زاخۆ یا بوویە ناڤەندەكا گرنگ یا گەشتوگوزاری
زاخۆ، دلۆڤان هالۆ:
گوهدار شێخۆ، سەرپەرشتێ ئیدارەیا سەربخوە یا زاخۆ دیاركر، ژبەر گرنگیپێدانا تایبەت یا مەسرور بارزانی، سەرۆكێ حوكمەتا هەرێما كوردستانێ ب ئیدارەیا سەربخوە یا زاخۆ، د نوكە دا زاخۆ ژ باژێڕەكێ پشتگۆهـ هاڤێتی بوویە باژێڕەكێ جوان و پڕی ئاڤەدانی.
سەرپەرشتێ ئیدارەیا سەربخوە یا زاخۆ گۆت: «د نوكە دا زاخۆ بوویە ناڤەندەكا گرنگ یا گەشتوگوزاری، ب تنێ ل سالا بۆری پتر ژ ئێك ملیۆن گەشتیاران سەرەدانا زاخۆ كرینە، ژبەر هندێ 45 هۆتێل بۆ ڤێ هژمارا زۆر یا گەشتیاران كێمە و مە پێدڤی ب هۆتێل و جهێن زێدەتر یێن گەشتوگوزاری هەیە».
گۆت ژی: «مە گرنگیەكا مەزن ب پاقژڕاگرتنا باژێڕی دایە و بۆ ڤێ مەرەمێ، مە پێنگاڤێن ڕژد هاڤێتینە، هەتا مە كێشانا جگارەیان ل كۆڕنیشێ زاخۆ قەدەغە كریە و جهێن تایبەت بۆ جگارەكێشانێ هاتینە دەستنیشانكرن».
زێدەتر ژی گۆت:»لڤینەكا باش یا بازرگانی ل سنۆرێ ئیدارەیا سەربخوە یا زاخۆ هەیە، ب تایبەت پەیوەندیەكا مۆكوم یا بازرگانی د ناڤبەرا زاخۆ و پارێزگەها شرنەخێ یا باكوورێ كوردستانێ دا هەیە».
