شێوەكارەكێ كورد پێشانگەهەك ل بریتانیا ڤەكر
رەمەزان زەكەریا
هۆنەرمەندێ شێوەكار (گۆران بابا عەلی) نووترین پێشانگەها خۆ ل ژێر ناڤێ (دابڕانەك د شێوازی دا) ل گەلەرییا مالا ئەفسانە ل بەریتانیا ڤەكر و د دایدارەكێ دا بۆ ئەڤرۆ گۆت: پێشانگەه زێدەتر ژ پێشانگەهەكا هونەری دچیت، بانگەوازیەكە بۆ دیتنا وان دەمان ئەوێن ئەز ژ بەرپرسیارەتییێن خۆ دڕەڤم و ڕێ ب خۆ ددەم ب كەیف بچمە د ناڤ دەڤەرێن نەنیاس دا.
هەروەسا گۆت: د زنجیرە كارێ ل سەر دیوارێ شكەفتان دا بزاڤ كر ب ڕێیا هێل و ڕەنگ و فۆرمێن تێكەلبووی ژ وی ڕۆحێ دەستپێكێ یا مرۆڤێ كەڤن نێزیك ببمەڤە، هندەك ژ وان كاران دزڤڕن بۆ سالا ١٩٩٧ دەمێ د ناڤ سەنتەرەكێ پەنابەران دا بووم ل هولەندا و كەرەستەیێن جیاواز وەك تێمپرا گواش و ئەكریلیك بكارئیناینە د وان بەرهەمان دا هێلێ جهێ ڕەنگی گرت و ب پاستێل و ڕووبەرێ ڕەش و كڕاندنا وێنەیان شێوازەكێ كاركرنێ یێ بلەزتر و ئازادتر من تاقیكریە.
