حەجی وەلی بەرواری
شاكر ئەتروشی
حەجی وەلی بگدادی/بەرواری، ئێك ژ ناڤدارێن دەڤەرێ بوو، ل سالا 1930 ل گوندێ (بگداد) سەر ب عەشیرەتا بەرواری بالا ڤە، ژ مالباتەكا جامێر و ریهسپی هاتیە سەر دونیایێ، پشتی گەهشتیە ژیێ هەڤژینیێ، كچەكا گوندێ خۆ ب ناڤێ (شەپال) ل خۆ ماركر، پاشی دو ژنێن دی ژی ئینان، كو ئەو ژی (ئەسمەر و فاتیما) بوون، خۆدێ پێنج كوڕ و پێنج كچ دانێ.
حەجی وەلی، مرۆڤەكێ چاڤڤەكری و مەرد و ناندەه و خێرخواز بوو، هێشتا یێ گەنج دەست ب بازرگانیێ كر و خودێ كەرەمەكا مەزن دگەل كر (سێ ئاش) هەبوون، بەهرا پتر ژ ئەردێ بگداد یێ وی بوو، قەسرەكا مەزن ل گۆندی هەبوو، هەشت ژور بوون،
دو جاران ب دیتنا (بارزانیێ نەمر) شاد ببوو، جارەكێ ل سالا (1961) ل گۆندێ بگداد مێڤان بوو، ل مالا مامەكێ وی محەمەد حوسەین بگدادی و پێشوازیەكا باش لێ هاتە كرن و هەر مالەكێ پەزەك بو هاتنا وی سەرژێكر بوو، هەروەسا هەردو گوندێن (بگداد و تروانش) هەردەم د پری مێهڤان بوون، چونكی ئەڤ هەردو گۆندە ل سەردەمێ شۆڕەشا ئیلونێ خالەكا گرێدانا رۆژهەلاتا كوردستانێ ب رۆژئاڤایێ كوردستانێ ڤە بوون و هەر كەسەكێ وی سەردەمی چ ژ رۆژهەلاتا كوردستانێ، یان ژ رۆژئاڤایێ كوردستانێ هاتن و چووبان هەلبەت دا ل گوندێن بگداد و تروانش را بۆرن، پشتی شۆڕەشا ئیلۆنێ سەرهەلدای و هەر عەشیرەتەكێ رێڤەبەریا ناوچەیا خۆ ژ داگیركەران پاقژكری، حەجی وەلی ل وێ هەوێ بۆ خۆ تڤەنگا پۆلەندی ژ پۆلیسەكی وەرگرت ب چەككەڤت.
ناڤهاتی هەموو ژیانا خۆ بڤی دەستوداری برە سەری، هەتا سالا 1978 ئەو بوو گۆندێن بەرواریان هاتنە راكرن، ئەو چوو كۆمگەها بێرسڤێ، پاشی ب قاچاخی زارۆكێن خۆ گەهاندنە دهۆك ئاكنجی بوو، ل ڤێرە مشە هاریكاریا خەلكی دكر، هەتا رۆژا 15-11-2005 چوو بەر دلۆڤانیا خودایێ مەزن و ل گۆڕستانا شاخكێ هاتە ڤەشارتن.
