ئیران و ئەمریکا خوە بۆ شەڕەکێ مەزن بەرهەڤ دکەن
چاڤدێرێن سیاسی دیار دکەن دانوستاندنێن ئەمریکا و ئیرانێ بێی ئەنجام ماینە و ئەمریکا بەرهەڤیان بۆ ئێرشەکا نوو دکەت و ل هەمبەر دا ئیران ژی بەرهەڤیان دکەت ب هەموو رەنگەکێ بەرسڤا ئێرشێن ئەمریکا بدەت و دێ رەوشا دەڤەرێ ئالۆزتر لێ هێت.
مەیسەم مورادی ڤەکۆلەرێ کاروبارێن سیاسی ل وەلاتێ دانیمارک دیار کر، د شەڕێ ٣٩ رۆژان دا ئیرانێ ئێرشی وەلاتێن عەرەبی کر، وی دەمی بەرپرسێن ئیرانێ وەسا هزر کرن کو وەلاتێن عەرەبی دێ نەچار بن دەست ژ پشتەڤانیا ئەمریکا و ئسرائیلێ بەردەن و دێ وەسا خوە نێزیکی ئیرانێ کەن، لێ رەوش بەرۆڤاژی لێ هات، نها وەلاتێن عەرەبی پتر ژ هەر دەمەکێ خوە نێزیکی ئسرائیلێ دکەن، چونکی ئەو باش دزانن ئیران یا لاوازە و دێ رۆژ ب رۆژێ لاوازتر ژی لێ هێت و ژ بەر ڤێ یەکێ ژی وەلاتێن عەرەبی د دەمێن بۆری دا دەست ب دانوستاندنان ل گەل ئسرائیلێ کرینە و گۆت: (هندەک ژ بەرپرسێن ئسرائیلێ دبێژن وان باوەر نەدکر دێ وەلاتێن عەرەبی خوە وەسا نێزیکی ئسرائیلێ کەن، لێ ژ بەر ئێرشێن دەمێن بۆری یێن ئیرانێ ل دژی وان وەلاتان نها پتر ژ هەر دەمەکێ وەلاتێن عەرەبی خوە نێزیکی ئسرائیلێ دکەن و ئەو یەک ژی دەستکەفتەک گەلەک مەزنە بۆ ئسرائیلێ و هەکە ڤێجاری شەڕێ ئیرانێ بهێتە کرن دێ رەوش گەلەک جوداتر بیت).
ناڤهاتی ئەو یەک ژی دیار کر، دهێتە پێشبینیکرن کو د چەند رۆژێن بهێت دا عەرەبستان ب پشتەڤانیا هندەک وەلاتێن عەرەبی دەست ب ئۆپەراسیۆنەکا گەلەک مەزن ل دژی حوسیێن یەمەنێ بکەت، هەکە عەرەبستان بشێت زیانێن مەزن بگەهینتە حوسییان ئەو یەک دێ کاریگەریا خوە ل سەر شەڕێ ئیرانێ و ئسرائیلێ ل گەل ئەمریکا ژی کەت، ئانکۆ دبیت ڤێجارێ ئسرائیل ژی ب رەنگەکێ دی هاریکاریا عەرەبستانێ بکەت، چونکی دەمەکە عەرەبستان داخوازا هاریکاریێ ژ ئسرائیلێ و وەلاتێن دی یێن عەرەبی و جیهانێ کریە دا بشێت مەترسیا حوسییان ژناڤ ببەت و گۆت: (نها رەوش ب گشتی ئالۆزە و دێ شەرەک نوو د ناڤبەرا ئسرائیلێ و ئەمریکا ل گەل ئیرانێ دا دەستپێکەت، ب گشتی دهێتە پێشبینیکرن کو رەوشەکا نوو ل دەڤەرێ بهێتە پێش و بێگومان ئەو یەک دێ کاریگەریا خوە ل سەر کوردان هەبیت و ب تایبەتی ژی دڤێت هێز و ئالیێن سیاسی ل رۆژهەلاتێ کوردستانێ د ئامادەباشیەکا تەمام دا بن).
مەنسور عەزیزی چاڤدێرێ سیاسی یێ خەلکێ رۆژهەلاتێ کوردستانێ ژی دیار کر، ژ بەر دۆرپێچا دەریایی و هەروەسا سزایێن ئابووری یێن کو ل سەر ئیرانێ هاتینە سەپاندن نها رەوشا ئیرانێ گەلەک خرابە و خەلکێ ئیرانێ ژی ژ دەستهەلاتێ گەلەک توورە نە، چونکی بارێ ئابووری یێ خەلکی رۆژ ب رۆژێ خرابتر لێ هێت و ژ بەر ڤێ یەکێ ژی بەرپرسێن ئەمریکا وەسا دبینن هەکە ڤێجارێ دەست ب ئێرشەکێ ل دژی ئیرانێ بکەن دبیت خەلک ژی ل دژی دەستهەلاتێ خوەنیشادانان بکەن و وەسا دووماهیێ ب دەستهەلاتا نها یا ئیرانێ بینن و گۆت: (لێ ل هەمبەر بزاڤێن ئەمریکا و ئسرائیلێ یێن ل دژی ئیرانێ بەرپرسێن ئیرانێ ژی بەرهەڤیێن تەمام کرینە و هەروەسا نها ب هزاران کەس وەکو فیدایی ئامادەیا خوە دیار کرینە دێ بەرەڤانیێ کەن، ئانکۆ ئەو دێ ل دژی خوەنیشادانێن خەلکی دەرکەڤن و دێ وەکو سالا بۆری دیسان ئێرشی خوەنیشادەران کەن).
هژمارەک زێدە ژ چاڤدێرێن سیاسی ل ئیرانێ و رۆژهەلاتێ کوردستانێ ژی وەسا دبینن دێ د دەمەکێ نێزیک دا ئەمریکا و ئسرائیل ئێرشی ئیرانێ کەن.
