هونەر ناسنامەیا نەتەوەیی یە
هیڤی كەریم
رەیان عەبدولقادر حسێن، گەنجەكێ بەهرەمەندێ دەڤەرا سەرسنكی یە، ددیدارەكێ دا بۆ رۆژنامەیا ئەڤرۆ دبێژیت: دژیەكێ بچووك دا من حەزژ ڕەنگان دكر، لەورا ئەز چوومە پەیمانگەها داسنیا و ل سالا 2023ــ 2024من باوەرنامەیا دبلۆمێ ب هونەرێ شێوەكاری وەرگرت و ئەڤ چەندە بۆ ئەگەر كو ئەزپتر ب شێوەیەكێ ئەكادیمی دەستپێبكەم و دێ یێ بەردەوامبم.
هەروەسا گۆت: ل سالا 2025 ب شێوەیەكێ بهێزتر ئەز هاتمە دناڤ بۆارێ شێوەكاری دا و نوكە قوتابیمە ل قوناغا ئێكێ ل كولیژا هونەرێن جوان ل زانكۆیا دهۆك و دێ هەموو شیانێن خۆ مەزێخم پشتی دەرچۆنێ خزمەتەكا باشتر بۆ هونەرێ كوردی پێشكێش بكەم، بۆ زانین هەتا نوكە من پشكداری د هژمارەكا ڤێستیڤال و پێشانگەهێن شێوەكاری دا كریە، لێ مخابن هێشتا وەكو پێدڤی گرنگی ب هونەرمەند و بەرهەمێن هونەری ناهێتە دان و مە دڤێت بۆ پاشەرۆژێ وێ چەندێ ب سەلمینین كو هونەر ستوینەكا سەرەكی یا شارستانیەتێ و رەنگڤەدانا روحا مللەتی و ناسنامەیا نەتەوەیی یە.
