رێكخراوا هه‌ماهه‌نگیا ئیسلامی و ده‌وله‌تا كوردی
رێكخراوا هه‌ماهه‌نگیا ئیسلامی پشتگیریێ ل ئێك پارچه‌یا عیراقێ دكه‌ن و دان پێدان و پشتگێریێ ل ده‌وله‌تا فه‌لستینێ ژی دكن و لێ ب چ ره‌نگ و شێوا به‌حسێ نه‌ته‌وا كورد ناكن نه ژ دوور و نه ژ نێزیك، مخابن و شه‌رم ناكن خوه دكن موسولمان و دان پێدانێ ب مافێ گه‌لێ كورد ناكن وه‌كی هه‌می نه‌ته‌وان و ل سه‌ر خوه ناگرن ناڤێ كوردستانێ بینن، ئه‌رێ گه‌لوَ بوَچی ڤێ دووریاتیێ و نه‌ڤیانێ و جێوازیێ دكن ؟. . هه‌تا كه‌نگی گه‌لێ كورد دێ مینیت چاڤه‌رێ سه‌ربه‌خوَیا خوه؟ ڤێجا دبێژم هه‌وه بڤێت یان نه‌ڤێت دێ بین ده‌وله‌ت ب ئانه‌هیا خودێ، ئه‌ڤروَ دیاره ده‌وله‌تێن زلهێزێن جیهانێ دان پێدانێ ب كوردستانێ دكن وه‌ك وه‌لاته‌كی ئازاد و سه‌ربه‌خوَ و روَژ ب روَژ نڤێسینگه‌ه و قونسلێن ده‌وله‌تێن خوه ل هه‌ولێرا پایته‌ختێ كوردستانێ ڤه‌دكن و په‌یوه‌ندیان ب باشی گرێددن و بلا به‌س بت ئه‌ڤ نه‌ڤیان و دلڕه‌شی به‌رامبه‌ری مه، نێ د دیروَكێ دا گه‌له‌ك سه‌ركردێن مه به‌ره‌ڤانیێ ل هه‌بونا هه‌وه و ئاینێ ئیسلاما پیروَز كربوون و نوكه ژی هێشتا به‌رده‌وامن و بزانن سه‌دا هه‌شتێ ژ گه‌لێ كوردستانێ موسولمانن و دناڤ پارێزگه‌ه و وارێ مه دا ب سه‌دان مزگه‌فت لێ هه‌نه و په‌رستنا خودایێ ئێكانه دكن و سالێ ب هزاران قه‌ستا مه‌كه‌ه و مه‌دینێ دكن و دچن حه‌ج و عومرا ئه‌دادكن و هه‌ر ژ بوَ عه‌شقا خودایێ ئێكانه و په‌یاما پیروَزا پێغه‌مبه‌رێ وی ( محمدی ) سڵاڤ ل سه‌ر بن، ئه‌رێ بوَچی ده‌وله‌تبوون بوَ عه‌ره‌ب و موسولمانان حه‌لاله ؟ بوَچی بوَ گه‌لێ كورد بتنێ حه‌رامه ؟ و 23 ده‌وله‌ت عه‌ره‌ب و 33 نه ژ توخمێ عه‌ره‌بان یێن موسلمانان ل ڤێ زه‌مینێ دا هه‌نه و خودان سنوور و له‌شكه‌ر و ده‌وله‌تن، لێ هه‌ر ده‌مێ ملله‌تێ كورد به‌حسا مافێ خوه كر و گوتن مه دڤێت وه‌كی ده‌ور و به‌رێن خوه ببین ده‌وله‌ت هوون وه‌كی گورگ و هرچێن هار و شێت دبن و كوَمبوونا ل دووف كوَمبوونان ئه‌نجام ددن و دبێژن ئه‌م پشته‌ڤانێ ئێكگرتنا ئاخا عیراقێ نه و نابت كورد خوه ژ عیراقا فاشل و دكتاتوَر ڤه‌كن دا دونیا خراب نه‌بت و نابت چ جاران كورد هزرا سه‌ربه‌خوَیا خوه بكن یان ده‌وله‌ته‌كا نوی بناڤێ كوردستانێ ئاڤابكن و رابگه‌هینن و نابت عیراق پارچه پارچه ببت , به‌لێ ده‌وله‌تێن عه‌ره‌بان خوه ژبیركرینه و موسلمانان ژی خوه هنداكرینه و هێشتا نزانن ئه‌و ڤێكرا ب خوه پارچه پارچه‌نه و هه‌ر ئێك شانازیێ ب هه‌بوونا خوه و سامان و هێز و شیان و په‌یوه‌ندیێن خوه یێن نافخوه‌یی و ده‌رڤه دكن، لێ باش بزانن خه‌مخوَرێن وه‌لاتی گه‌له‌كن، خه‌بات و به‌رخوه‌دان و تێكوشانێ ب شه‌ڤ و روَژ دكن ژبوَ هه‌بوونێ به‌رده‌وامن هه‌تا بگه‌هن هه‌می مافان و ب ئێكجاری بده‌ستڤه بینن و دووماهیێ دلێن دایكێن شه‌هیدان خوه‌ش دكین ب راگه‌هاندنا ده‌وله‌تا كوردستانێ یا ئازاد و سه‌ربه‌خوه، ئه‌ڤا هه‌ر چار پارچێن كوردستانێ چاڤه‌رێ و ب ساخ و سه‌لامه‌تی بژین وه‌كی ملله‌تێن ئازاد ل ڤێ زه‌مینێدا و پێشمه‌رگێن قاره‌مانێن گه‌لێ مه ده‌م بوَ ده‌می د چه‌په‌راندا به‌رده‌وام نانڤن ژ بوَ پاراستنا هه‌می هاولاتیێن هه‌رێمێ دا و ده‌م هاتی یه بێژین هه‌وه به‌سه هه‌ی فێلبازو دره‌وكه‌رێن جیهانێ، رازیبن یان نه, سوحبه‌ت گه‌رمه ل سه‌ر ده‌وله‌تبوونا كوردستانێ و سه‌ركردێ مه ژڤان دایه گه‌لێ مه ژبوَ ده‌وله‌تبوونا كوردستانێ.
