په‌نابه‌رێن مووسل دێ باندۆرا خوه‌یا نیگه‌تیڤ ل هه‌رێمێ كه‌ت
به‌ری هه‌ر تشتی یا رۆن و ئاشكه‌رایه كو ل ده‌مه‌ك نێزیك شه‌ڕێ ئازادكرنا مووسل دێ ده‌ست پێكه‌ت و ژ تیرۆرستێن هشكباوه‌رێن داعش ئێته رامالین، ئه‌ڤ چه‌نده یا ب ساناهی نینه ژ به‌ر كو مووسل مه‌زنترین پارێزگه‌هه ل عێراقێ و په‌ناگه‌ها دویێ یا تیرۆریستێن داعشه پشتی ره‌قایا سووری و دیسا هندی رهورووشالێن رژێما به‌عس خوه د ناڤا ڤێ رێكخراوا تیرۆری دا دیتیه و ل مووسل جێگیر بووینه ده‌مێ هێرش دكه‌ڤیته سه‌ر مووسلێ، گه‌له‌كا گرنگه ب هووری و كووری سه‌ره‌ده‌ری ل گه‌ل هاتنا په‌نابه‌ران بێته‌كرن.
ره‌نگه هنده‌ك بۆچوون هه‌بن كو ب ئێكجاری ل گه‌ل هندێ نه‌بن په‌نابه‌ر قه‌ستا هه‌رێمێ بكه‌ن و رێ لێ بێته گرتن لێ ئه‌ڤ چه‌نده ژی نابیت و ناگونجیت ل گه‌ل قانوونێن مافێ مرۆڤی و پێشێلكرنه و دیسا رێكخراوێن مافێ مرۆڤی دێ ب دیتنه‌كا دی یا نیگه‌تیڤ ته‌ماشه‌یی هه‌رێمێ كه‌ن و دێ باندۆرا خوه هه‌بیت و هه‌كه بێنه وه‌رگرتن ژی دیسا دێ زیانێن خوه یێن نیگه‌تیڤ هه‌بن ل سه‌ر ره‌وشا هه‌رێمێ وه‌ك لایه‌نێ ئه‌منی و ئابووری و سیاسی و هه‌تا جڤاكی و په‌روه‌رده‌یی ڤه ژی، وه‌ك من ل سه‌ری ئاماژه پێ دایی كو پێشمه‌رگه و سوپایێ عێراقێ ل گه‌ل فرۆكێن هه‌ڤپه‌یمانان ل ده‌مه‌ك نێزیك دا وه‌ك پلان دێ ده‌ست ب هه‌وا پاقژكرنا مووسل كه‌ن ژ رێكخراوا تیرۆری یا داعش هه‌روه‌ك هاتیه راگه‌هاندن و تشته‌كێ ڤه‌شارتی نه‌بوویه و ئه‌ڤ چه‌نده ژی دێ بیته سه‌ده‌مه‌ك كو پێله‌كا مه‌زن یا په‌نابه‌ران ژمووسلێ ته‌راوبه‌را ببن و پشكه‌كا مه‌زن دێ قه‌ستا هه‌رێما كوردستانێ كه‌ن و ژ وان ژی به‌هرا پتر پارێزگه‌ها دهۆكێ چونكو نێزیكترین جهه بۆ وه‌لاتیێن مووسل ل ڤیره بێژین هه‌می تیرۆرستن بۆچوونه‌كا شاشه و د هه‌مان ده‌مدا بێژین هه‌می سڤیلن، دیسا ژی شاشه لێ گه‌له‌كا گرنگه ب پشكنین و ب رێكوپێكی په‌نابه‌ر بهێنه وه‌رگرتن به‌ری هه‌ر تشتی ب ئێكجار رێ پێ نه‌هێته دان بهێنه د ناڤا باژێران دا ده‌زگه‌هێن ئاسایش و پۆلیس و ساخله‌می هه‌می د ئاماده‌باشیێ دا جهه‌ك ڤه‌ده‌ر بۆ بێته دروستكرن و دبن چاڤدێریه‌كا توند دا بن و ب چو ره‌نگه‌كێ رێك بۆ وه‌لاتیێن هه‌ریمێ نه ئێته دان ببنه كه‌فیل، ل ڤێره توركیا بكه‌ینه نموونه چاوا پێشه‌وازیا په‌نابه‌رێن كۆبانێ كر ل سه‌ر سنۆری ل پێش چاڤێن زۆمێن كامیره‌یێن هه‌می جیهانێ رێك ل په‌نابه‌ران گرت و هه‌تا وی رادده‌یی سه‌ره‌ده‌ریه‌كا نه مرۆڤانه ژی ل گه‌ل داكرو بوونه ئه‌گه‌رێ هندێ قه‌ستا هه‌رێما كوردستانێ كرن، ژ به‌ر كو وه‌ك كوردایه‌تی هه‌رێمێ وه‌رگرتن، لێ تشتێ گرنگ ئه‌و بوویه كو توركیا نه‌چار نینه وه‌لاتێ خوه نه‌خوه‌ش بكه‌ت په‌نابه‌ر ببنه ئه‌گه‌رێ تێكدانا وه‌لاتێ توركیا چ ژ روییێ ئابووری ڤه یان ئیمناهی، سه‌ره‌رایی گڤشاتنێن ده‌وله‌تێن زلهێزێن جیهانی و رێكخراوێن مافێ مرۆڤی هه‌میان ب چاڤه‌كێ خراب ته‌ماشه‌یی سه‌ره‌ده‌ریا توركیا كر ژی لێ وان وه‌ك خوه كر و چاڤێن خوه نقاندن، لێ جودابوونا مه ره‌وشا كۆبانێ هه‌یه، چونكو مه بڤیت و نه‌ڤێت هه‌تا ڤێ چڕكێ ژی ئه‌م پشكه‌كین ژ عێراقێ و ئه‌ڤ چه‌نده ژی هه‌رێمێ نه‌چار دكه‌ت په‌نابه‌ران بحه‌وینت، ژ به‌ر ڤێ چه‌ندێ هه‌ر دێ هێن و چ ژمه ناهێت و به‌رامبه‌ر ڤێ چه‌ندێ گه‌له‌كا گرنگه هه‌می بزاڤ بێنه‌كرن ره‌وش ب ته‌مامی بهێته كونترۆل كرن چونكو ئه‌ڤ چه‌نده دێ بیته ده‌لیڤه بۆ رێكخراوا تیرۆری یا هشكباوه‌را داعش ب رێیا په‌نابه‌ران شانه‌یێن نڤستی ره‌وانه‌یی هه‌رێمێ بكه‌ت یا گرنگ بۆ تیرۆرێ ئه‌وه كریار ب بۆرینا سالان بهێنه ئه‌نجامدان، نه‌ك هه‌ر ده‌م ل ده‌ست و راگه‌هاندنه‌كا ئه‌كتیڤانه پێدڤیه دوور بیت ژچارچووڤێ هندێ دیمه‌نێن وه‌سا نیشا جڤاكی بده‌ت كو خه‌لك هه‌ر تشتێ هه‌یی قه‌ستا ناڤا په‌نابه‌ران بكه‌ت و پێشكێشبكه‌ت بلا ئه‌ڤ چه‌نده ببیته خه‌ما رێكخراوێن مافێ مرۆڤی و دیسا خه‌ما حوكمه‌تا عێراقێ و هه‌رێمێ نه زێده‌تر چونكو هندی مێژوویه و هندی كورده ژ هه‌ست سۆزی و دلساخیا خوه تووشی گه‌له‌ك ده‌رده سه‌ریان بوویه و بلا ڤێ ڤێجارێ پیچه‌ك دلره‌ق بین دا به‌س مێژوو خوه دوباره‌كه‌ت و خوینا گه‌نج و پیر و زارۆیێن كوردان ل جادده‌یان ب هه‌روه نه‌باریت.
