په‌كه‌كه و كارتیكرنێن وێ ل سه‌ر هه‌رێمێ و ده‌ڤه‌رێ!!
ل (27/11/1978) په‌كه‌كه هاتیه دامه‌زراندن و عه‌بدوللا ئۆجه‌لان وه‌ك سه‌رۆكێ حزبێ هاته دانان و هزر و بیر و بۆچوونێن ڤێ پارتێ یێن ماركسی و لینینی نه و ئارمانجا وێ ل ده‌سپێكێ ئه‌و بوو دامه‌زراندنا ده‌وله‌تا كوردستانا مه‌زنه ئه‌ڤه وه‌كی ئه‌و دبێژن!!
هه‌كه ئه‌م پیچه‌ك ل مێژویێ بزڤرین دێ بینین كو په‌كه‌كێ هه‌ر ژ سالا 1984 چه‌ك دژی توركیا هه‌لگرتیه و شه‌ڕس و سه‌رهلدان كرینه و ژ كار و ره‌فتار و راگه‌هاندنا په‌كه‌كێ دیار دبیت كو پارته‌كا چێكریه نه‌ك ژ ماف و داخوازیێن خه‌لكێ كوردستانێ دروست بوویه به‌لكو دارده‌ستا هنده‌ك وه‌لاتانه و بۆ دژایتكرنا دۆزا كوردی دروست بوویه و پارتی سه‌ربۆڕه‌ك ل گه‌ل په‌كه‌كێ هه‌یه و مخابن ل وی ده‌می كو پیلانه‌ك هاتبوو دارێتن بۆ ژناڤبرنا پارتی ل سالێن نۆتان دا و په‌كه‌كه لایه‌نه‌كێ سه‌ره‌كی بوو كو وێ پیلان جێبه‌جێكه‌ت، به‌لێ سه‌رنه‌گرت و بوو ئه‌گه‌ر پارتی چه‌كی دژی برایێن خوه یێن كورد هه‌لگریت بۆ ژناڤبرنا ڤێ پیلانێ! به‌لێ پشتی هاتنا ئاردۆغانی بۆ سه‌ر كورسیكا حوكمرانیێ ل توركی و گرتنا ئاپۆی ل سالا 1999 و حوكمكرنا وی ب سێداره دانێ و باشی حوكم هاته گهورین بو زیندانیكرنا هه‌تاهه‌تا و په‌كه‌كێ شه‌ر ژ ئێك لاڤه راوستاند تا سالا 2004 جاره‌كادی زڤری شه‌ڕی ڤه دژی توركیا ! ئاردوغان شیا حوكمه‌تا خوه هه‌تا راده‌كی جیگیركه‌ت و ده‌لیڤه دا كوردان پشكدار ببن د په‌رله‌مانێ توركیا و نوونه‌راتیا كوردان بكه‌ن هه‌ر چه‌نده زۆر پارتێن كوردی پشكداربوون به‌لی پتریا وان ل بن گڤاشتنن په‌كه‌كێ بوون!! و ب دروستی نه‌شیان كارێ سیاسی ئه‌نجام بده‌ن و تا نوكه ژی ئه‌ڤ چه‌نده یا دیاره د كار و چالاكیێن پارتێن دی یێن كوردی ل توركیا كو په‌كه‌كه رێگره بۆ ئه‌نجامدانا كارێن سیاسی ب شێوه‌كێ دروست! به‌لێ پشتی سه‌رهلدانا سووریێ و په‌یدابوونا داعشێ و شه‌ڕێ وان ل گه‌ل كوردان دیار بوو كو په‌كه‌كه مه‌ترسیه‌كا هه‌را مه‌زنه ل سه‌ر دۆزا كوردی ب گشتی و هه‌رێما كوردستانێ ب تایبه‌تی و ئه‌ڤ مه‌ترسیه د ڤان چه‌ند خالاندا دیار دبیت:ـ
• یاخوه‌یایه كو په‌یوه‌ندین سیاسی و ئابووری د ناڤبه‌را هه‌رێمێ و توركیا چووینه ئاسته‌كێ هه‌رێ باش و بلند و بێگومان هه‌ر كریاره‌كا په‌كه‌كێ چ ل توركیا یان ل سه‌ر ئاخا كوردستانێ دژی توركیا كارتێكرنێ ل ڤان په‌یوه‌ندیان دكه‌ت و دبیته ئه‌گه‌ر كو گڤاشتن ل سه‌ر هه‌رێمێ بهێنه كرن كو رێ ل ڤان كار و كریاران بگریت و باش دزانن كو ئیران پالده‌را په‌كه‌كێ یه بۆ ئه‌نجامدانا ڤان كاران و بۆ تێكدانا بارودوخێ هه‌رێمێ په‌كه‌كه ب ڤێ چه‌ندێ رابیت.
• پشتی هه‌لبژارتنێن ڤێ دووماهێ ل توركیا و ده‌ربازكرنا هه‌ده‌پێ بۆ ریژا یاسایی و بده‌ستڤه‌ئینانا ریژا 13% یاده‌نگان ل توركیا په‌كه‌كه بوو دو پشك پكشه‌ك دژی پرۆسا ئاشتیێ كو ل قه‌ندیلی نه و ب چ ره‌نگا باوه‌ری ب پێڤاژۆیا ئاشتیێ نینه و باوه‌ری ب پروژێ ئاردوگانی نینه و پشكا دوو كو باوه‌ریه‌كا تمام یاهه‌یی كو ب رێیا ئاشتیێ دشێن مافێن خوه بده‌ستڤه ئینن و كه‌سێ ئاپۆ بخوه ژی دژی شه‌ریه و باوه‌ری هه‌یه كو ب رێیا سیاسه‌تێ و ئاشتیێ د پێنگاف پێنگاف مافێن كوردان بده‌ستڤه ئێن به‌لێ چونكی بالێ قه‌ندیلی ل بن گڤاشتن ئیرانێ یه و هه‌رده‌م په‌كه‌كێ بالده‌ت بارودۆخێ ده‌ڤه‌رێ تێكده‌ت و توركیا راكێشیته ناڤ كێشێن ناوجێدا ئه‌وبوو پشتی روودانا برسۆسێ و ل دووڤدا كوشتنا پۆلیسێن توركیێ كو په‌كه‌كێ كوشتنا وان كره ستویێ خوه ئێكسه‌ر بارودۆخ ئالۆز بوو و گه‌هشتیه وی راده‌یی كو دوباره شه‌ڕ دروست ببیت !!
• هه‌ر ژ ده‌سپیكا دروستبوونا په‌كه‌كێ رژێما سووریێ و ئیران رۆله‌كێ مه‌زن د دروستكرنا وێدا هه‌بوو و بدزیڤه پشته‌ڤانی لێ دكر دژی توركیا و پشتی سه‌رهلدان ل سووریێ رابووین و هه‌می لایه‌نان هه‌لۆیستێ خوه ل به‌رامبه‌ر دیاركری نوكه ئیران و سووریا په‌كه‌كێ وه‌ك كارته‌كا فشارێ دژی توركیا و هه‌رێمێ بكاردئینن و ئه‌ڤ چه‌نده بوویه ئه‌گه‌ر كو كورد ب دروستی رۆلێ خوه ل سووریا نه‌بینن و مفایی ژڤێ ده‌لیڤێ ب دروستی نه‌بینن سه‌ره‌رایی پێكۆلێن سه‌رۆكێ هه‌رێمێ بۆ ئێك رێزیكرنا ناف مالا كوردی ل سووریا به‌لێ په‌كه‌كێ ده‌لیڤه نه‌دایه ڤێ چه‌ندێ و بوویه ئه‌گه‌ر كو د راگه‌هاندنا خوه دا شه‌ڕ و گله‌یان ل هه‌رێمێ بكه‌ن كو هاریكار نینن د گه‌ل كوردێن رۆژئاڤا و ل سه‌ر ئه‌ردی دژی هه‌ر پێنگاڤه‌كێنه كو هه‌رێم بهاڤێت بۆ هاریكاریكرنا كوردێن رۆژئاڤا.
• په‌كه‌كه پارته‌كا كوردیه، به‌لێ ژبه‌ر گڤاشتنن توركیا ل سه‌ر ئه‌ورۆپا و ئه‌مریكا نوكه په‌كه‌كه كریه دلیستا پارتێن تیرءردا و ل دووڤ یاسایێن نێڤده‌ولی ده‌وله‌تا توركیا مافێ وێ چه‌ندێ یێ هه‌یی شه‌ڕی و به‌رڤانیێ ژ خوه بكه‌ت دژی تیرۆرێ و هه‌ر شه‌ڕ و كاره‌كێ په‌كه‌كه ل سه‌ر سنۆرێ هه‌رێمێ دكه‌ت دبیته ئه‌گه‌ر كو به‌رامبه‌ر وێ توركیا چه‌كی بكاربیت و فرۆكان راكه‌ت دژی وان و توركیا باش دزانیت كو یا سنۆرێن هه‌رێمێ دبه‌زینیت و ده‌ڤه‌رێن كوردان تۆپباران دكه‌ت به‌لێ ب به‌هانا به‌رڤانیكرن ژخوه، ب ڤان كریاران رادبیت و ئه‌ڤ چه‌نده دبیته ئه‌گه‌ر كو پێگه‌هێ سیاسی ل هه‌رێمێ لاواز بیت و نه‌چار دبیت هه‌لۆیستان وه‌رگریت چ دژی سیاسه‌تا توركیا و چ دژی ره‌فتارێن په‌كه‌كێ و گه‌له‌ك جاران هه‌رێمێ باجه‌كا سیاسی یا مه‌زن دایه پێخه‌مه‌ت پاراستنا هه‌رێمێ و به‌ژه‌وه‌ندیێن وێ.
• پاراستنا هه‌رێما كوردستانێ و به‌رژه‌وه‌ندیێن وێ ئه‌ركێ حوكمه‌ت و سه‌رءكاتیا هه‌رێمێ یه و وه‌ك سه‌رۆكێ حوكمه‌تێ و سه‌رۆكێ هه‌رێمێ گۆتی ئه‌م پشته‌ڤانێن هه‌ر كورده‌كینه ل هه‌ر جهه‌كی بیت و داخوازا مافێن خوه یێن نه‌ته‌وه‌یی بكه‌ت به‌لێ په‌كه‌كه چ هزره‌كێ بۆ بارودوخێ هه‌رێمێ ناكه‌ت و كریارێن وێ زه‌ره‌ره‌كا مه‌زن ل هه‌رێمێ دكه‌ت.
• ئه‌ڤه ده‌مه‌كه حوكمه‌تا توركیا ب سه‌ركرداتیا ئاردوغانی كه‌تینه ململانه‌كا مه‌زن گه‌ل له‌شكری و شیاینه چه‌ندین سه‌ركردین له‌شكرێ توركیا یێن پایه به‌رز و نه‌ته‌وه په‌رست خانه‌نشین بكه‌ن و هنده‌ك دانه دادگه‌هێ و هاتنه سێداره‌دان و هنده‌ك حوكم كرن ب زیندانیكرنێ و ئه‌ڤێ چه‌ندێ وه‌كر كو ئه‌ڤ ململانه یابه‌رده‌وام بیت و نه‌خاسمه هنده‌ك ژ سه‌ركردێن له‌شكری كار بۆ وێ چه‌ندێ دكه‌ن كو شه‌ڕ ل گه‌ل په‌كه‌كێ یێ به‌رده‌وام بیت و فشارێ بێخنه سه‌ر ئاردوغانی، چونكی شه‌ر د به‌رژه‌وه‌ندیا واندیا و ب قه‌چاغی بازرگانیێ دكه‌ن و تریاك و كه‌ره‌ستێن بێهوشكه‌ر به‌ردوام بازرگانیا وان هه‌بیت و كه‌س نه‌شێت رێیا هاتن و چوونا وان كونترۆل بكه‌ت ئه‌گه‌ر به‌رده‌وام شه‌ڕ ل وان ده‌ڤه‌رێن چیایی هه‌بن و حوكمه‌تا ئاردوغانی لاوازكه‌ن! ئه‌ڤه هه‌كه ئه‌م بزانین كو رێیا ڤان مادێن بێهوشكه‌ر ژ ئه‌ڤغانستانێ و پاكستانێ و ئیرانێ و د رێیا هه‌رێمێ را دچنه توركیا و پاشی بۆ بازارێن جیهانی و هۆسا شه‌ڕێ دێ یێ به‌رده‌وام بیت ل گه‌ل په‌كه‌كێ و هه‌رێمێ باجا ڤێ چه‌ندێ ده‌ت و بۆ زانین ئاردوغان یێ هه‌می بزاڤا دكه‌ت كو كێشا كوردی ب رێیا دیالۆگێ و په‌رله‌مانی چاریه‌كێ بۆ بینیت و پاشی دژی نه‌یارێن خوه یێن تورك راوستیت.
• گڤاشتنێن ئیرانێ یێن به‌رده‌وام ل سه‌ر به‌غدا و په‌كه‌كێ كارتێكرنا مه‌زن هه‌بوو ل سه‌ر ئالۆزبوونا په‌یوه‌ندیێن هه‌رێمێ و به‌غدا و به‌غدا توركیا ئه‌ڤه هه‌كه ئه‌م بزانین كو ئێك جار به‌غدا ب فه‌رمی ئیدانا كارێن په‌كه‌كێ ل سه‌ر توركیا نه كریه به‌لكو به‌رده‌وام كێشان بۆ هه‌رێمێ چێدكه‌ت كو بۆچی هه‌رێم سنۆره‌كی بۆ زێده‌گاڤیێن توركیا نادانیت و نه‌هێلیت په‌كه‌كه كارێن شه‌ڕی دژی توركیا بكه‌ت و باش دزانن كو ئه‌ڤ چه‌نده ژ شیانێن هه‌رێمێ مه‌زنتره.
• ژ به‌ر ڤان كاودانێن نوكه رۆژهه‌لاتا ناڤه‌راست تێدا دبۆریت و شه‌ڕێ داعش و هه‌ستیاریا بارودۆخی ل ده‌ڤه‌رێ وه‌كر كو سه‌رۆكێ هه‌رێمێ (مسعود بارزانی) وه‌كو رۆژناما سه‌باح یا توركی به‌لاڤكری كو كاركه‌ت و هاریكار بیت بۆ چاره‌كرنا كێشا په‌كه‌كێ ل گه‌ل توركیا و بۆ ڤێ چه‌ندێ پرۆژه‌ك بۆ چاره‌كرنا كێشێ دارێتیه ئه‌و ژی پشتی روونشتن ل گه‌ل سه‌ركردێن په‌كه‌كێ و شرۆڤه‌كرنا پرۆژه‌یی كو دڤێت په‌كه‌كه راگه‌هاندنا ئاگر به‌سته‌كا درێژخایه‌ن بكه‌ت د گه‌ل توركیا و سنۆرێ هه‌رێمێ دگه‌ل توركیا یێ ئارام بیت و بێته كونترۆلكرن و رێ خۆش ببیت بۆ ڤه‌گه‌ریانا ئاوارێن كوردێن توركیا بۆ سه‌ر گوند و ئه‌ردێن خوه و حزب و لایه‌نێن دی یێن كوردی ل ناڤ په‌رله‌مانێ توركیا ژ بن گڤاشتنن په‌كه‌كێ ده‌ركه‌ڤن و دا كار بۆ چاره‌كا سیاسی بۆ كێشا كوردی ل توركیا بهێته دیتن و به‌رهه‌مێ ڤی پرۆژه‌یی دانوستاندنا حوكمه‌تا توركی بوو ل گه‌ل ئوجه‌لانی و بوو ده‌ستپێكه‌ك بۆ چاره‌كرنا كێشا كوردی ل توركیا.
• پشكداری و پشته‌ڤانیا پێشمه‌رگه‌یی د رزگاركرنا كۆبانێدا و پێشته‌ڤانیا به‌رده‌وام یا هه‌رێمێ و ب هه‌می ره‌نگان بۆ كوردستانا رۆژئاڤا وه‌كر نێزیكبوونه‌ك د ناڤبه‌را پارتێن كوردی ل سووریێ دروست ببیت و بوو پالده‌ر كو رێكبكه‌ڤن و رێكه‌فتنا دهۆكێ ب چاڤدێریا سه‌رۆكێ هه‌رێمێ ئیمزا كر به‌لێ دیسا مخابن په‌كه‌كه كه‌ته بن گڤاشتنن سووریا و ئیرانێ و په‌شیمان بوو ژ رێكه‌فتنێ و نوكه سه‌ركردێن ڤێ پارتێ ب ئاشكرایی د ژی بیرۆكا ده‌وله‌تا كوردینه كو پارتی سه‌ركێشا ڤی پرۆژه‌یه.
• به‌رژه‌وه‌ندیێن ئه‌مریكا ل گه‌ل توركیا گه‌له‌كن و پرۆژه‌ك هه‌یه بۆ دروستكرنا رۆژهه‌لاتا نوو كو توركیا د سه‌ركێشیا وی پرۆژه‌یی كه‌ت و سه‌ركردایه‌تیا كوردی یا هه‌می بزاڤان دكه‌ت پێخه‌مه‌ت ڤێ ده‌لیڤێ ژ ده‌ست نه‌ده‌ن و ملله‌تێ كورد بگه‌هینیته ئارمانجان و مفایی ژ ڤان كاودانان ببینیت. به‌لێ ئیران ترسا وێ ژ ڤی پرۆژه‌یی به‌رده‌وام په‌كه‌كێ هانده‌ت كو ئالۆزیا و گرفتان بۆ هه‌رێما كوردستانێ و توركیا دروست كه‌ت داكو یا به‌رهه‌ڤ نه‌بیت بۆ جێبه‌جێكرنا ڤی پرۆژه‌یی و دا كارتیكرنێ ل بارودۆخێ هه‌رێمێ بكه‌ت كو مفایی ژڤێ ده‌لیڤێ و ڤان كاودانا نه‌بینیت و خوه حازرنه‌كت بۆ پاشه‌رۆژه‌كا گه‌ش د رۆژهه‌لاته‌كا ناڤه‌راستا نوو دا و نوكه رێكه‌فتنه‌ك هه‌یه د ناڤبه‌را په‌كه‌كێ و ئێكه‌تیێ ب چاڤدێریا ئیرانێ كو بارودۆخێ ئێزدیان پتر ب ئازرینن و دژی حوكمه‌تا هه‌رێمێ هانده‌ن و كێشا دروست كه‌ن و گه‌فێن دروستكرنا كانتۆنا ل شنگالێ و سلێمانیێ و كه‌ركووكێ بكه‌ن و به‌غدا ژی ب نهێنیڤه پشته‌ڤانیا ڤان جۆره كاران دكه‌ت ب تنێ بۆ ژناڤبرنا بیرۆكا سه‌ربه‌خوه‌یا كوردان!! به‌لێ ئێدی خه‌لكێ كوردستانێ رێ ناده‌ت كه‌س یاریان ب چاره‌نڤیسێ وی بكه‌ت و ئه‌و دێ بریارێ ل سه‌ر پاشه‌رۆژا خوه ده‌ت نه‌ك چ پارت و لایه‌نێن سیاسی.
