کـارگـەهـا “داسـن” هیڤیەکا نوو یا کەرتێ ساخلەمیێ و پێنگاڤەک بـەرەڤ خـۆمالیكرنا دەرمـانـان
کێشەیا کێمیا کارگەهێن دەرمانسازی و گرانی و کواڵێتیا نزم یا دەرمانێن هاوردەکری، هەردهم بارگرانیەکا مەزن و بەردەوام ل سەر ملێ نەخۆشان دروستکریە. بۆ پڕکرنا ڤێ بۆشاییا ستراتیژی، پڕۆژێ مەزن یێ کارگەها “داسن” یا بەرهەمئینانا دەرمان، دەرزی و سێلانێ وەک شۆڕشەکا نوو د کەرتێ ساخلەمیێ دا سەرهەلددەت.
د. رمضان طیب عثمان، سەرپەرشتێ کارگەها “داسن”، دیارکر کو تا نوکە ل دەڤەرا بەهدینان چ کارگەهێن دەرمانان و ئاڤا سڕکەر نینن، و ل سەرانسەری عیراقێ ژی کارگەهێن پێدڤیێن پزیشکی گەلەک د کێمن و گۆت: د نوکە دا نێزیکی 89% حەتا 90% یێ دەرمانان ژ دەرڤەی عیراقێ دهێن، و کارگەهێن نافخۆیی بتنێ تێرا 10% یا پێدڤیێن وەلاتی دکەن. ئەو دبێژیت: “ئەز وەک دکتۆر، ڕۆژانە دبینم کا نەخۆش چ ئازارا دکێشن ژ بەر دەستنەکەفتنا دەرمانێ باش، یانژی ئەگەر هەبیت ژی گەلەک یێ گرانە. ئارمانجا مە یا سەرەکی ئەوە دەرمان ب بهایەکێ گۆنجای و ئەرزان بگەهیتە دەستێ وەلاتیان.”
سەرپەرشتێ پڕۆژەی زێدەتر گۆت: “ئەڤ کارگەهە دێ بیتە بناغەک بۆ هندێ کو ئاسایشا ساخلەمی و ئاسایشا دەرمانی یا هەرێما کوردستانێ و عیراقێ ب گشتی پتر بکەڤیتێ. د رەوشێن نەخۆش، شەڕ و د پاشەڕۆژێ دا، ئەم دێ شێین پشتڕاست بین کو دەرمانێ بەردەوام بۆ خەلکێ مە یێ بەرهەڤە.”
ل دویف گۆتنێن د. رمضان طیب، پڕۆژێ کارگەها “داسن” دێ د سێ قۆناغێن سەرەکی دا هێتە بجهئینان:
قۆناغا ئێکێ: دروستکرنا دەرمانێن ڕۆژانە وەک حەپک، کەپسول، فوار، شرۆبێن تووز، و شلەمەنیێن پێدڤی.
قۆناغا دوێ: دروستکرنا ئاڤا سێلانێ.
قۆناغا سێێ: دروستکرنا دەرمانێن بهێز وەک ئەنتی بایۆتیکێن بهێز و پێدڤیێن دی یێن بازاڕی.
سەبارەت پیڤەر و ستاندەردێن جیهانی، د. رمضان تەئکید کر کو ئاڤاهی و پرۆسێسا چێکرنێ دێ ل دویف ستاندەردێن پزیشکی یێن جیهانی بن، ب تایبەتی یا ئێکەتیا ئەوروپی و یا ڕێکخراوا ساخلەمیا جیهانی). هەروەسا دیارکر کو کەرەستێن خاڤ دێ ژ ئەوروپا، کەنەدا، چین یان هندێ هێنە دابینکرن، ب مەرجەکی کو د بلندترین ئاستێ کواڵێتیێ دا بن.
پێشخستنا کادرێ خۆجهی و دابینکرنا دەلیڤێن کاری
یەک ژ خالێن گرنگێن پشتبەستنا پڕۆژەی بوو ل سەر هێزا کاری یا ناڤخۆیی.
د. رمضان ئاشکرا کر کو پشکا کۆنترۆلا کواڵێتیێ (QC) و پتریا ستافی دێ کادرێ خۆجهی بن. لێ ژ بەر هەبوونا هندەک ئامیرێن گەلەک پێشکەفتی، ل دەستپێکێ دێ بۆ دەمەکێ کاتی (سالەک یان دو سالان) پسپۆرێن بیانی هێنە دابینکرن دا کو کادرێ ناڤخۆیی فێر بکەن و گۆت: ئەڤ پڕۆژەیە دێ نێزیکی 200 دەلیڤێن کاری و پتر بۆ گەنجێن پسپۆر د بوارێن کیمیا، بایۆلۆجی و تەکنەلۆجیا پێزانینان (IT) دا پەیدا کەت.
ل دوواهیا دیدارێ، سەرپەرشتێ کارگەهێ ئاماژە دا هندێ کو ئەو د بزاڤان دانە ئامیرێن سەرەکی یێن دەرمان چێکرنێ ژ ئەڵمانیا و ئیتالیا بینن، دا کو د پاشەڕۆژێ دا ب ساناهی ڕەزامەندیێن پێدڤی ژ ئێکەتیا ئەوروپی و وەلاتێن خەلیجێ بۆ هەناردەکرنا دەرمانان وەربگرن، دگەل ئەگەرا ب ۆارئینانا هندەک ئامیرێن چینی و هندی یێن کواڵێتییا بلند و پشتراستکری.
