دهۆك و هەولێر ب گرێبەستێن ئاگرین بەرهەڤیان بۆ وەرزێ نوو دكەن
قەیس وەیس:
پرۆسەیا ڤەگوهاستنا یاریزانێن نوو و ئیمزاكرنا گرێبەستا دناڤبەرا یانەیێن كوردستانی و ئیراقی بۆ وەرزێ نوو یا خولا ستێرێن ئیراقێ یا فوتبۆلێ بەردەوامە، یانەیێن دهۆك و هەولێر و نەورۆز تیمێن خوە چەكدار كرینە ب یاریزانێن نوو و زاخۆ د نوكە دا ڕاوەستیایە و دناڤا قووناغا دانۆستاندنێ دگەل چەند یاریزانان دانە، دگەل نڤێسنا ڤی بابەتی ئەو پێنگاڤێن هەتا نوكە هاتینە هاڤێژتن بڤی شێوەیی نە.
نووكرن و ئیمزاكرن بەردەوامن
یانەیا دهۆك بەردەوامە ل سەر ب هێزكرنا ڕێزێن تیما خوە بۆ وەرزێ نوو و كۆپا سۆپەرا كەنداڤی ئەوا بڕیارە یارییا وێ ل 13ێ تەباخا بهێت ل یاریگەها دهۆكێ یانەیا ڕەیان یا قەتەری مێڤان بكەت، هەتا نوكە هەتا ڕادەیەكی تیما خوە گەهاندیە پێكهاتییەكێ باش، دووماهی پێنگاڤ ستێرێ دهۆكییا سیابەند عەگیدی گرێبەستا خوە نووكرییە، هەروەسان لسەر داخوازا ڕاهێنەر یەحیا گۆلمحەمەدی گرێبەست دگەل یاریزانێ رۆژهەلاتێ كوردستانێ سینا ئەسەد بێگی ئیمزاكریە، لدووڤ ژێدەرێن رۆژنامەڤانی یاریزانەكێ دی یێ ئیرانی د ڕێدایە و دبیت رۆژێن بهێت گرێبەستا وی ئێكلا بیت، هوسا هاتیە بەلاڤكرن تیما یانەیا دهۆك دەست ئێكەم یەكەیا خوە یا ڕاهێنانێ كەت.
زاخۆ نە ڕاوەستیایە
پشتەڤانێن یانەیا زاخۆ گازندە ژ كارگێرییا یانەیێ دكەن كو پرۆسەیا ئیمزاكرنا گرێبەستان نا هێتە كرن، ئێك ژ كەسێن نێزیك ژ یانەیا زاخۆ بۆ ئەڤرۆ دیاركرییە كو یانە نە ڕاوەستیایە و د نوكە بەردەوامن ل سەر دانۆستاندنێ دگەل چەند یاریزانێن پیشەكار و یێن د خولا ستێرێن ئیراقێ دا و بڕیارە د ڤێ حەفتیێ دا چەند گرێبەست بهێنە ڕاگەهاندن، پشتی گرێبەستا ڕاهێنەرێ فرەنسی لۆرانت بانێد ئەو ئەڤرۆ دێ گەهیتە زاخۆ هێرشبەرێ ئۆغەندی ئیڤان ئاهیمبۆسییوا ئینایە دناڤ ڕێزێن تیما خوە دا كو دبیتە پیشەكارێ پێنجێ دناڤ تیمێ دا، ئەوچەندە دیاركر د ڤێ حەفتیێ دا چاڤەڕێ هاتنا یاریزانێن خودان شیانبن و دێ بنە سۆپرایز بۆ پشتەڤانان.
هەولێرێ پێنج یاریزانێن دی ئینا
د سێ رۆژێن بۆری دا یانەیا هەولێر پێنج یاریزانێن دی بۆ پێكهاتیێ تیما خوە ئیناینە و بڤی شێوەیی، گرێبەست دگەل شۆبار عەلی، پیشەكارێ لیتۆانی و هێلا بەرەڤانیێ سیگیناس ئۆلبێركیس، یێ بەرازیلی و هێلا بەرەڤانیێ پێدرۆ هێنریكی، هەروەسان گرێبەستا هومام تارق و عەلا رەعد بۆ وەرزەكێ دی هاتە نوو كرن.
نەورۆز دەست ب ڕاهێنانان كر
پشتی ڕێژەیا 80% پێكهاتیێ تیما خوە ب دووماهی ئینایی ل ئەینیا بۆری نەورۆز ب سەرپەرشتییا ڕاهێنەر وەلی كەریم دەست ب ئێكەم یەكەیا خوە یا ڕاهێنانێ كر، پشتی كۆمەكا گرێبەستێن نوو ئیمزاكرین و بڤی شێوەیی، هەیسەم خەلیل وەكو ڕاهێنەرێ گۆلپارێزان، یاریزانان ئەیمەن ئەرزێج، محەمەد عەباس گۆلپارێز، زڕغام ئیسماعیل، حەمۆد مەشعان، نووكرنا گرێبەستێن یاریزانان عەلی حسێن، یێ بەرازیلی كلاودیۆ ئۆلیڤێرا، موستەفا ڕازی كو دگەهنە 20 یاریزانێن گرێبەستێن وان نووكرین و ئیمزاكرین.
