گفتوگـۆیـا دبـلۆمـاسـی
ئيحسان ئــامێدی
دبێژن ئاخفتنا خۆش و یا نەخۆش ژ دەڤی دەردكەڤیت، و هەنە دەڤخۆشیا وان پتر و ب مرۆڤێن ئەزمان شرین دهێنە نیاسین و هەنە دەڤنەخۆشیا وان پتر و دهێنە نیاسین ب ئەزمان رەش، ل دوماهیێ مرۆڤ وەكو ژیندارەكێ جڤاكی و خۆدان بەرژەوەندیێن هەڤپشك پێدڤی ب پێكڤەیێ و هەڤرایێ یە، ئەڤە ژی ب نیازپاكیێ و دەڤخۆشیێ ل سەر بنگەهێن ساخلەم و دروست چێدبیت.
مرۆڤ دهێتە پەروەردەكرن و دخوینیت دا كو رێبازێن باش و ساخلەم ژێبگریت و ببیتە توخمەكێ باش و چاك و بەرهەمهێنەر و زمانێ دیالۆگێ و دانوستاندنان باشتر بزانیت و بكاربینیت بۆ گەهشتنێ ب مەبەستێن خۆ.
گفتوگو و دانوستاندن ئامرازێن لێكتێگەهشتن و لێكخرڤەبوون و پێكڤە كاركرنا مرۆڤانە، یا باش ئەوە زمانەكێ نەرم و شرین و كارتیكەر و بالكێش بكاربینیت.
مرۆڤ كو هەستدارە ب گۆتنێن نەرم و نازك و خۆش داخباردبیت و ب ئەرێنی سەرەدەریێ دگەلدا دكەت و ب ئاخڤتنێن رەق و هشك پاشڤە دچیت و كارڤەدانێن نەرێنی ژێ چێدبن.
دبلوماسیەت هونەر و زانستێ برێڤەبرنا پەیوەندیێن نێڤدەولەتی و هێزێن سیاسی و رێكخراوانە، گفتوگو و دانوستاندنە بۆ چارەسەركرنا ناكۆكیان و كێشەیان.
دانوستاندن رێبازەكا دبلوماسییە و ستوونەكا بنەكییا سیاسەتێ یە، ئارمانج ژێ پیكهاتنە و رازیكرنا یێ بەرانبەرە، هەروەكو ژێكڤەكرنا ناكۆكیان و ئالۆزیانە ب لیكتێگەهشتن و رێكەفتنان و گەهشتنە ب ئەنجامێن بەرژەوەندیێن ژیكجودا بجهبینیت.
دبلوماسیەت كو دشێت دەرگەهێن گفتوگویان ژبۆ چارەسەریا قەیرانان و بهەڤچووونان ڤەكەت دشێت لێكتیگەهشتنێ پێكبینیت و برێكێن ئاشتیانە كێشەیان چارەسەركەت و هندەك جاران دەمێ ركاتی ل سەر هەلوەستان هەبیت و ئالۆزی ئاسێ دبیت گڤاشتنێن جۆراوجۆر و گەفێن بكارئینانا هێزێ و شەڕكرن ژی دبنە توخمێن دبلوماسیەتێ و گفتوگۆیەكا دیتر.
گەلەك جۆرێن دبلوماسیەتا بەرهەمهێن یێن هەین وەكو یا نێڤدەولەتی و سیاسی و ئابووری و زانستی و تەكنولۆژی وهتد، بەلێ سێ ئاستێن سەرەدەریێ ل گەل خۆ هەلدگریت دبلۆماسیەتا نەرم (الدبلوماسیە المرنە) و دبلۆماسیەتا توند (الدبلوماسیە القاسیە)، و دیبلوماسیەتا ب زۆری (الدبلوماسیە القسریە)، ئەڤان ژی پلەیێن خۆ یێن هەین، و ل دیف بارودوخی و هەلوەستان ئەڤ ئاست و پلەیە دهێنە دەستنیشانكرن و بكارئینان بۆ چێكرن و خوشكرنا پەیوەندیان و چارەسەركرنا كێشەیان.
د بارودۆخێ سروشتیدا دبلۆماسیەت یا نەرمە و ب ئارامی دهێتە برێڤەبرن و ئەڤە د ناڤبەرا دەولەت و رێكخراوێن دۆست ب باشی دهێتە بكائینان و پتریا دەولەتێن جیهانێ یێن سەقامگیر د ڤی ئاستێ دبلۆماسیەتێ دانە، لێ دەمێ كێشە و ناكۆكی هەبن و ركاتی ل سەر هەلوەستا هەبیت وی دەمی دبلوماسیەتا توند دهێتە بكارئینان كو كارتێن ئابلۆقەیا ئابووری و گڤاشتنێن سیاسی و دبلۆماسی و گەفێن لێدانێ دهێنە بكارئینان و ئەڤ ئاستێ دبلوماسیەتێ د ناڤبەرا دەولەتێن عەرەبی ل هەنبەری ئیسرائیلی هەیە و هەكو ب ڤێ ژی پێكنەهاتن و رژدی ل سەر هەلوەستێن هەڤدژ هەبن دێ ئاستێ دبلوماسیەتا ب زۆڕی هێتە بكارئینان ئەو ژی لێدانا چەكداری ژبۆ نەچاركرنا یێ بەرانبەر ل بەر مەرج و داخوازیێن پێكهاتنێ بهێت و دبیت ئەڤ ئاستێ دبلۆماسیەتی ڤێ پێكدادانێ بەر ب شەرەكێ وێرانكەر ببەت یان هەڤسەنگیا هێزێ بگوهۆریت و بەر ب چارەسەریەكێ ڤە ببەت و شەڕێ ئەمریكا ل دژی ئیرانێ و یێ رۆسیا دژی ئۆكرانیا د ڤی ئاستی دایە.
هەلبەت د سیاسەتێ دا بزاڤا دیبلۆماسیەتێ ب نەرمی دەست پێ دكەت تا دگهیتە ئاستێن توند و ب زۆری.
سیاسەتا ئەمریكا ل دژی رژێمێن دكتاتۆریێن عەرەبی و كۆمارا ئیرانێ و حوكمەتا ڤەنزوێللا ل هەر سێ ئاسان دا دەربازبووینە و گەهاندیە ئاستێ شەڕێن وێرانكەر و ژناڤبرنا سەرانێن رژێمێن حوكمدار.
ژ بەر هەڤدژیا بەرژەوەندی و بیروباوەران دبلۆماسیەتا نەرما ئەمریكا هەنبەر ئیرانێ سەر نەگرت، لەوا ماوەكێ درێژ ئەمریكا دبلۆماسیەتا توند ل دژی ئیرانێ بكارئینا كو خۆ د ئابلۆقەیا ئابووری و گڤاشتنێن سیاسی و دبلۆماسی و هەوالگەری و هاندانا خەلكێ ئیرانێ ل دژی رژێمێ ڤە دیت، وەكو وێ ژی سەرنەگرتی پەنا برە بەر دبلۆماسیەتا ب زۆری و بكائینانا هێزا چەكداری، هەلبەت هۆكارین هیزێ ئێكلاكەرن بۆ ڤان ئاستێن دبلۆماسیەتێ.
مێژوویا هەڤدژیا ئەمریكا و ئیرانێ ڤەدگەریت بۆ سەردەەمێ سەركەفتنا كۆمارا ئیسلامی ل ئیرانێ ل سالا ١٩٧٩ و ژ هینگی وەرە هەڤڕكی و ململانێ د ناڤبەرا وان دا هەمی ئاستێن دبلۆماسیەتێ ب خۆڤە گرتینە و بێ ئەنجام بووینە و پشتی ڤی پێكدادانێ گەلەك هۆكارێن بارودۆخی هاتنە گوهۆرین و چەندین گەڕێن دانوساندنان هاتنەكرن و هێشتا گەفێن پیكدادانێ و شەڕی هەنە.
ئەوا سەیر هەمی سیاسەتا ئەمریكا ل دژی ئیران پێناڤی گوهۆرینا رەفتارێن رژێما ئیرانی بوو و حەتا د ڤی شەڕێ چل رۆژی دا كو هندەك گۆتن ل سەر گوهۆرینا رژێما ئیرانێ هاتنە گۆتن، لێ نەبوو درووشمەكێ كارپێكەر و هەر زوی ئەمریكا نیازێن خۆ دیاركرن كو بەرژەوەندیێن وێنە و مەبەستا وێ گوهۆرینا رەفتارێن رژێما ئیرانێ یە و ئیدی ئیران گەف و مەترسیێ ل سەر بەرژەوەندیێن وێ ل كەنداڤی و ل رۆژهەلاتا ناڤەراست چێنەكەت!.
ل ڤی دەستوداری دا و د ناڤ ڤێ گێلەشۆكا شەڕوپێكدادانا دا ئەم كوردستانی ل كیڤەینە!؟، ئەگەر بۆ ئەمریكا و ئیرانێ و ئسرائیلی و دەولەتێن عەرەبی بەرژەوندیێن وان گرنگ بن، پشتی ڤان شەڕ و پێكدادانان گفتوگو و دانوستاندنان بكەن، ئەم چەند دشێن بەرژەوەندیێن هەڤپشك چێكەین و خۆ بگونجینین ل گەل ڤی دەستودارێ پێترانكیا سیاسەتێ!؟
هەلبەت وەكو بەرژەوەندی هەڤدژان كۆمڤەكەت و لێكتێگەهشتن و رێكەفتنان بكەن، پێدڤییە دهشیاربین و نەبینە گوری بەرژەوەندیێن یێ بهێزتر.
پێدڤییە هەر زوی برایێن هەڤڕك رێبازا دبلۆماسیەتا نەرم بگرنە بەر و گفتوگویا دبلۆماسی بكەن و لێك كۆمببن و لهەڤهاتنێ بكەن و كێشەیێن خۆ چارەسەر بكەن و بەرژەوەندیێن گشتی بجهبینن و كوردستانێ ئارام كەن و مللەتەكێ سەرفراز كەن.
