ئەرێ پارەی گیانێ وەرزشێ ل خولا ئیراقێ نە هێلایە؟
وارهێل وەیس
د ڤان سالێن دووماهییێ دا، خولا ستێرێن ئیراقێ یا فوتبۆلێ د قووناغەکا نوو یا سەرمایەداریێ دا دەرباز دبیت، گوهۆڕینێن مەزن د بازاڕێ ڤەگوستنا یاریزانان و بارکرنا بودجەیێن خەیالی یێن یانەیان دا پەیداکرییە، شێوازێ فوتبۆلێ ل وەلاتێ مە ژ بنەڕەت دا گوهارتیە، د دەمەکی دا کو داهات و گرێبەستێن گرانبها ئاستێ ململانێ و هێزا خولێ بەرفرەهـ کریە، پرسیارەکا جەوهەری سەر هەلددەت، ئەرێ فوتبۆلێ ژ ناسنامە و دلسۆزیێ هاتیە تیرورکرن بۆ بازرگانیەکا بێ گیان؟، ب دیتنا من چەند خالەک هەنە دڤێت بەحسکەین، یا ئێکێ سەرهلدانا بازاڕێ زێدەبایی، د نوکە دا یانەییێن ئیراقێ هەڤرکییێ دکەن ب پێشکێشکرنا گرێبەستێن ملیۆن دۆلاری بۆ یاریزانێن ناڤخۆ و بیانی، ئەڤ بارگرانیە ل جهێ کو بچیتە د ژێرخانا تەپاپێ و ئەکادیمیێن تەمەنێ گەنجان دا، تنێ بۆ کڕینا سەرکەفتنێن بلەز و دەمکی هاتیە تەرخانکرن، یا دویێ ژناڤچوونا هەستا دلسۆزیێ، د بەرێ دا یاریزانان بۆ ناڤ و ئالا و پێناسەیا یانە و باژێرێ خۆ یاری دکر، ئەڤرۆ ڕەنگێ درێسێ دەرکەفتی، گرێدای ب قەبارێ چەکێ بانکی یە، گوهۆڕینا بەردەوام یا پێکهاتان ژ وەرزەکی بۆ وەرزەکێ دی، ڕابردوویێ گیانێ هەڤڕکیێ ژناڤبریە و یانە کرینە کومپانی، یا سێیێ نە دادپەروەری، یانەیێن خودان پشگیرییا دارایی یا حکومی و کۆمپانیا دەست دانایە سەر هەمی دەرفەتان، د دەمەکی دا یانەیێن خودان دیرۆک کو ژێدەرێن دارایی نینن بەر ب لاوازیێ دچن، ئەڤ نە وەکهەڤییە سیمایێ دادپەروەرییا وەرزشی کێم دکەت.
پارە ب تنێ نە خەمساریە، بەلکو د هەمبێزکرنا پیڤەرێن پیشەگەریێ دا فاکتەرەکێ سەرەکیە، لێ کێشە د بێ پلانیا مەزاختنێ دایە، دەمێ پارە دکەڤیتە دەستێ بریاردەران دا، ڕەوشتی وەرزشی دهێتە بەرزەکرن و ناسنامە دچیتە ژێر بەرپەرێن دراڤان. پاراستنا ڕاستەقینەیا فوتبولا ئیراقێ پێدڤی ب یاسایێن دادپەروەرییا دارایی (Financial Fair Play) و گرنگیدانا جدی ب وەرزشڤانێن خوجهی هەیە، دا کو یاری ببیتە پارێزەرێ ناسنامەیا جەماوەری، نە کەرەستەیێ بازرگانیێ.
