وەرزش کاریگەرترین دەرمانێ سروشتییە بۆ دەروونی
زاخۆ، دلۆڤان هالۆ:
بسپۆرەکێ نەخۆشیێن دەروونی د دیدارەکێ دا بۆ ڕۆژنامەیا ئەڤرۆ دیار کر کو ئەنجامدانا ڕاهێنانێن وەرزشێ نە بتنێ بۆ بهێزکرنا ماسۆلکەیان و کێمکرنا کێشا لەشییە و گۆت؛ بەلکو وەرزش ئێکە ژ کاریگەرترین دەرمانێن سرۆشتی بۆ ساخلەمیا دەروونی.
بسپۆرێ نەخۆشیێن دەروونی د. ڕێبوار غەریب، دیار کر کو دەمێ لەشێ مرۆڤی لڤینان ئەنجام ددەت، مێشكێ مرۆڤی زنجیرەیەکا کارلێکێن کیمیایی ئەنجام ددەت کو ڕاستەوخۆ کاریگەریێ ل سەر دەروون و مەزاج و هزر و بیرێن مرۆڤی دکەت و گۆت؛ وەرزشێ چەندین کاریگەریێن گرنگ ل سەر دەروونێ مرۆڤی هەنە وەکو کێمکرنا دوودلیێ و فشارا دەروونی و زێدەبوونا باوەری بخۆبوونێ.
د. ڕێبوار دیار کر ژی، ئەنجامدانا ڕاهێنانێن جۆراو جۆر یێن وەرزشێ کوالیتیا خەوا مرۆڤی باشتر دکەت، و دبیتە ئەگەرێ ڕوو ب رووبوونا نەخۆشیان، ئانکو بەرگریا لەشێ مرۆڤی بهێز دکەت، چونکی وەکو دەرمانێن دەروونی کاریگەریا خۆ هەیە و گۆت؛ هەروەسا وەرزش شیانێن مەژی و تەرکیزێ ل دەف مرۆڤی بهێز دکەت، و دبیتە ئەگەرێ دوورکەفتنا مرۆڤی ژ هزرێن نەرێنی.
بسپورێ نەخۆشیێن دەروونی د بەردەوامیا ئاخفتنێن خۆدا دیار کر، ئەنجامدانا ڕاهێنانێن وەرزشێ مێشکێ مرۆڤی مژوولی چالاکیێن ئەرێنی دکەت، و بیردانکا مرۆڤی بهێز و چالاك دکەت و گۆت؛ هەروەسا تەرکیزا مرۆڤی بهێزدکەت ب تایبەت ل دەمێ کارکرنێ یان خواندنێ، و مەژیێ مرۆڤی ژ نەخۆشیێن پیربوونێ دپارێزیت بتایبەت نەخۆشیا ئەلزەهایمەرێ ژبیرکرنێ.
