ئاشه‌كی بهێلین، دا هوون هه‌ڤڕانێ خوه لێ بهێرن
بیرا من دهێت ل سالا (2009) من دڤیا دووڤچوونا چیره‌كی ل سه‌ر جهه‌كێ شوونواری ل ناڤ به‌رواری بالا بكه‌م (گوندێ كانی ساركێ)، وی وه‌ختی ده‌ستودانێ ده‌ڤه‌رێ یێ خراب و نه‌ڤه‌حه‌ویای بوو، بیرا من دهێت كو قه‌ره‌قۆله‌كا تركا ل هنداڤی مه بوو، براده‌را دگۆت هشیاربن چ رۆناهیا نه‌هه‌لكه‌ن دا ترك مه نه‌بینن، نه‌كو پاڤێژنه مه و زه‌ره‌ر ڤمه بكه‌ڤیت، پاشی باشبوو ئه‌م ب سلامه‌تی زڤڕین.
پاشی گه‌له‌ك پێڤه نه‌چوو، ئه‌و بوو (پیڤاژۆیا ئاشتیێ) د ناڤبه‌را تركی و په‌كه‌كێ ده‌ستپێكر، كوردێن ئیراقێ ملێن خوه دانه‌به‌ر، ئالاڤه‌ك بوون كو ئه‌و پیڤاژۆیه سه‌ر بگریت، ژبه‌ركو سه‌ربۆرا كوردێن ئیراقێ ژ هه‌می پارچێن دی یێن كوردستانێ پتره، كو چ ب شه‌ڕیڤه ناهێت، دڤیا ڤێ چه‌ندێ ب رۆهنی بێژیته برایێن خوه یێن په‌كه‌كه. خه‌لك د چوو سه‌ر گوندێن خوه، ئه‌و جهێن ئه‌ڤه چه‌ند ساله بووینه ده‌ڤه‌رێن موحه‌ره‌م به‌رێ خه‌لكی كه‌تێ، گه‌له‌كا دڤیا وارێ باب و باپیرێن خوه بینن، نه‌خاسمه ل ده‌ڤه‌رێن نێروه و رێكان و دۆسكی ژۆری، كو دبنه تخویبێن ژێریا كوردستانێ دگه‌ل ژۆریا وێ.
هندی مه خواندی و ڤه‌خاندی و گۆلێ بوو، كو شۆڕشێن له‌شكری بهاریكاریا خه‌لكێ جۆتیار و ژار دهێنه كرن، ژبه‌ركو زه‌ره‌را مه‌زن به‌ری هینگێ ڤوان كه‌ڤیته، ئه‌و هێڤێنێ هه‌می شۆڕش و سه‌رهه‌لدانانه، به‌لێ هه‌رئێكێ ژمه بچیته ده‌ڤه‌را به‌رگارێ یان نێروه یان رێكان، دێ هه‌ڤرووشی چه‌ند تشته‌كان بیت، ئه‌و ژی:
• دێ راوستگه‌هێن (سه‌یته‌ره) په‌كه‌كێ بینی، وێنه‌كێ سه‌رۆكێ وان ژی یێ پێڤه، دێ پرسیارا مرۆڤی كه‌ن، هوون ژ كیڤه دهێن؟، دڤێت چه‌ك و كامیره و هه‌تا موبایله‌كا باش ژی ڤته نه‌بیت، ڤێجا وه‌ختێ مرۆڤ دچیته وان ده‌ڤه‌ران یا ژ مرۆڤی ڤه وه‌لاته‌كێ دییه.
• دنیایه‌كا ئه‌ردێ هه‌رێما كوردستانێ یێ گرتی، كو خودانێن وان نه‌شێن بچنه د ناڤ ئه‌ردێ خوه دا و جاره‌كا دی ره‌ز و باغ و بیستانێن خوه بڤه‌ژینن، هه‌روه‌كی ژ سه‌روه‌ختێ سه‌دامی وه‌ره ئه‌و ده‌ڤه‌ر یا موحه‌ره‌م بوو، كو ده‌ڤه‌ره‌كا ئاڤیه و دشێت كێنجه‌كا مه‌زن ل سه‌روبه‌رێ ئابووریێ ڤێ ده‌ڤه‌رێ بكه‌ت، نه‌خاسمه كو ئاخا وێ ده‌ڤه‌رێ بۆ چاندنێ گه‌له‌كا قه‌له‌وه، به‌لێ پا وێرێ وه‌لاته‌كێ دییه.
• خویكێ ژی ژ خه‌لكی وه‌ردگرن، كو ئه‌و زه‌ره یێ ژ مه‌حفیرێ كێمبوو، هه‌رگاڤا ئێك چوو گویز یان هه‌ر متایه‌كێ خۆ چنی، دڤێت باهرا په‌كه‌كێ بده‌تێ، كو بۆرجه‌كێ وه‌رگرتنا خویكێ یێ دانایه سه‌رێ رێكێ، هه‌رگاڤا خولیسه‌ره‌ك یان جوتیاره‌كی تشته‌ك ئینا دڤێت مزئاشێ وان ژی بده‌ت.
• ئه‌و ده‌ڤه‌ر به‌هه‌شته‌كا سه‌ر ئه‌ردییه كو جهێن وێ یێن سه‌یران و سه‌یرانچیا دكه‌نه هه‌وار، مینا گه‌لیێ بالندا و ده‌ڤه‌را به‌رگارێ كو ژ ده‌وله‌تسه‌رێ په‌كه‌كێ خه‌لك زوی ب زوی نه‌وێریت بچیته وان جها و له‌زه‌تێ دناڤ وه‌لاتێ خوه دا ب وه‌لاتێ خوه ببه‌ت.
ڤێجا یا ل به‌ر من ژی به‌رزه‌بووی، كانێ شۆڕش چاوا دهێنه كرن، هه‌كه هۆسا بن، خه‌لك هه‌می دشێت ڤان ره‌نگێ شۆڕشان بكه‌ت، ژ به‌ر ڤێ سیاسه‌تا خراب یا په‌كه‌كێ ئێدی نه‌شیا وه‌كی پێدڤی خوه د مه‌یدانا سیاسی و رێڤه‌برنێ دا بینیت، پشتی قه‌ومینێن ڤێ دووماهیێ ل تركی، ئێكجار دربه‌كێ مه‌زن ژ لایێ سیاسیڤه ل كوردان دا، ل دووماهیێ ژی دێ بێژمێ: بۆ خوه ئاشه‌كی بهێلن هه‌میان ژ خوه نه‌كه‌ن، دا جاره‌كێ هه‌ڤڕانێ خوه لێ بهێرن.
