بادەکێن زارۆكێن ئۆتیزمێ بۆ بەغدا هاتینە هنارتن
دهۆك، دلۆڤان ئاكرەیی:
كوێستان محەمەد، وەزیرا كار و كاروبارێن جڤاكی ل حوكمەتا هەرێما كوردستانێ دیار كر، ژ سێ هزار و 927 زارۆكێن ئۆتیزمێ ل هەرێما كوردستانێ، نوكە هزار و 756 زارۆك د سەنتەران دا ڕاهێنان پێ دهێنە كرن، بەلێ ب تنێ 310 زارۆك هاریكاریا دارایی یا مەهانە وەردگرن و دبێژیت: مە پشكنین بۆ زارۆكێن دی ژی كرینە و ناڤێن وان ژی بۆ هەردو وەزارەتێن دارایی و كاروبارێن جڤاكی یێن ئیراقێ هنارتینەن داكو مووچە بۆ وان ژی بهێتە دابینكرن.
ئاشكرا ژی كر، د پڕۆژەیاسایا بودجەیا سالا 2027ێ دا داخوازیا وان هاتیە پێشكێشكرن، داكو ل گەل بەغدا كار ل سەر بهێتە كرن و گۆت: «ل سالا 2019ێ و ل دەستپێكا دەست ب كاربوونا كابینەیا نەهێ، ب تنێ 11 سەنتەرێن ئۆتیزمێ ل سەرانسەری هەرێما كوردستانێ هەبوون، سێ ژ وان حكومی و هەشت سەنتەر ژی تایبەت بوون، بەلێ نوكە 72 سەنتەر هەنە، 14 ژ وان حكومی نە و 58 ژی یێن كەرتی تایبەتن، بەری نوكە ژ وان هەشت سەنتەرێن تایبەت، مەهانە نێزیكی هزار دۆلار ژ بۆ هەر زارۆكەكی وەردگرتن و پشتی ئاسانكاریێن مە بۆ كەرتێ تایبەت و ڤەكرنا سەنتەرێن پتر، مە شیا ركابەریێ د ناڤبەرا سەنتەران دا دروست بكەین و نوكە بهایێن وان گەلەك ئەرزان بووینە».
