پارێزگارێ دهۆكێ قووناغا ئێكێ یا پڕۆژەیێ ستراتیژی یـێ ئاڤا خانكێ ڤەكـر
ب ئامادەبوونا د. عەلی تەتەر، پارێزگارێ دهۆكێ و د. نەوزاد عەبدوللا، بەرپرسێ لقێ ئێك یێ پارتی و دژوار شەوكەت، دەڤەردارێ سێمێلێ و هەژمارەكا بەرپرسێن دام و دەزگەهێن حكومی و حزبی، قووناغا ئێكێ یا پڕۆژەیێ ستراتیژی یێ وەرگرێ ئاڤا خانكێ لسەر بودجەیا پارێزگەها دهۆكێ و ب سەرپەرشتیا ڕێڤەبەریا ئاڤا دەوروبەران هاتە ڤەكرن، پڕۆژە ژ پرەكێ ب درێژاهیا 260 مەتران و ب بلنداهیا چار مەتران ل گەل ئەنتیكەیەكێ ب درێژاهیا 13 مەتر و نیڤان و ب بلنداهیا 24 مەتران پێك دهێت، دشیان دایە د دەمژمێرەكێ دا سێ هزار و 400 مەترێن سێجار یێن ئاڤێ بەرهەم بینیت و ئاڤێ بوو هەژمارەكا زۆرا خەلكێ دەڤەرێ ب شێوەیەكێ ساخلەم دابین كەت.
پارێزگارێ دهۆكێ د كۆنگرەكێ ڕۆژنامەڤانی دا سوپاسیا مەسرو بارزانی، سەرۆكێ حكومەتا هەرێما كوردستانێ كر كو سەرەڕای قەیرانێن دارایی و گڤاشتنێن لسەر حكومەتێ بەردەوامی ب بجهئینانا هەموو جۆرێن پڕۆژەیێن خزمەتگوزاری دایە، ل دەڤەردارییا سێمێلێ ژی 172 پڕۆژە هاتینە بجهئینان، ژ وان ژی: 128 پڕۆژە كەفتینە د خزمەتا گشتی دا و كار لسەر 44 پڕۆژەیان بەردەوامە و گۆت: «د قووناغا ئێكێ یا ئەڤی پڕۆژەی دا ئاڤ بوو ناوچەدارییا خانكێ دێ هێتە دابینكرن و د قووناغا دویێ دا چەندین دەڤەرێن دی دێ ژێ مفاردار بن».
