زەنگلۆکا هیڤییێ
هەژین فەرەج
د گوندێ مە دا، هەر گاڤا ئەم دگەهشتینە سەر گۆپیتكا چیایەكێ، دایکا من وێنەیەکێ کەڤن ب حەزژێکرن ڤە ماچی دكر و لبەر سینگێ خۆ دگڤاشت.
د وێنەیی دا، زەلامەک ڕاوەستیا بوو؛ ب سادەییا خۆ یا گوندییانە، و د چاڤێن وی دا کەسەرەکا مەزن هەبوو؛ کەسەرەک بوو کو سالان نەشیا بوو ئازار و برینێن کەڤن ژێ بڕامالیت. ئەو، دوماهی وێنەیێ بابێ من بوو، بەری کو ل هاڤینا سالا ١٩٨٣ێ، پێلێن ڕەشێن ئەنفالێ وی ل مە بەرزە بكەت.
د وێ ڕۆژێ دا، دیمەنێ گوندی وەک شەڕەکێ بێدەنگ دیار دبوو؛ ترەکتر د ناڤ قێری و هەوارێن ژنان دا دچوون، و تۆزا تەرەکتر و ترۆمبێلان ئاسمان ڤەگرتبوو. بابێ من دەستێ من ب هێز گرت، زەنگلۆکەکا بچووک یا ئاسنی كرە دنیڤا دەستێ من دا و گۆت: کچا من، ئەگەر ئەز گیرۆ بووم، بەردەوام گوھێ خۆ بدە دەنگێ ڤێ زەنگلۆکێ؛ چونکی ب دەنگێ وێ دێ زانم هوین ل كیڤەنە و دوبارە گەهمە هەوە.
سال چوون و سال هاتن، لێ ئەو زەنگلۆکە هێشتا یا د ناڤ دلێ من دا ئاوازێن هیڤییێ لێددەت. مە جەستەیێن وان نەدیتن، لێ مێژوو ژ بیرا مە نەچوو؛ د ڕۆژا سیهـ و ئێکا تیرمەهێ دا، ئەو ڕۆژا بووی برین و بیرئینان. سالانە، ئەز بەرامبەر بیرهاتنا وێ رۆژێ ڕادوەستم، پشتی مەزن بوویم و من زانی نە بتنێ بابێ چوو بوو.
ئەو بوو پشكەك ژ برینا کوورا ڤێ خاکێ؛ و بوو نیشانەکا سەربەرزییا وێ هەتا ڕۆژا ئەڤرۆ.
