خولا پلا دو و دێرینان دێ دەستپێكەت و فوتسالا كچان دیار نینە
ڕەمەزان زەكەریا:
فدراسیۆنا فوتبۆلا كوردستانێ ب فەرمی بڕیارا ڤەگەڕاندنا چالاكیێن خوە یێن وەرزێ ئەڤ سالە دا ئەو ژی قارەمانییا هەلبژارتیێن دێرینێن پارێزگەهێن كوردستانێ و خولا پلا دو ل سەر ئاستێ پێشكەڤتیان ل ناڤەڕاست و دووماهییا مەها بهێت دەستپێبكەن ژلایەكێ دووڤە خولا فوتسالێ ل سەر ئاستێ كچان چو ژڤان بۆ نە هاتینە دیاركرن.
ل دووڤ بەرنامەیێ وەرزێ نوو یێ چالاكیێن فدراسیۆنا ناڤهاتی بڕیارە ل شەشێ تەباخا بهێت دەست ب هەڤڕكیێن قارەمانییا كوردستانێ بۆ هەلبژارتیێن دێرینێن هەموو پاریزگەه، و ئیدارەیێن سەربەخۆ بهێتە ڕێكخستن كو دهێتە هژمارتن بۆ جارا ئێكێ یە پشتی ڤەقەتیانەكا درێژ، بڕیارە ل 18ێ ڤێ مەهێ ب فەرمی هژمارەیا پشكداران ل گەل شێوازێ بڕێڤەبرنا قارەمانیێ و جهێ وێ د كۆمبوونەكا تایبەتدا دگەل نوونەرێن پشكدار بهێتە دەستنیشانكرن.
ژلایەكێ دووڤە فدراسیۆنا فوتبۆلا كوردستانێ بڕیار دا ل 20ێ تەباخا بهێت دەست ب هەڤڕكیێن خولا پلا دو ل سەر ئاستێ پێشكەڤتیان بهێتە كرن ئەوا بڕیارە 26 یانە دێ پشكدارن، ئەوا دهێتە چاڤەڕێ كرن پێنچ یانە ژ پارێزگەها دهۆكێ پشكداربن هەر ئێك ژ یانەیێن، پیرس، باتیفا، شێلادزێ، دینارتە و بجێل، ل 18ێ ڤێ مەهێ كۆمبوون دێ هێتە كرن ژبۆ دیاركرنا شێوازێ خولێ و دهێتە چاڤەڕێ كرن ب دو كۆمان هەتا چار كۆمان بیت،ژبۆ ئاسناكارییا دارایی یا یانەیێن پشكدار.
ژلایەكێ دووڤە فدراسیۆنا فوتبۆلا كوردستانێ د كۆمبوونا خوە دا هیچ بڕیارەك ل سەر دەستپێكرنا خولا فوتسالێ ل سەر ئاستێ كچان نە دایە ئەوا هەر ژ وەرزێ بۆری هاتیە ڕاوەستاندن بێی دیاركرنا هیچ ئەگەرەكی، بۆ زانین یانەیا ئافرەتێن دهۆكێ خودانا سێ ناسناڤێن خولێ یە ل وەرزێن 2020-2021، 2023-2024، 2024- 2025ێ، ئێك ژ یانەیێن خودان دیرۆك ل كوردستانێ یە.
