان دهێت ئەنجام ددەن دا رژێما ئیرانێ ژناڤ نەچیت، د دەمەکێ وەسا دا ئەمریکا و ئسرائیل ژی ناخوازن وەسا شەڕی ب دووماهی بینن، ئەمریکا دڤێت هندەک تشتان بدەستڤە بینیت و سەرکەفتنا خوە راگەهینیت و ل ئالیێ دی فشارێن ئسرائیلێ ژی ل سەر ترامپی گەلەک زێدە بووینە و ئسرائیلێ دڤێت شەڕ ب دژواری بەردەوام بیت، ژ بەر ڤێ یەکێ ژی د رەوشا نها یا ئالۆز دا گەلەک زەحمەتە بەحسێ راگرتنا شەڕی ژی بهێتە کرن، چونکی هەر دوهی وەزارەتا دەرڤە یا ئیرانێ دیار کر وان ١٥ خالێن کو ترامپی دیار کربوون رەت کرینە و خوە بۆ هەر پێشهاتەکێ ژی بەرهەڤ کرینە، ئانکو ب کورتی ئیرانێ نەڤێت چو داخوازیێن ئەمریکا قەبوول بکەت.
بسپۆرێ کاروبارێن سیاسی د پشکەکا دی یا ئاخڤتنا خوە دا ئەو یەک ژی دیار کر، براستی ژی نها رەوشا رۆژهەلاتا ناڤین گەلەک خرابە و کاریگەریا خوە ل سەر جیهانێ ژی کریە، هەکە ترامپ بزاڤا هنارتنا سەربازان بۆ داگیرکرنا گزیرتا خارک ل ئیرانێ بکەت دێ وی دەمی رەوشەکا نوو هێتە پێش، چونکی نها هەموو گرۆپێن چەکدار یێن سەر ب ئیرانێ ل رۆژهەلاتا ناڤین یێ شەڕی بۆ مانا ئیرانێ دکەن، د دەمەکێ وەسا دا دێ هەموو وەلاتێن رۆژهەلاتا ناڤین بنە مەیدانا شەڕەکێ نوو و بێگومان دێ ئەو یەک بیتە ئەگەرێ مالوێرانیێ بۆ هەموو رۆژهەلاتا ناڤین.
