سەیرانی و ژینگەهـ
عاصمە فەخری
ژینگەه، جهێ ژیانا زیندەوەرانە ژ مرۆڤان و هەتا رووەك و گیانەوەران، ب پیسكرنا وێ مە ژیان نە بتنێ ل خوە بەلكو ل ئەوان ژی تێكدایە، لەورا پاراستن و پاقژ ڕاگرتنا ژینگەهێ ئەركەكێ ڕەوشتی و نیشتیمانی و ئایینی یە.
پرسیار ل ڤێرێ ئەوە ئەم جڤاكەكێ ئولدار و خۆدان ڕەوشتێن جوانین و حەز ژ وەلاتێ خوە دكەین، دگەل ئەڤێ چەندێ بۆچی ئەم ژینگەها خوە پیس دكەین و قەشەنگیا وێ تێكددەین ب هاڤێتنا بەرمایكێن خۆ؟ بۆچی پتریا وەلاتییان دناڤ باژێران دا و ب تایبەتی كو نوكە دەمێ سەیرانایە سەیرانی بەرمایكێن خۆ ل شوینا بكەنە دناڤ زەرف و سەلكێن بەرمایكان دا ل جهێ خۆ دهێلن؟
هندەك ژی دكەنە دناڤ زەرفان دا بەلێ هەر د جهدا دهێلن د ئەنجام دا دگەل هاتنا بایەكێ بهێز یان ژی گیانەوەر ئەوان بەرمایكان تێكددەن و هوسا جارەكا دی ژینگەه پیس دبیتە ڤە و دەرئەنجامێ پیسبوونا ژینگەهێ، هەوایێ ل دەوروبەرێن مە ژی پیس دبیت و ئەوی هەوایێ پیس ب ڕێیا وەرگرتنا هەناسەدانێ و هەلكێشانێ بۆ ناڤ سیهێن مە دچیتە دناڤ جەستەیێ مە دا و نەخۆشی ژێ پەیدادبن، بەلێ د سەر ڤێ چەندێ ڕا ژی هێشتا وەلاتی د ئامادە نینن ژینگەهێ پاقژ ڕابگرن هەتا هەكە بابەت ساخلەمییا لەشێ وان ب خۆ ژی بیت.
بێگۆمان پیسكرنا ژینگەهێ ژی دزڤڕیت بۆ نە ڕەوشەنبیرییا سەیرانی و وەلا تییان و هەست نەكرن ب بەرپرسیارەتیێ بەرانبەری وەلاتی و سرۆشتێ جوانێ كوردستانێ و ژینگەهێ و هەتا ساخلەمیا وان و دەوروبەرێن وان ب خۆ ژی.
ب دیتنا من پێدڤییە وانەك ل پرۆگرامێن خواندنێ بهێتە زێدەكرن ب ناڤێ ژینگەه پارێزی ل باخچەیێن زاڕۆكان، هەروەسان قوتابخانان ب تیوری و پراكتیكی بهێتە خواندن و هەتا ل كۆلیژان ژی بەردەوام بیت، فەرە ڕەوشەنبیرییا پاراستنا سرۆشت و ژینگەهێ ل دەف نڤشێ نوو پەیدا ببیت و ببیتە نەریتەك ل دەف وان، و بۆ نڤشێن دووڤدا بهێتە ڤەگۆهاستن، دا سرۆشت و ژینگەها مە پاراستی بمینن و پاراستنا پاڤژیا ژینگەهێ ئەركە ل سەر ملێن هەر تاكەكێ جڤاكی، ژبەركو ب پیسبوونا وێ نەخۆشی ژێ پەیدادبن و ئەڤ نەخۆشیە بێ جۆداهی دێ هەموو تاكان ڤەگریت و هەبوونا ژینگەهەكا پاقژ شانسەكێ ژیانەكا ساخلەم پێشكێشی مە مرۆڤان دكەن دا ب ساخلەمی و دیتنا دیمەنێن سەرنجڕاكێش بژین.
