د. هەكار برقی: ئەڤرۆ دێ پێنگاڤا ئێكێ هاڤێژین و پێدڤی ب بەرهەڤبوونا جەماوەری نە
قەیس وەیس:
د داخویانیەكێ دا د. هەكار برقی ڕاهێنەرێ تیما ڤۆلی بۆلا یانەیا سەنحاریب دیار كر ئەڤرۆ دێ ئێكەم پێنگاڤا خوە یا پاراستنا ناسناڤێ خوە یێ وەرزێ بۆری د خولا ئیراقێ دا هاڤێژن، ئەوا بڕیارە دێ ئەڤرۆ ل دەمژمێر هەشت شەڤ مێڤاندارییا یانەیا قەرەقۆش كەن ژ چارچووڤەیێ كۆما ئێكێ یا ڤاڤارتنێن قووناغا ئێكێ ژ خولێ.
زێدەتر ناڤهاتی بۆ ئەڤرۆ گۆت: ل دووڤ بەرنامەیەكێ ڕێكخستنی مە دەست ب بەرهەڤیێن خوە بۆ ڤاڤارتنان كرینە و هەموو ئارمانج و هیڤیێن مە ئەون ئەم بشێن ناسناڤێ خوە یێ وەرزێ بۆری دوبارە پارێزین و بەر ب قارەمانییەكا دەرڤە بچیت، پێنەڤێت ئەڤ هیڤییە ژی كارەكێ ئێگرتی دڤێت و گەشبینم ژبەركو كارگێرییا یانەیێ گەلەك هاریكار و پشتەڤانە و هەموو یاریزان ب مۆرالەكا بلند دێ هێنە د ناڤ یاریێ دا، پێنەڤێت ئەركێ مە ب سانەهی نابیت هەتا بگەهینە ئارمانجا خوە، لێ ڕژدی دێ هەبیت.
ژلایەكێ دووڤە د. هەكاری خواست بۆ هەموو یاریان جەماوەر ئامادەب بیت و گۆت: ژبەركو ئەم مێڤاندارین و دێ هەموو یاریێن قووناغا ئێكێ یا ڤاڤارتنان دناڤ ئەردێ مە دا بیت، داخوازێ ژ جەماوەرێ یانەیێ و وەرزشڤانێن دهۆكێ د یارییا ئەڤرۆ یا دەمژمێر هەشت و هەموو یاریزانان ئامادەبن و ژبۆ پشتەڤانییا نوونەرا پارێزگەهێ، مە باوەری هەیە وەكو هەر قارەمانییەكێ دێ ڕێژەیەكا مەزن ئامادە و پشتەڤانبن.
بۆ زانین دەهـ یانە د قووناغا ئێكێ یا ڤاڤارتنێن خولێ پشكدارن و هاتینە بەلاڤكرن ل سەر دو كۆمان و بڤی ڕەنگی، كۆما ئێكێ، یانەیا سەنحاریب-هەلگرا ناسناڤی-، قەرەقووش، ئەمانەت بەغدا، مەسافی ئەلشیمال و ئەلسیاحە، كۆما دویێ پێكهاتیە ژ ئەكاد عەنكاوە، ئەڤرۆدێت، دەربەندیخان، زەعفەرانیە و ڕەواندۆز، هەموو یاری دێ ل هۆلا گرتییا یانەیا سەنحاریب هێنە كرن.
