ب زمانێ دیپلۆماسی موزایده‌یه، به‌لێ (خیانه‌ته). .
ئه‌رێ مه‌به‌ستا سه‌روَكێ هه‌رێما كوردستانێ چیه؟ ده‌مێ دبێژیت ئه‌ز به‌رهه‌ڤه‌م هه‌موو پێشهاتێن راگه‌هاندنا ده‌وله‌تا كوردستانێ ب ستویێ خوه‌ڤه بگرم، به‌لێ هه‌كه ئالی و ئه‌حزابێن سیاسی موزایدێن سیاسی د پاشه‌روَژێ دا ل سه‌ر نه‌كه‌ن!.
پشتی ڤان هه‌موو چه‌رخ و ده‌ورانا ل وه‌لاتێن روَژئاڤا و ویلایه‌تێن ئه‌مریكی و به‌رهه‌ڤبوون و ئاماده‌بوونا به‌رۆكێن شه‌ڕێ دژی داعشا تیروَرست و تێك هژاندنا رایا گشتی یا جیهانی و رازیبوونا وان كو ب هه‌موو هێزا خوه هاریكاری و پشته‌ڤانیا پڕ چه‌ككرنا پێشمه‌رگه‌ی بكه‌ن، ئه‌رێ هێشتا موزایده ل سه‌ر مێزا دانوستاندنان ئالی و ئه‌حزابێن سیاسیێن كوردی ماینه؟، و ل سه‌ر كیستێ كێ ئه‌و موزایده دێ دهێنه كرن؟، وه‌كی سه‌روَك بارزانی د كۆمبوونا ل گه‌ل ئالیێن سیاسیێن كوردستانی ئاماژه ب رۆهنی و ئاشكرایی پێدای كو ده‌وله‌ت بوونا هه‌رێما كوردستانێ یا ئاماده‌یه بهێته مه‌یدانێ به‌لێ هه‌كه هنده‌ك ئالی و ئه‌حزابێن كوردی بخوه رێگر نه‌بن و به‌رژوه‌ندیێن خوه یێن به‌رته‌نگ و به‌رته‌سك بده‌نه ره‌خه‌كی، و نه‌بنه ده‌هۆل قوتێن وه‌لاتێن هه‌رێمی و ده‌وبه‌ر بوَ بده‌ستڤه‌ئینانا هنده‌ك مه‌ره‌مێن خوه‌یێن تایبه‌ت.
هه‌رچه‌نده من نه‌ڤێت جاره‌كا ڤه‌گه‌رم و به‌حسێ خیانه‌تێ بكه‌م، به‌لێ ب تنێ بوَ بیرهاتن و لێكدانا وێ موزایدا ب دیپلۆماسی سه‌روَك بارزانی به‌حس ژێ كری، یان ژی ب زمانێ من (خیانه‌تا)، كو هنده‌ك ئالی ل سه‌ر ته‌وه‌رێ هزرا به‌رته‌نگ د له‌یزن و سه‌مایا سیاسی ل سه‌ر كیستێ ملله‌ته‌كێ هه‌ژار دكه‌ن، وه‌ك نموونه‌كا به‌رچاڤ چو د راگه‌هاندنێن هه‌ڤدژی كوردان دا یان ژی به‌ره‌یێ به‌رهنگارا ناڤخوه‌یی دا هاتیه خوه‌یاكرن و راگه‌هاندن، كو هنده‌ك ژ سه‌ركردێن حزبێن كوردی ب مخابنی ڤه دێ بێژم سه‌ركرده هه‌ر چه‌نده ئه‌و ب كێر خولامینیا ملله‌تێ كورد ژی ناهێن چونكی هه‌رده‌م وانا كه‌سایه‌تیا خوه ل سه‌ر سفرا دوژمنان دیتیه و پاله‌وانێن دژایه‌تیا كوردان بووینه، و گازیا وانا ژ هه‌موویا كوور و دوورتر ئه‌وه پارێزگه‌ها كه‌ركووك ببیته هه‌رێما جودا و نه‌ڤه‌گه‌ریته سه‌ر هه‌رێما كوردستانێ، یان ژی هه‌ر چو نه‌بیت قووتێ ملله‌تێ هه‌ژار و فه‌رمانبه‌رێن كورد وه‌ك پێشنیازه‌كا بێ به‌رامبه‌ر بوَ ده‌ستهه‌لاتا تاك ڕه‌ویا مالكی بكه‌نه دیاریه‌كا زێرین و بێژنێ كه‌رمكه ئه‌ز خولام ب ڤێ كاره‌تێ دێ شێی مه داعویر و هه‌تا نوكه روَژه‌كێ ژی دلگرانیا خوه هه‌مبه‌ری ڤان كارێن نامه‌ردانه ده‌رنه‌بڕینه و ئه‌م چاڤه‌رێ ناكه‌ین چو روَژه‌كێ ژی نه ژ دوور نه نێزیك به‌حسێ بكه‌ن، ئه‌رێ گه‌لۆ ما ئه‌ڤه نه‌خیانه‌تا سوَر ب سوَره ل هه‌موو ملله‌تێ كورد دهێته كرن، هه‌تا گه‌هشتیه وی رادده‌ی كو وه‌لاتێ ئه‌و خزمه‌ت و سه‌پانیێ بوَ دكه‌ن، گه‌فێن مه‌زن ل ئێك ژ سه‌ركردایه‌تیا وان بكه‌ت، چونكی هنده‌ك جاران ئه‌و گوهداریا وان ناكه‌ت یان ژی رێنما و بۆچوونێن وان یێن دژی هه‌رێما كوردستانێ قه‌بوول ناكه‌ت، ئه‌ڤه ژی گه‌له‌كا سه‌یره چونكی ده‌مێ ئێك دبیته ئاسته‌نگ دڤێت بهێته لادان، له‌ورا ل گوَڕ سیسته‌مێ وانا و ل گوَڕ قانوونا وانا و ل گوَڕ خواندنا وانا بوَ كه‌توارێ نها ئه‌م تێدا دژین، دڤێت ئه‌و ژی بهێنه لادان و ژناڤبرن یێن دبنه رێگر و به‌ربه‌ست و ئاسته‌نگ درێیا هه‌بوونا ده‌وله‌تا كوردستانی، ب شێوه‌كێ رۆهن و ئاشكرا هه‌موو پێشێلكاری و دژایه‌تی و رێگرتنا وان بوَ خه‌لكێ هه‌رێما كوردستانێ بهێته به‌رچاڤكرن و ئاشكرا كرن، دا كو هه‌موو بزانن (كی به‌رخه و كی به‌رانه)، كی خوه‌فروَشه و كی خودانه، كی دلسوَزێ رێبازا ملله‌تی یه و كی دارده‌ستێ دوژمانه.
به‌ری هه‌بوونا ده‌وله‌تا كوردی و هه‌لاتنا ستێرا گه‌شا وه‌لاتێ كوردستانێ د ناڤ وه‌لات ناڤه‌ندێن جیهانی دا، دڤێت هه‌موو كوردێن دلسوَز و ب روومه‌ت پشته‌ڤانیا خوه بوَ گه‌شه‌كرن و پێشڤه‌برنا وێ هیڤی و ئوَمێدیا ب هزاران كوڕێن ملله‌تێ كورد و كوردستانێ گیانێ خوه بوَ كرینه قوربان و مالێن خوه ل سه‌ر وێران كرین و زاروَیێن خوه ژێرا هێلاینه بێ سه‌میان بكه‌ن، بانگه‌هشتا خوَش مێر و عه‌گیدان بكه‌ین، ئه‌رێ گه‌لۆ ما هێشتا موزایده ماینه ئه‌م ل سه‌ر خه‌ونا ملیوَنه‌ها كوردان بكه‌ین؟، ما هێشتا موزایده ماینه ل سه‌ر سفرا میران پێل به‌رێ چاڤێن زاروَكێن شه‌هیدان بكه‌ین، ما هێشتا و هێشتا و هه‌تا گه‌نكی دێ دار بڕێن به‌ژنا خوه‌بین دا كو ب تنێ جاره‌كێ سه‌یێ سوَلتانی بێژیت هه‌ر بژی و ده‌ستی خوه‌یێ پیس ب ملێ مه دا بینیته خوار و پاقژ بكه‌ت، خوزی ئه‌م نه‌باینه بازرگان و بازرگانی ب خوینا شه‌هیدان مه نه‌كربا، خوه‌زی ئه‌م نه‌باینه پازدار و جه‌ندرمه و دیروَك مه دوباره نه‌كربا، خوه‌زی ب تنێ ڤێ جارێ مه دیروَك به‌روڤاژی نڤیسیبا و خوه‌زی و خه‌ونا شاعرێن كوردان وه‌كی ئاگرێ نه‌وروَزا كاوه‌یێ ئاسنگه‌ر ل ناڤ جه‌رگێ دوژمنان دا هه‌لكربا..
