دهۆكێ دەست ب بەرهەڤییان كر و كەمپا خوە دێ ل توركیا دانیت
قەیس وەیس:
ل شەمبییا بۆری تیما فوتبۆلا یانەیا دهۆك ئێكەم یەكەیا خوە یا ڕاهێنانێ ب سەرپەرشتییا ڕاهێنەرێ نوو یێ ئیرانی یەحیا گۆلمحەمەد ل یاریگەها خوە دا ئەنجامدا، خوە بەرهەڤكرن بۆ وەرزێ نوو یێ خولا ستێرێن ئیراقێ ئەوا دێ ل هەڤڕكیێن وێ ل 14ێ تەباخا بهێت دەستپێكەت، دیسان بۆ سۆپەرا كەنداڤی ئەوا دێ ل یاریگەها دهۆكێ ل 13ێ هەمان مەهـ ل گەل یانەیا ڕەیان یا قەتەری هێتە كرن.
كەمپێ ڕاهێنانێ ل توركیایە
د داخویانیەكا رۆژنامەڤانی دا. د. عەبدوللا جەلال سەرۆكێ یانەیا دهۆك گۆت: پێشتر ڕاهێنەرێ تیمێ یەحسا گۆلمحەمەد خواست كەمپێ ڕاهێنانێ یێ تیمێ ل وەلاتێ ئیرانێ بهێتە كرن لێ ژبەر كاودانێن نە ئارام ل وی وەلاتی مە داخازا وی ڕەدكر و هەر ئێك ژ وەلاتێن توركیا و تۆنس وەكو جهێ كەمپەیێ بۆ دەستنیشان كرن.
لدووڤ زانیاریێن دەست مە كەڤتین بڕیار هاتیە دان كەمپێ ڕاهێنانێ ل وەلاتێ توركیا بهێـە كرن بۆ ماوەیێ 15 رۆژان كو رۆژانە دو یەكەییێن ڕاهێنانێ بهێنە كرن، بڕیارە ل دووماهییا ڤێ حەفتیێ شاندێ تیما دهۆكێ بەر ب وەلاتێ توركیا بچیت، ل دووڤ بەرنامەیێ دارشتی دبیت چار بۆ پێنچ یاریێن هەڤالینی دگەل چەند یانەیێن جودا یێن خولێن توركیا دا بكەت ژبۆ باشترین بەرهەڤی و زانینا ئاست و شیانێن هەموو یاریزانان.
ب هێزكرنا ڕێزێن تیمێ بەردەوامە
ژبۆ ب هێزكرنا هێلا گۆلپارێزان یانەیێ گرێبەست دگەل سەیدق جەمال، گۆلپارێزێ سویدی و ڕەڤەندا ئیرانی و یانەیا دالكۆرد سان مستەفا یێ 25 سالی ئیمزاكر، ژلایەكێ دووڤە بلند ئازاد ئەو یاریزانێ دیتر یێ ڕەڤەندا كورد ل وەلاتێ هولەندا دوبارە گرێبەستا خوە دگەل یانەیێ بۆ وەرزەكێ دی نوو كر، ئەڤ یاریزانە د ژیێ 22 سالی دایە بەری بهێتە دهۆكێ یاریزانێ یانەیا گرافشاب یا هولەندی ل سەر ئاستێ لاوان بوو، دیسان یاریزانێ لاوێن هەلبژارتیێ ئیراقێ و ئۆلمپیێ ئیراقێ بوو ل ئۆلمپیادا 2024ێ ژی پشكداری كرییە.
پشتەڤان گەشبینن
ل دووڤ ڕاوەرگرتنەكێ دا یا رۆژنامەیا ئەڤرۆ زێدەتری 90% پشتەڤانێن یانەیا دهۆك ب گرێبەست و هێزا پێكهاتیێ تیما خوە بۆ وەرزێ نوو د گەشبینن، ئەڤچەندە ژی هات ئەو یاریزانێن دهێنە دناڤ ڕێزێن تیمێ دا ل دووڤ سیڤیێن خوە و ئاستێ خوە یێ وەرزێ بۆری دگەل یانەیێن خوە شیاینە ببنە جهێ باوەریێ، بوویە جهێ دلخوەشییا پرانییا پشتەڤانێن دهۆكێ و دەستخوەشییا كارگێرییا یانەیێ دكەن ژبەر پێنگاڤێن وان یێن نایاب.
لیستا یاریزانێن دهۆكێ
پرۆسەیا ئیمزاكرن و نووكرنا گرێبەستا بەردەوانە و هەتا نوكە كۆمەكا باش یا یاریزانان هاتینە دناڤ ڕێزێن تیمێ دا و بڤی شێوەیێ، سێ گۆلپارێز ئەو ژی ئەحمەد بەشار، كۆمەیل سەعەد و سان موستەفا، دیسان هەر ئێك ژ كارزان دۆسكی برایێ مێرخاس دۆسكی، یێ بەرازیلی ئیگۆر هندریك، یێ سۆری مەحمۆد ئەلمواس، هادی سالح، ڕێوان ئەمین، یونس حەمۆد، یێ مەغربی ڕزا ماجی، موهەنەد جەعاز، یێ بەرازیلی ڕیكارد سانتۆس، نووكرنا گرێبەستا هەر ئێك ژ سەفا هادی، یوسف ئەلئیمام، ئەحمەد عەلی و سیابەند عەگید.
