رۆژڤالایێ كوردستانێ
من پۆستێ هه‌ڤاله‌كێ خوه ب ناڤێ رۆژاڤا ل سه‌ر فێسبۆكێ خوه‌ند د هه‌مان رۆژێ ده من داخویانیێن ئیلهام ئه‌حمه‌د ژ مالپه‌را وه‌لاتی ره خوه‌ندن.
هه‌ڤالێ من ئاماژه ب ره‌وشا خرابیا نها ل رۆژاڤایێ كوردستانێ دكه چ ژ ئالیێ خزمه‌تگوزاریێ، چ ژ ئالیێ كێشه و ناكۆكیێن د ناڤبه‌را هێز و ئالیێن سیاسی ده…و گازی دكه كو رۆژاڤا نه‌به رۆژڤالا ژ نشته‌جیێن خوه‌یێن ره‌سه‌ن.
ئلهام ئه‌حمه‌د ژی كو یه‌ك ژ سه‌ركرده‌یێن ته‌ڤگه‌را جڤاتا ده‌مۆكراتیك ته‌ڤ-ده‌مێ یه ئیرۆ ١٥ ته‌باخێ كو رۆژا بیرانینا ٣١ ئه‌مین ده‌ستپێكرنا خه‌باتا چه‌كداری بوو ژ ئالیێ پارتیا كاركه‌رێن كوردستانێ پكك ل دژی ده‌وله‌تا تركیێ ب ئارمانجا سه‌رخوه‌بوونا كوردستانێ ده‌ستپێكر و ب هن داخوازن نه دیار گهایه ڤێ قۆناخێ، ژ مالپه‌را وه‌لاتی ره چه‌ند داخویانی دابوون و ئه‌شكه‌ره كربوو كو “چ كه‌سێ خوه د هندرێ رێڤبه‌ریا خوه‌سه‌ر ده نه‌بینه به‌را جهێ خوه ل ده‌رڤی رۆژاڤایێ كوردستانێ ببینه. ”
ئه‌ڤ ره‌وش تشته‌كی تنه بیرا من دبه كو ب هه‌ر كه‌سی ره چێبوویه، ده‌ما كو ئه‌ز ل باسێ سواردبووم، هه‌گه‌ر ئه‌ز د كورسیا داوی ده روودنشتم من هالێ هه‌می كه‌سێن كو ل باسێ سواردبوون ددیت، من ددیت بێ چاوا ژنه‌ك بێ كورسی دما و چاوا خه‌لك ب هه‌ڤ دزه‌لقین و خوێدان ژ وان دنقوتی و من ددیت ژی بێ خه‌لك چاوا خوه ب ده‌ریێ باسێ دادلقاندن ته‌ڤی مه‌ترسی ژی تێ ده هه‌بوو لێ ره‌وشا خه‌لكێ ئه‌ڤ بوو، لێ هه‌گه‌ر ئه‌ز ل كورسیا پێشی سوار دبووم من نه‌ما زانی بوو بێ چ د هندرێ باسێ ده چێدبه، ئه‌ز ب ت پرسگرێكان نه دهسیام و من ته‌خمین دكر ژی كو هه‌ر كه‌س وه‌ك من ب هه‌سانی ل سه‌ر كورسیه‌كێ روونشتیه…..
ئه‌ز نزانم كو ڤێ ره‌وشێ بالا وه كشاندیه ئان نا.
ئه‌ز هن داخویانی و لێدوانێن هن سه‌ركرده‌یێن ته‌ڤ-ده‌مێ دخوینم كو ئه‌و ب ته‌نێ ره‌وشا هه‌ڤالێن خوه دبینن و گوهێ وان ته‌نێ ب بهیستنا گۆتنێن ل گۆری رامان و ئیدیۆلۆجی و دبستانا برێز ئۆجه‌لان به ره‌هه‌ت و كێفخوه‌ش دبه، چنكو هه‌گه‌ر كه‌سێ جهێ خوه د رێڤه‌به‌ریا خوه‌سه‌ر ده نه‌بینه به‌را ده‌ركه‌ڤه ده‌رڤی وه‌لات، تێ وێ واته‌یێ كو ژ رێڤه‌به‌ریا خوه‌سه‌ر ره نه خه‌مه هه‌گه‌ر ب سه‌د هه‌زاران كورد كۆچبه‌ر دبن به‌ر ب ئه‌ورۆپا ڤه، ژ به‌ر كو ئه‌و كه‌س ل گۆری كه‌سایه‌تیێن وه‌ك ئلهام ئه‌همه‌د نه هێژایی رێڤه‌به‌ریا خوه‌سه‌رن و ب ته‌نێ خه‌لكێن كو د هندرێ وه‌لاته مانه هێژایی ژیانێ نه ل وه‌لات.
جڤاته‌ك ل جیهانێ تنه‌یه كو ته‌نێ ره‌نگ و ده‌نگه‌ك به، و چ ته‌ڤگه‌ر و پارتیێن كو خوه‌ستنه وه‌لاته‌كی یان جڤاته‌كێ بكن ب یه‌ك ده‌نگ و ره‌نگ ب سه‌رنه‌كه‌تنه و باندۆره‌كێ نه‌رێنی ل سه‌ر جڤاتێ هشتنه.
شۆره‌ش و شۆره‌شڤانێن راسته‌قینه مینا گۆرانبێژانه ل به‌ر سترانێن وان هه‌ركه‌س كێف خوه‌شدبه، مله‌ت ب ته‌ڤاهی نابه شه‌رڤان و شۆره‌شڤان لێ شۆره‌شڤان و شه‌رڤان گه‌ره‌كه وه‌لاتان خوه‌شبكن دا كو هه‌ر كه‌س كاربه تێ ده بژی نه ب ته‌نێ ئه‌و كه‌سێن خوه وه‌ك وان شۆره‌شڤان و شه‌رڤانان دبینن، و ژ ئه‌ینێ كانیێ ئاڤێ ڤه‌دخون هه‌گه‌ر وێ هه‌ر كه‌س ببه شۆره‌شڤان ئێدی واته ژ شۆره‌شێ ره نامینه.
